Ծննդաբերության օրը մոտենում է, իսկ ապագա մայրիկը չի կարողանում կառավարել անհանգիստ մտքերը: Սովորաբար մտահոգվում կամ վախենում են հատկապես առաջին անգամ ծննդաբերել պատրաստվող մայրիկները: Իսկ մյուսների մտահոգությունն այլ է. «եթե առաջին ծննդաբերությունը հեշտ է ընթացել, ապա հաջորդը հավանաբար ծանր կընթանա», կամ՝ «եթե առաջինը ծանր էր ընթացել, հաջորդի դեպքում նույնը կլինի»:

Ծննդաբերությունը մի փոքր ոգևորություն է, մի փոքր հակակրանք, և մի փոքր էլ վախ անծանոթ ու անորոշ իրավիճակի հանդեպ: Սա լինում է նույնիսկ ամենահանգիստ կանանց դեպքում: Նման վախերից ազատվելու համար կօգնի իրավիճակը նախապես պատկերացնելը։

Եթե բժշկի հետ կիսում եք միևնույն կարծիքն ու մտքերը ծննդաբերության հետ կապված, ապա սա կօգնի ավելի հանգիստ լինել: Տարբեր կանանց մտահոգում են տարբեր հարցեր, իսկ ընդհանուր առմամբ նրանց անհանգստացնում է ցավի հանդեպ վախը, էպիդուրալ անզգայացման վախը, կեսարյան հատման վախը, վախ, որ չեն հասցնի ծննդատուն դիմել կամ որ բժիշկը տեղում չի լինի և այլն:

Վախ ցավի հանդեպ

Բնական է, որ ցանկացած կին այս կամ այն չափ վախենում է ծննդաբերական ցավից: Եթե զգում եք, որ չեք կարողանում հաղթահարել այս վախը, ապա լավ կլինի նախքան ծննդաբերությունը ձեր բժշկի հետ խոսեք ցավազրկման տարբերակների մասին: Թեև մայրիկներն անհանգստանում են պտղի վրա դեղորայքի ազդեցության համար, այնուամենայնիվ ներկայումս կիրառվող էպիդուրալ անզգայացման մեթոդն անվնաս է: Պետք է հիշել, որ ծննդաբերությունը ոչ ավելի քան անհարմարութուն է առաջացնում, բոլորը չեն պարտադիր կերպով «տանջանքների» ենթարկվում:

Եթե նույնիսկ անզգայացման մասին միտքը հանգստացնում է, այնուամենայնիվ կանանց վախեցնում է նաև էպիդուրալ անզգայացում ստանալը: Բժիշկները նշում են, որ էպիդուրալը շատ հազվադեպ է բարդություններ առաջացնում, իսկ այն ստանալու ընթացքից վախենալ պետք չէ:

Կարդացեք՝ էպիդուրալ անզգայացում. հաճախակի տրվող հարցեր:

Չպլանավորված կեսարյան հատում

Չպլանավորված կեսարյան հատման դիմելու հավանականությունը շատ քիչ է, սակայն ծննդաբերության ընթացքն անկանխատեսելի է, և հնարավոր է ստիպված լինեք դիմել ծննդալուծման վիրահատական տարբերակին: Հիմնական պատճառը պտղի խոշոր չափերն են (մայրիկի կոնքերի չափի հետ համեմատած), պտղի հետույքային առաջադրումը, արգանդի պարանոցի ոչ բավարար բացվածքը, պտղի թթվածնաքաղցը և այլն: Եթե նման իրավիճակներ են ի հայտ եկել, ապա պարզապես անհրաժեշտ է վստահել բժիշկներին: Հիշեք, որ եթե իրավիճակը թույլ չի տալիս, ապա հեշտոցային ծննդաբերության դիմելուց երբեմն բարդությունների առաջացման վտանգներն ավելի շատ են, քան կեսարյան հատման վտանգները:

Կանանց նաև անհանգստացնում է այն, որ նրանք կարող են չհասնել ծննդատուն մինչ երեխայի ծնունդը: Իրականում ծննդաբերական գործընթացը երկարատև է, հատկապես առաջին երեխայի դեպքում, այնպես որ այս իրավիճակը գրեթե անհավանական է: Անհրաժեշտ է ուշադիր լինել օրգանիզմի ուղարկած ազդակներին ու նշաններին: Եթե կծկումները կանոնավոր են դառնում, դա արդեն ծննդաբերական գործընթացի սկսման հստակ նախանշան է:

Կարդացեք՝ Ծննդաբերության նախանշանները:

Ընդհանուր առմամբ, եթե կենտրոնանաք այն բանի վրա, որ շուտով ձեր փոքրիկը լույս աշխարհ է գալու, որ վերջապես գրկելու եք այդքան սպասված հրաշքին, ապա ցանկացած վախ կանհետանա և ծննդաբերությունը հաջող կընթանա: