Նախապատրաստում ուլտրաձայնային հետազոտությանը. մաս 2

04.04.20182336

Կարդացեք՝ Նախապատրաստում ուլտրաձայնային հետազոտությանը. մաս 1

 

Նախապատրաստում լյարդի և որովայնի խոռոչի այլ օրգանների (փայծաղ, լեղապարկ, ենթաստամոքսային գեղձ) ՈւՁՀ-ին

Այդ հարցում հիմնական խնդիրը աղիքներում գոյացած գազերից ազատվելն է։ Նշված օրգանների ՈւՁՀ-ից 3-4 օր առաջ հարկավոր է սննդից հանել գազագոյացմանը նպաստող մթերքները (բջջանյութով հարուստ հում բանջարեղեն, մրգեր, լոբեղեն, սև հաց, գազավորված ըմպելիքներ, թխվածքեղեն և այլն)։ ՈւՁՀ-ից առաջ արգելված է գաստրոսկոպիա և կոլոնոսկոպիա անելը։

Եթե երեխան տվյալ պահին դեղորայքային բուժում է ստանում, հարկավոր է այդ մասին տեղեկացնել բժշկին։ Որովայնի խոռոչի ՈւՁՀ-ն կատարվում է քաղցած վիճակում, այդ պատճառով վերջին անգամ սնվելը պետք է լինի հետազոտությունից 8-12 ժամ առաջ։

Ծծկեր երեխաների նախապատրաստումը լյարդի ՈւՁՀ-ին

Ծծկեր երեխաների դեպքում որովայնի խոռոչի ՈւՁՀ-ի հարցը հեշտանում է։ Հարկավոր է հետազոտույունը կատարել վերջին կերակրումից երեք ժամ անց, կաթնախառնուրդով կերակրելու դեպքում՝3.5 ժամ անց։

Նախապատրաստում երիկամների ՈւՁՀ-ին

Նորմալ քաշի դեպքում երիկամների ՈւՁՀ-ն նախապատրաստում չի պահանջում։ Ավելորդ քաշը և աղիքներում գազի առկայությունը դժվարացնում է ուլտրաձայնային ախտորոշումը և այդ դեպքերում նույնպիսի նախապատրաստում է պահանջվում, ինչ որովայնի խոռոչի ՈւՁՀ-ի դեպքում։

Նախապատրաստում մակերիկամների ՈւՁՀ-ին

Հետազոտությունից 3 օր առաջ նշանակվում է օրգանիզմը խարաններից ազատելու դիետա, որը բացառում է կենդանական ծագման մթերքների օգտագործումը։ Կարելի է լոբի, կարտոֆիլ, ձավարեղեն, բանջարեղեն, մրգեր, ընկուզեղեն, սև հաց, մակարոնեղեն, մեղր, չիր ուտել, խոտաբույսերով թեյ և բնական հյութեր խմել։ Մակերիկամների ՈւՁՀ-ն կատարվում է քաղցած ժամանակ։

Ծծկեր երեխաներին հարկավոր է հետազոտության տանել վերջին կերակրումից 3-3.5 ժամ անց։

Նախապատրաստում միզապարկի ՈւՁՀ-ին

Միզապարկի ՈւՁՀ-ն կատարվում է լիքը միզապարկի դեպքում։ Խորհուրդ է տրվում հետազոտությունից 30-40ր առաջ երեխային 200-800մլ չգազավորված հեղուկ առաջարկել։ Այդ թվերը պայմանավորված են օրգանիզմի առանձնահատկություններով։ Եթե երեխան դժվարանում է անմիջապես մեծ քանակությամբ հեղուկ խմել, ապա առաջարկեք նրան սկսել 1-1.5 ժամ առաջ։

Ծծկեր երեխաների դեպքում պրոցեդուրան հեշտանում է։ Հարկավոր է նրան կերակրել պրոցեդուրայից 15-20ր առաջ։

Կարդացեք՝ Նախապատրաստում ուլտրաձայնային հետազոտությանը. մաս 3