Հիմենապլաստիկա՝ կուսաթաղանթի վերականգնում

Երբեմն սեռական կյանքով ապրող աղջիկները ցանկություն են ունենում վերականգնել իրենց կուսությունը: Հաճախ դա արվում է՝ ելնելով կրոնական նկատառումներից, կամ երբ աղջիկը պարզապես ցանկանում է գոհացնել իր տղամարդուն և այլն: Նման դեպքերում կիրառվում է պլաստիկ վիրահատության համապատասխան մեթոդը՝ հիմենապլաստիկան:

Ի՞նչ է հիմենապլաստիկան

Կանայք սխալմամաբ ենթադրում են, որ այս վիրահատության էությունը կուսաթաղանթի վերականգնումն է: Իրականում կուսաթաղանթը բառի բուն իմաստով վերականգնել հնարավոր չէ, քանի որ դա կնշանակեր ստեղծել հատուկ բարակ լորձաթաղանթ, որը կփակեր հեշտոցի մուտքը: Բժիշկները ստեղծում են արհեստական կուսաթաղանթ՝ թաղանթի ծայրերը կարելով հատուկ բարակ թելի միջոցով: Կարևոր է հիշել, որ արդյունքները երկար չեն պահպանվում, քանի որ երբ կարերը ներծծվում են, թաղանթը կրկին պատռվում է: Դա տեղի է ունենում միջամտությունից 7 օր հետո: Եթե ցանկանում եք ավելի երկար պահպանել արդյունքը, անհրաժեշտ կլինի կատարել երկարաժամկետ հիմենապլաստիկա:

Կուսաթաղանթի արհեստական վերականգնումը թույլ է տալիս սեռական հարաբերության ժամանակ ստեղծել աղջկա անմեղության պատրանք: Դա նշանակում է, որ տղամարդը կզգա թաղանթի առկայությունը, այսինքն՝ խոչընդոտ, և կնկատի փոքր քանակությամբ արյուն: Հիմենապլաստիկայից առաջ պահանջվում է գինեկոլոգիական զննում և որոշ հետազոտություների անցկացում (ընդհանուր քսուք, մեզի ընդհանուր հետազոտություն, արյան մակարդելիության և վարակների ստուգման հետազոտություններ և այլն)։

Կարճաժամկետ հիմենապլաստիկա

Եթե ձեզ հարկավոր է ամենապարզ տարբերակը, ընտրեք կարճաժամկետ հիմենապլաստիկան: Միջամտությունը տևում է գրեթե 20-30 րոպե և թույլ է տալիս վերականգնել կուսությունը մի քանի օրով: պահպանվում է առավելագույնը 7 օր, քանի որ դրանից հետո թելերը ներծծվում են և արդյունավետությունը կորչում է։

Հիշե՛ք, որ չի կարելի անվերջ կարել կուսաթաղանթը: Մի քանի վիրահատական միջամտությունից հետո հյուսվածքի մնացորդներն անհետանում են և այդ պարագայում արդեն անհնար է դառնում կուսաթաղանթի վերականգնումը:

Միջամտության հաջորդ 2-3 օրերի ընթացքում կինը կարող է և ձգող ցավեր ու անհարմարություն զգալ, որոնք ինքնուրույն անհետանում են: Սեռական ակտից հետո խորհուրդ է տրվում դիմել բժշկի և զննում անցնել, որպեսզի համոզվեք, որ ոչ մի բարդություն չի առաջացել:

Երկարաժամկետ հիմենապլաստիկա. առավելություններն ու թերությունները

Եթե ցանկանում եք երկարաժամկետ արդյունքի հասնել, ապա պետք է ընտրել երկարաժամկետ հիմենապլաստիկան: Այս մեթոդի առավելությունն այն է, որ դրա միջոցով կուսաթաղանթը կարելի է վերականգնել բազմակի անգամներ, չնայած որ խորհուրդ չի տրվում: Վիրահատությունը կատարվում է դաշտանային ցիկլից առաջ կամ 4-5 օր հետո, ներերակային կամ տեղային անզգայացման ներքո: Քանի որ խոսքը հեշտոցի որոշակի հատվածի մասնահատման (պատռված կուսաթաղանթի եզրերով) և թաղանթը շերտով կարելու մասին է, այս դեպում կուսաթաղանթի ամբողջական վերականգնումը պահպանվում է ոչ թե մի քանի օր, ինչպես կարճաժամկետ հիմենապլաստիկայի դեպքում էր, այլ անժամկետ:

Միջինում ապաքինումը պահանջում է 4-5 շաբաթ: Պետք է հաշվի առնել այս միջամտության ևս մի առանձնահատկություն՝ այն, որ այս միջոցով վերականգնված կուսաթաղանթից զրկվելու ժամանակ (սեռական ակտի ընթացքում) կարող է բնականից ավելի շատ արյուն նկատվել, չնայած դա պարտադիր չէ: Նույնիսկ հնարավոր է ցավն ավելի ուժգին լինի: Բայց դա շատ անհատական է:

Երկարաժամկետ հիմենապլատիկան բավականին լուրջ վիրահատություն է, որը կարող է հանգեցնել բարդությունների, եթե խստորեն չհետևեք բժշկի ցուցումներին: Միջամտության հաջորդ առաջին օրերին չի թույլատրվում լոգանք ընդունել, սաունա հաճախել, սպորտով զբաղվել, ծանրություն բարձրացնել, հարաբերություն ունենալ: Չի կարելի վիրախցուկ՝ տամպոն, օգտագործել նախքան առաջին հարաբերությունը: Ավելին, դուք ստիպված եք լինելու ՝

• կանոնավոր կերպով արտաքին լվացումներ կատարել հատուկ դեղամիջոցներով,
• պահպանել հատուկ սննդակարգ,
• հրաժարվել ցանկացած տեսակի կոշտ սննդից,
• խստորեն պահպանել հիգիենայի կանոնները:

Առաջին սեռական ակտը պետք է տեղի ունենա վիրահատությունից 4-5 շաբաթ անց, երբ վիրահատական վերքը (կուսաթաղանթը) ապաքինված կլինի: Պետք է հաշվի առնել նաև այն, որ ստիպված եք լինելու զննման համար պարբերաբար այցելել բժշկի: Բարդությունների ի հայտ գալու դեպքում ոչ մի կերպ չի կարելի հետաձգել բժշկի այցը:

Հակացուցումները և հետվիրահատական շրջանը

Հիմենապլաստիկան ցուցվում է միայն մեկ դեպքում՝ երբ առկա է կնոջ ցանկությունը, ով ուզում է վերականգնել իր կուսությունը: Հակացուցումները շատ չեն: Դրանց շարքին են պատկանում՝

• սուր փուլում գտնվող ցանկացած բնույթի վարակային հիվանդություն,
• սեռական օրգանների բորբոքային պրոցեսներ,
• հոգեկան հիվանդություններ և այլն:

Հիմենապլաստիկան ամենաբարդ վիրահատություններից չէ, սակայն նույնիսկ փորձառու բժշկի վիրահատությունից հետո կարող են առաջանալ բարդություններ: Դասական կողմնակի ազդեցություններն են՝ սեռական օրգանների շրջանում հեմատոմաների, այտուցների և թմրածության առաջացումը, անհարմարության զգացումը, տարբեր ուժգնության ցավերը, արյունահոսությունը: Նման ախտանշաններից հնարավորինս շտապ ազատվելու համար ահրաժեշտ է խստորեն հետևել բժշկի ցուցումներին և կանոնավոր կերպով կատարել հետվիրահատական ստուգումներ:

Բարդությունների առաջացման պարագայում հնարավորինս շտապ պետք է դիմել բժշկի։ Նա կօգնի հնարավորին չափ կարճ ժամկետում լուծել խնդիրը և զերծ մնալ առողջությանը սպառնացող հնարավոր վտանգներից:

Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին , Յութուբյան ալիքին