Մազահեռացումը հղիության ընթացքում
51891
Ներկայում հասանելի են մազահեռացման տարբեր եղանակներ, որոնք լայնորեն կիրառվում են: Դրանց արդյունավետությունը տարբեր է, արդյունքը՝ երկարաժամկետ և կարճաժամկետ: Մազահեռացման մեթոդների վտանգների մասին տեղեկությունները քիչ են և հղիության ընթացքում անհրաժեշտ է հատկապես ուշադիր լինել:
Ասեղային և լազերային էպիլյացիաները սովորաբար արդյունավետ են որպես մազահեռացման երկարաժամկետ մեթոդ: Դրանք ենթադրում են էլեկտրական թույլ հոսանք կամ լազեր, որպեսզի մազի ֆոլիկուլի զարգացումը դադարի: Թեև ոչ մի հետազոտության արդյունքում նշված չէ դրանց հակացուցումը հղիության ընթացքում, այնուամենայնիվ խորհուրդ չի տրվում ռիսկի դիմել: Հղիության ընթացքում ավելորդ մազերի աճը դադարում է ծննդաբերությունից հետո, և 6 ամսվա ընթացքում դրանք սովորաբար վերանում են: Այնպես որ խորհուրդ չի տրվում կիրառել այս մեթոդները:
Մեղրամոմով մազահեռացումը վտանգավոր չէ, սակայն եթե հաշվի առնենք, որ հղիության ընթացքում մեծանում է արյան ընդհանուր ծավալը, այսինքն՝ ավելի շատ արյուն է մատակարարվում մաշկին, այն դառնում է ավելի զգայուն: Ցավը մեղմելու համար կարելի է օգտագործել հակասեպտիկ լոսյոն նախքան մազահեռացումը: Դա կօգնի խուսափել նաև բորբոքումից, կնվազեցնի կարմրությունը:
Քիմիական նյութերով (դեպիլյատոր) մազահեռացումը չի թույլատրվում հղիության ընթացքում: Դրանք հնարավոր է ներթափանցեն օրգանիզմ մաշկի միջոցով և առաջացնեն բորբոքում կամ ալերգիկ ռեակցիաներ, իսկ դա վտանգավոր է այս շրջանում:
Նույն բանը կարելի է ասել մազերի գունաթափման մեթոդի մասին: Դրա դեպքում նյութը կիրառվում է անմիջապես մաշկի վրա և նույնպես վտանգ կա, որ այն կներթափանցի մաշկի մեջ և բարենպաստ ազդեցություն չի ունենա:
Ինչ վերաբերվում է սափրելու մեթոդին, ապա այն հակացուցում չունի, պարզապես այն երկարաժամկետ արդյունք չի տալիս: Մեծացող որովայնը մի փոքր կդժվարացնի սափրելու գործընթացը, բայց այն ամենահասանելի և տարածված միջոցն է: Մաշկի չորությունից խուսափելու համար խորհուրդ է տրվում օգտագործել վիտամին E-ով հարուստ խոնավացնող քսուքներ:
