Երջանկության րոպեներին մարդիկ հաճախ շատ նուրբ պահեր չեն նկատում, իսկ լուսանկարիչն ակամայից տեսնում է ամենասիրունն ու հուզիչը՝ հմտորեն որսալով անկրկնելի ակնթարթները: Այս տպավորիչ, բնական ապրումներով լի լուսանկարների հեղինակն Արման Կարախանյանն է։

Արմանն սկսել է լուսանկարչությամբ զբաղվել 2005 թվականից, երբ ընկերն ԱՄՆ-ից բերել է նրա առաջին թվային խցիկը, և դրան հաջորդել է այդ նույն ընկերոջ հարսանիքը։   

Խոսելով լուսանկարչության և իր զգացումների մասին՝ Արմանն ասում է․ «Լուսանկարչությունը փորձ է ներկայացնելու, թե ինչպես ես տեսնում քեզ շրջապատող մարդկանց, հասարակությունը, քաղաքը, երկիրը։ Այն նաև յուրովի միկրոպատմագրություն է․ երբեմն մեկ լուսանկարն ավելին է պատմում, քան տասնյակ գրված էջերը։

Հարսանեկան լուսանկարչությունն իրականում ծանր և պատասխանատու աշխատանք է, քանի որ կան պահեր, որ տևում են վայրկյաններ, օրինակ՝ մատանիները փոխանակելը․ երբեք չես կարող խնդրել, որ կրկնեն։ Միևնույն ժամանակ ականատես ես լինում մարդկանց թերևս ամենաերջանիկ ու ամենանշանակալի օրվան, որը շատ հաճախ հուզում և ուրախությամբ է համակում նաև քեզ»։ 

Աղբյուրը՝ Arman Karakhanyan