Ինչպե՞ս է սկսվում ծննդաբերությունը

Ինչպե՞ս է սկսվում ծննդաբերությունը

Ծննդաբերությունը հաճախ սկսվում է կծկանքներից: Այդ արգանդի կանոնավոր կծկանքն է, ինչի շնորհիվ բացվում է արգանդի պարանոցը: Կինն այդ ժամանակ զգում է որովայնի պրկում, այնպիսի զգացում է, կարծես կծիկ է դառնում: Կծկանքը վայրկյաններ է տևում, այնուհետև արգանդը թուլանում է: Առաջին կծկանքները կարող են մինչև իսկ աննկատ մնալ այն պատճառով, որ ցավերով չեն ուղեկցվում կամ նվազ ցավոտ են:

Ծննդաբերության գործընթացի կանոնավոր զարգացման հետ կծկանքները սաստկանում են՝ ուղեկցվելով որովայնի ստորին հատվածների կամ գոտկաշրջանի ձգող բնույթի ցավով: Կծկանքն ավարտվելուն պես ցավն ամբողջովին վերանում է: Սկզբում այն մեղմ է, ընդմիջվում է 10-12 րոպե տևողությամբ: Աստիճանաբար կծկանքները հաճախանում են, սաստկանում, դառնում ավելի տևական, ուժգին, կրկնվում ամեն 3-5 րոպեն մեկ:

Պատահում է, որ կծկանքներն ի սկզբանե սկսվում են՝ կրկնվելով յուրաքանչյուր 5-6 րոպեն մեկ, թեև ոչ այնքան սաստիկ՝ հետագայում ուժգնանալու միտումով: Երբեմն կծկանքները հազվադեպ են լինում (20-30 րոպեն մեկ) կամ անկանոն: Դրանք ոչ թե ծննդաբերական կծկանքներ են, այլ ծննդաբերության նախանշաններ, որոնք ծննդաբերական ուղիները նախապատրաստում են ծննդաբերությանը: Եթե այդ ցավը ձեզ չի հոգնեցնում, կարող եք սպասել, չշտապել դեպի ծննդատուն: Հնարավոր է, որ այդ ամենը շուտով դադարի: Ավելի լավ է գնալ ծննդատուն, երբ կծկանքներն հաճախակիանում են՝ դառնալով 7-8 րոպեն մեկ:

Ամեն դեպքում տանն ավելի լավ է, սակայն եթե շատ հուզված եք և ինքնուրույն չեք կարողանում հաղթահարել ապրումները, ապա ավելի լավ է դիմել այն բժշկին, ով պետք է վարի ծննդաբերությունը: Նախածննդյան կծկանքները կարող են բավականաչափ երկար տևել (մեկ օր և ավելի), ցավոտ լինել ու հոգնեցնող՝ խանգարելով ծննդաբերության բնականոն ընթացքին:

Նման վիճակը մանկաբարձության մեջ կոչվում է ախտաբանական նախապատրաստական փուլ, այն պահանջում է մանկաբարձի խորհրդատվություն և համապատասխան բուժում: Ծննդաբերության սկզբի մեկ այլ տարբերակ է հարպտղային ջրերի վաղաժամ արտահոսքն ամբողջովին կամ փոքր չափաբաժիններով (դա կարող է դիտվել ծննդաբերության բոլոր դեպքերի 15%-ում):

Այդ ժամանակ արդեն հարկավոր չէ սպասել կծկանքների սկսվելուն, այլ անհապաղ պետք է ծննդատուն գնալ, որպեսզի բժիշկը հնարավորություն ունենա գնահատելու ծննդաբերական ուղիների և պտղի վիճակը, ինչպես նաև ծննդաբերությունը վարելու ճիշտ պլան մշակի:

Հաճախ պտղաջուրն անգույն է՝ սպիտակ, փոքրիկ փաթիլավորմամբ: Անհամեմատ հազվադեպ գույնը կանաչ կամ դեղին է լինում, ինչը չի կարելի բնականոն երևույթ համարել: Ըստ էության՝ դա պտղի ներարգանդային տառապանքի (թթվածնաքաղցի) վկայությունն է և ահազանգ, որպեսզի ծննդաբերության ընթացքում պտղի վիճակն ավելի ուշադրությամբ հսկվի: Մեծամասամբ արտահոսող ջրի քանակը բավականաչափ շատ է (մոտ 250-300 մլ), այսինքն՝ անհնար է այն չնկատել:

Եթե այդ պահին պառկած էիք, ապա անկողնու սպիտակեղենին մեծ բիծ կգոյանա, իսկ եթե կանգնած էիք, ապա հատակին փոքրիկ լճակ կառաջանա: Երբեմն պտղաջուրն արտահոսում է փոքր բաժիններով, ուստի մինչև իսկ դժվար է հասկանալ՝ ջո՞ւր է, թե՞ սովորական արտադրություն:

Հարկ է նշել, որ հղիության վերջում լորձային արտադրությունը որոշակիորեն ավելանում է և ջրիկանում: Արտադրության համար հատկանշական է այն, որ հոսում է առավոտյան, իսկ առաջիկա մի քանի ժամվա ընթացքում այլևս չի դիտվում: Սակայն երբ պտղաջուրն սկսում է հոսել, այլևս չի դադարում, այսինքն՝ միջադիրները կամ ներքնազգեստը մշտապես ներծծվում են (գուցե և քիչ քանակությամբ) հեղուկով: Եթե չեք կարողանում հերքել պտղաջրի արտահոսքը, ապա ճիշտ կանեք ներկայանալ ծննդատան բժշկին, ով ստույգ կորոշի՝ պտղաջո՞ւրն է արտահոսում, թե՞ պարզապես արտադրությունն է շատացել:

Գոյություն ունեն առաջիկա ծննդաբերությունը կանխորոշող նախանշաններ, որոնք վկայում են ծննդաբերությանը պատրաստ լինելու մասին: Այդ նշաններն են՝

  • «որովայնի իջեցումը» փոքր կոնքամուտքում պտղի գլխիկի ներդրման և արգանդի ստորին հատվածի ձգման հաշվին, երբ արգանդի վերևի մասն այդ ժամանակ փոքր-ինչ առաջ է հակվում՝ թեթևացնելով շնչառությունը,
  • պորտի արտափքումը,
  • պտղի շարժի նվազումը,
  • որովայնի ստորին մասերում և գոտկաշրջանում ձգող բնույթի, երբեմն նքոցանման ցավը,
  • մարմնի զանգվածի անկումը երբեմն 1-2 կգ-ով,
  • լորձային խցանի արտանկումը:

Լորձային խցանի արտանկումը ամենևին էլ ծննդաբերության սկզբի անվերապահ վկայություն չէ: Լորձային խցանը թանձր, թափանցիկ, քիչ դեղնավուն լորձի տեսք ունի՝ հաճախ արյան խառնուրդով: Չարժե դրանից վախենալ և փութով ծննդատուն շտապել: Լորձային խցանը կարող է ընկնել ծննդաբերությունից 1-2 շաբաթ առաջ, իսկ երբեմն այն արտանկում է արդեն ծննդաբերությունն սկսվելուց հետո:

Անհապաղ պետք է ծննդատուն գնալ այն դեպքում, երբ սեռական ուղիներից արյունային արտադրություն է դիտվում: Դա կարող է լուրջ բարդությունների հանգեցնել և բժշկական զննում ու հսկողություն է պահանջում:

Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար