Ինչպես պետք է սնվեն հիսունն անց կանայք. 5 խորհուրդ
18116
Ի՞նչն է փոխվել
Դաշտանադադարի շրջանում կինն ավելի արագ է գիրանում, քանի որ մկանային զանգվածն սկսում է փոխարինվել ճարպային հյուսվածքով: Սա պայմանավորված է նյութափոխանակության դանդաղեցմամբ, ինչի արդյունքում սննդի ածխաջրերի և ճարպերի մնացորդներն անխուսափելիորեն պահուստավորվում են որպես ճարպային հյուսվածք:
Հորմոնային փոփոխությունները կարող են հանգեցնել մի շարք նոր ախտանշանների և զգացողությունների (ջերմային առհոսք, գիշերային քրտնարտադրություն, գլխացավ և այլն), ինչպես նաև մեծացնել սրտի հիվանդությունների առաջացման վտանգը և նպաստել անոթային ճնշման բարձրացմանը:
Կլիմաքսի ժամանակ արյան մեջ էստրոգենների մակարդակի անկումը մեծացնում է օստեոպորոզի առաջացման վտանգը: Բացի այդ ստամոքսահյութի ցածր թթվայնությունը նվազեցնում է օգտակար սննդանյութերի յուրացման արագությունը:
Հաշվի առնելով վերոնշյալը՝ ակնհայտ է դառնում, որ 50 տարեկանից հետո կինը պետք է հատուկ ուշադրություն դարձնի իր սննդակարգին: Այսպիսի «դիետայի» հիմնական նպատակը բնականոն քաշի և սրտի ու ոսկորների առողջության պահպանումն է:
Ավելի շատ վիտամին B12
Վիտամին B12-ը շատ կարևոր է նյարդային համակարգի համար: Առանց այս վիտամինի անհնար է ԴՆԹ-ի բնականոն ձևավորումը, իսկ դա նշանակում է, որ այդ պարագայում անհնար է նաև վնասված բջիջների վերականգնումը: Սովորաբար վիտամին В12-ը սննդից առանձնացվում է թթու ստամոքսահյութի ազդեցությամբ, սակայն տարիքին համընթաց ստամոքսահյութի թթվայնությունը պակասում է, ինչը դժվարացնում է վիտամին В12-ի ներծծումը: Փորձեք սննդում ավելի շատ օգտագործել ձկան և մսի անյուղ տեսակները:
Աղի քիչ քանակություն, ավելի շատ բջջանյութ
Տարիքին համընթաց անոթային հիպերտենզիայի զարգացման վտանգը մեծանում է: Բարձր ճնշումը մեծացնում է սրտի կաթվածի, ինսուլտի, սրտի անբավարարության և անգամ հանկարծակի մահվան վտանգը: Անոթային հիպերտենզիայի և նրա հետևանքների վտանգը նվազեցնելու նպատակով հարկավոր է նվազեցնել աղի քանակը, ինչպես նաև ազատվել ավելորդ քաշից:
Բժիշկները խորհուրդ են տալիս օրվա ընթացքում օգտագործել առավելագույնը 1.5 գր աղ, ինչը հավասար է թեյի գդալի կեսին: Ուշադրություն դարձրեք այն հանգամանքին, որ աղն ամենամեծ քանակով պարունակվում է պատրաստի սննդամթերքներում՝ չիփսում, պահածոյացված, սառեցված ուտեստներում և այլն: Փորձեք ինքներդ ձեզ համար ուտելիքներ պատրաստել, որպեսզի վերահսկեք աղի քանակը:
Բջջանյութը սննդի կարևոր բաղադրիչներից է: Այն բարելավում է մարսողությունը, ինչպես նաև թույլ տալիս արագ հագենալ, իսկ դա նշանակում է ավելի քիչ ուտել: Մեծ քանակությամբ բջջանյութ են պարունակում նուշը, կանաչ ոլոռը, ամբողջական ցորենից պատրաստված հացը, շագանակագույն բրինձը, կաղամբը և այլն: Բջջանյութը հնարավոր է ընդունել նաև հաբերի տեսքով:
Ո՛չ երկաթի հավելումներին
Կանանց մեծամասնությունը 50 տարեկանում արդեն իսկ թևակոխել է դաշտանադադարի շրջան: Դա նշանակում է, որ ամիսը մի քանի օր այլևս արյուն չեն կորցնում: Այդ հանգամանքով պայմանավորված՝ օրգանիզմում երկաթի պահանջը նվազում է մինչև օրական 8մգ (նախքան դաշտանադադարը՝ 18մգ):
Եթե մուլտիվիտամինային հավելանյութեր եք օգտագործում, ապա ստուգեք բաղադրությունը. դրանք չպետք է երկաթ պարունակեն: Ձեզ անհրաժեշտ երկաթի քանակությունն այժմ ստանում եք սննդի միջոցով, իսկ այդ տարրի ավելցուկն օրգանիզմում կարող է կործանարար ազդեցություն ունենալ լյարդի, սրտի և այլ օրգանների վրա:
Վիտամինային հավելումներ կարելի է ընդունել միայն անհրաժեշտության դեպքում և միայն բժշկի նշանակմամբ:
Ավելի շատ կալցիում և վիտամին D
Ձեր ոսկորների առողջությունը չպետք է երկրորդական դառնա: Վերջիններիս կոտրման վտանգը մեծանում է հիսունն անց կանանց շրջանում: Եթե դաշտանադադարի փուլում եք և փոխարինիչ հորմոնային թերապիա եք անցնում, ապա պետք է օրական 1500մգ կալցիում ստանաք: Օստեոպորոզի մասին կարող եք կարդալ այստեղ:
Միջերկրածովյան դիետա
Ուսումնասիրելով երկարակյաց մարդկանց (100 տարեկանից ավել)՝ գիտնականները նկատել են, որ նրանցից շատերն ապրել են միջերկրածովյան երկրներում և սնվել միջերկրածովյան դիետային համապատասխան: Այդ դիետան ոչ թե սնվելու խիստ սահմանափակումներ և կանոններ է ենթադրում, այլ մի շարք սկզբունքներ և հատուկ վերաբերմունք ավանդական սննդի հանդեպ: Այն զգալիորեն նվազեցնում է սրտանոթային և օնկոլոգիական հիվանդությունների առաջացման վտանգը, ինչպես նաև նպաստում է երկարակեցությանը:
Սննդաբանության տեսանկյունից դժվար է այս դիետան առողջ համարել, քանի որ այն ներառում է և՛ ճարպոտ միս (խոզի, գառան, տավարի), և՛ կարմիր գինի, և՛ մեծաքանակ համեմունքներ, սակայն այնուամենայնիվ բոլոր այդ մթերքները հավասարակշռված են և հաճախ չեն օգտագործվում կամ էլ օգտագործվում են քիչ քանակությամբ:
Միջերկրածովյան դիետայի հիմնական բաղադրիչներն են՝ ձիթապտուղ և ձիթապտղի յուղ, թարմ մրգեր և բանջարեղեն, ծովամթերք, միս, ամբողջական ցորենից հաց, բրինձ, մակարոնեղեն և այլն:
Ամենևին էլ պարտադիր չէ ապրել Միջերկրական ծովի ափին, որպեսզի սնվեք այնտեղի երկարակյացների նման: Նշված մթերքներից գրեթե բոլորը հնարավոր է գնել մեր սուպերմարկետներից:
