Վերարտադրողական օժանդակ տեխնոլոգիաներ

Երբ չի ստացվում հղիանալ բնական ճանապարհով, զույգը կանգնում է երկընտրանքի առջև՝ կամ երեխա որդեգրել, կամ էլ դիմել վերարտադրողական օժանդակ տեխնոլոգիաների օգնությանը: Եթե ձեր առջև հստակ նպատակ եք դրել, որպեսզի ունենաք գենետիկորեն ձեր երեխային, ապա պետք է պատրաստվեք վերջին տարբերակին՝ «անոթում բեղմնավորմանը»:

Անոթում առաջին բեղմանվորումը կատարվել է 1977 թվականին, այսինքն ավելի քան 35 տարի առաջ: Ձևավորվեց բժշկության մի նոր ճյուղ՝ վերարտադրողական բժշկություն, և բժիշկների նոր մասնագիտացում՝ սաղմնաբան-վերարտադրողաբան (ռեպրոդուկտոլոգ):

Վերարտադրողական օժանդակ տեխնոլոգիաների կիրառման դեպքում բեղմնավորման հնարավորությունը մեկ ցիկլում մոտ 20% է: Ընդհանուր առմամբ անպտուղ զույգերի 40 %-ի բուժումը, անկախ փորձերի քանակից, ավարտվում է ցանկալի հղիությամբ:

«Անոթում բեղմնավորման» ամենատարածված մեթոդը կոչվում է արտամարմնային բեղմնավորում՝ ԱՄԲ (ЭКО): Այս մեթոդի կիրառման դեպքում կնոջ ձվարաններից վերցվում են հասուն ձվաբջիջներ, իսկ ամուսնուց՝ սերմնաբջիջներ: Լաբորատոր հատուկ պայմաններում, ավելի պատկերավոր ասած՝ անոթում, ձվաբջիջն ու սպերմատոզոիդները դրվում են միասին: Այն, ինչ կատարվում է այս պայմաններում, ոչնչով չի տարբերվում բնական բեղմնավորումից: Ամենակենսունակ սերմնաբջիջը ներթափանցում է ձվաբջջի մեջ և բեղմնավորում այն: Եթե բեղմնավորված ձվաբջիջն սկսում է կիսվել, ապա 3-5 օր անց այն տեղափոխվում է արգանդ: Այս ամենից հետո հղիությունը ոչնչով չի տարբերվում սովորական, բնական հղիությունից:

Հնարավորություններն ընդլայնող լրացուցիչ եղանակներ

Սերմնաբջջի ներցիտոպլազմատիկ ներարկում ձվաբջջի մեջ (ИКСИ). ընտրում ենք մեկին

Ձվաբջջի մեջ սերմնաբջջի ներցիտոպլազմատիկ ներարկման մեթոդը սովորաբար առաջարկվում է այն զույգերին, որոնց անպտղության պատճառը տղամարդու սերմնաբջջի վատ որակն է: Այն նման է ԱՄԲ-ին: Միակ տարբերությունն այն է, որ սերմնաբջիջներից նախապես ընտրվում է ամենակենսունակը և հատուկ ասեղով ներարկվում ուղիղ ձվաբջջի մեջ, այսինքն՝ բեղմնավորումը սկզբից մինչև վերջ կատարվում է լաբորատորիայում վերարտադողաբանի լիակատար վերահսկողությամբ:

Մորֆոլոգիապես նորմալ սերմնաբջջի ներցիտոպլազմատիկ ներարկում (ИМСИ). ընդլայնում ենք հնարավորությունները

Այս մեթոդի պարագայում ձվաբջջի մեջ ներարկումից առաջ լաբորատորիայում անցկացվում է սերմնաբջջի սկրինինգ՝ մանրադիտակի տակ, չափազանց խոշորացմամբ: Սա, ըստ էության, ձվաբջջի մեջ սերմնաբջջի ներցիտոպլազմատիկ ներարկման մեթոդի կատարելագործված տարբերակն է: Առաջին հերթին հաշվի է առնվում սերմնաբջջի մորֆոլոգիան և ճիշտ կառուցվածքը:

Սերմնաբջջի ֆիզիոլոգիական ներցիտոպլազմատիկ ներարկում (пИКСИ). ընտրում ենք հասունին

Մեթոդը գործնականորեն չի տարբերվում իկսիից և կարող է կիրառվել իմսիի հետ համատեղ: Այս մեթոդի դեպքում լրացուցիչ ստուգվում է ընտրված սերմնաբջջի հասունությունը: Բեղմնավորումից առաջ սերմնաբջիջները լցվում են հիալուրոնային թթվով անոթի մեջ: Ենթադրվում է, որ թթվի հետ փոխազդող սերմնաբջիջները ԴՆԹ-ի ավելի քիչ խանգարումներ ունեն, մորֆոլոգիայի՝ կառուցվածքի առումով օպտիմալն են և հասունը: Սերմնաբջջի հասունությունն անհնար է որոշել դիտելով, անգամ բազմակի խոշորացման դեպքում:

Նախաիմպլանտացիոն ախտորոշում (ПИД). նախնական ստուգում

Սա անոթում արդեն իսկ բեղմնավորված և կիսվել սկսած ձվաբջջի լրացուցիչ հետազոտությունն է: Արգանդ տեղափոխելուց առաջ կտրվում է ձվաբջջի մի մասը, որի հիման վրա կատարվում է ապագա երեխայի գենետիկական հետազոտություն: Այս մեթոդը ցուցված է առաջին հերթին այն զույգերին, ում սպառնում է գենետիկական արատով երեխա լույս աշխարհ բերելու վտանգ: Այն հաճախ առաջարկում են նաև այն կանանց, ում տարիքը բարձր է, որպեսզի վերացնեն օրինակ Դաունի համախտանիշով երեխայի ծննդյան վտանգը: Պետք է նշել, որ այս մեթոդը, ելնելով բարոյական նկատառումներից, արգելված է բազմաթիվ երկրներում:

Վերարտադրողական որ մեթոդն է ամենալավը

Եթե բժշկի ընտրության հարցում ձեր բախտը բերել է, ապա նա ինքը ձեզ խորհուրդ կտա, թե կոնկրետ ձեր պարագայում որն է լավագույնը: Այդ ամենով հանդերձ, այն, թե ինչ մեթոդ է ընտրել ձեր բժիշկը, ոչ մի դեր չի խաղում միջամտության անցկացման պլանում: Վերոնշյալ բոլոր մեթոդներն իրականացվում են լաբորատորիայում, փակ դռների հետևում և այցելուն ինքը չի կարող ազդել դրանց վրա:

Բժշկի պրոֆեսիոնալիզմ, նրա նկատմամբ վստահություն, հավատ և մի փոքր էլ հաջողություն՝ ահա այն 4 բաղադրիչները, որոնք միասին կտանեն դեպի երազանքի իրականացման: