Ցավ միզարձակման ժամանակ

Ցավ միզարձակման ժամանակ

Միզարձակման ժամանակ առաջացող ցավը կարող է վկայել գինեկոլոգիական կամ ուրոլոգիական հիվանդության մասին։ Տհաճ զգացողությունները հիմնականում կրում են սուր բնույթ, երբեմն էլ շարունակվում են նաև միզապարկի դատարկվելուց հետո։ Ինչո՞ւ է ցավ առաջանում միզարձակման ընթացքում։ Առաջացող ցավի պատճառ կարող են հանդիսանալ մի շարք հիվանդություններ, որոնցից են`

• Միզաքարային հիվանդությունը (երիկամների, միզապարկի քարերի առաջացում)։ Երբ քարը իջնում է միզածորան, միզուկ, այն վնասում է լորձաթաղանթը՝ միզարձակման ընթացքում ցավ պատճառելով: Երբեմն մեզի հետ լինում է արյան խառնուրդ:

• Սեռական հերպեսը՝ օրգանների լորձաթաղանթի վիրուսային ախտահարման դրսևորումը։ Նախ, առաջանում է քոր, մաշկի կարմրություն, ապա ձևավորվում են բշտիկներ և խոցեր: Երբ դրանք պայթում են, հիվանդը ուժգին ցավ է զգում։

• Պիելոնեֆրիտը, որը գոտկատեղի հատվածում առաջացնում է ցավեր, որոնք ուղեկցվում են մարմնի ջերմաստիճանի բարձրացմամբ, պղտոր մեզի արձակմամբ և միզարձակության ընթացքում անհարմարության զգացողությամբ։

• Տրիխոմոնիազը, որը դրսևորվում է ուրետրիտի ձևով, տղամարդկանց մոտ՝ պրոստատիտի ձևով, իսկ կանանց մոտ՝ վագինիտի։ Վարակը 2 սեռերի ներկայացուցիչների մոտ էլ ախտահարում է միզածորանը։

• Քլամիդիոզը, որը հիմնականում փոխանցվում է սեռական ճանապարհով, ախտահարում է միզուղիները:

• Պրոստատիտը, որը բնութագրվում է բութ ցավերով, որոնք սրվում են միզարձակման ժամանակ։

• Գոնորեա հիվանդությունը, որը բնութագրվում է սուր ցավով, այրոցով և թարախային արտադրությամբ։

• Ցիստիտը, որը սովորաբար առաջացնում է հաճախակի և ցավոտ միզարձակումներ, այրոցի զգացում:

Մեզն ունենում է տհաճ, սուր հոտ, լինում է պղտոր կամ արյունային արտադրությամբ։ Այս դեպքում հնարավոր է ինքնազգացողության վատթարացում, մեջքի ստորին հատվածում մշտական ցավի առկայություն։ Ախտորոշումը Միայն բժիշկ-ուրոլոգն է իրավասու պարզելու ախտանիշների պատճառը և համապատասխան նշանակում անելու, քանի որ քաջատեղյակ է հիվանդության բոլոր նրբություններին։ Միզարձակման ընթացքում առաջացող ցանկացած ցավ կարող է տարբեր ախտաբանական գործընթացների ախտանիշ լինել, հետևաբար բուժումը պետք է ուղղված լինի այն հիվանդությանը, որն առաջացրել է այդ մի շարք զգացողությունները։

Ինչպե՞ս բուժել միզարձակման ընթացքում առաջացող ցավը։ Շատ կարևոր է այցի ժամանակ բժշկին հստակ և ճշգրիտ ցույց տալ հիմնական ցավի առաջացման վայրը, ինչը կնպաստի արագ և ճշգրիտ ախտորոշմանը։ Թերապևտիկ միջոցառումների, ինչպես նաև վիրաբուժական կամ կոնսերվատիվ բուժման մեթոդի ընտրությունը կախված կլինի ախտահարված օրգանից և հիվանդի վիճակի ծանրության աստիճանից:

Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին , Յութուբյան ալիքին