Սեռական հարաբերությունը պետք է լինի ոչ միայն ֆիզիոլոգիական, այլև հոգեբանական հարմարավետության գործընթաց։ Սակայն որոշ կանանց մոտ ներթափանցման փորձի ժամանակ հեշտոցի շրջակա մկանները ակամա կծկվում են՝ առաջացնելով ցավ, այրոց կամ նույնիսկ ներթափանցման լիակատար անհնարինություն։ Այս վիճակը կարող է բնորոշ լինել վագինիզմին։

Վագինիզմը կնոջ մեղքը չէ և «պարզապես վախ» չէ։ Այն իրական բժշկական խնդիր է, որի առաջացման մեջ կարող են դեր ունենալ ինչպես ֆիզիկական, այնպես էլ հոգեբանական և նյարդամկանային գործոններ։

Ի՞նչ է տեղի ունենում վագինիզմի դեպքում
Վագինիզմի ժամանակ հեշտոցի մուտքը շրջապատող կոնքի հատակի մկանները ակամա և հաճախ ցավոտ կծկվում են՝ ի պատասխան ներթափանցման փորձի։Կծկումը կարող է առաջանալ ոչ միայն սեռական հարաբերության, այլև տամպոն տեղադրելու կամ գինեկոլոգիական զննման ժամանակ։Որոշ կանանց մոտ ներթափանցումը հնարավոր է, բայց ուղեկցվում է արտահայտված ցավով, իսկ մյուսների մոտ այն կարող է լինել գրեթե կամ ամբողջությամբ անհնար։

Ինչո՞ւ է առաջանում վագինիզմը
Վագինիզմի պատճառը միշտ չէ, որ հնարավոր է մեկ գործոնով բացատրել։ Այն կարող է կապված լինել՝

• նախկին ցավոտ սեռական փորձի հետ,
• սեռական բռնության կամ տրավմատիկ փորձառության հետ,
• սեռական հարաբերության նկատմամբ ուժեղ վախի կամ անհանգստության հետ,
• մարմնի վերաբերյալ բացասական ընկալումների հետ,
• հարաբերություններում առկա հոգեբանական խնդիրների հետ։

Միաժամանակ անհրաժեշտ է բացառել նաև ֆիզիկական պատճառները՝ վուլվովագինիտը, հեշտոցային չորությունը, էնդոմետրիոզը, վուլվոդինիան և այլ վիճակներ, որոնք կարող են առաջացնել ցավ և նպաստել մկանների պաշտպանական կծկմանը։

Ինչպե՞ս է ախտորոշվում
Ախտորոշման հիմքում մանրամասն զրույցն ու գինեկոլոգիական գնահատումն են։ Բժիշկը փորձում է հասկանալ՝ երբ են սկսվել ախտանիշները, ինչ իրավիճակներում է առաջանում ցավը և արդյոք կան ուղեկցող գանգատներ։

Զննումը պետք է իրականացվի հնարավորինս նրբորեն և միայն կնոջ համաձայնությամբ։ Որոշ դեպքերում անհրաժեշտ է լրացուցիչ հետազոտություն՝ այլ գինեկոլոգիական պատճառները բացառելու համար։

Կարո՞ղ է վագինիզմը բուժվել
Այո՛։ Ճիշտ ախտորոշման և անհատականացված բուժման դեպքում վագինիզմի ախտանիշները կարող են զգալիորեն նվազել կամ ամբողջությամբ վերանալ։

Վագինիզմը լուծում չունեցող խնդիր չէ։ Ցավոտ կամ անհնար սեռական հարաբերությունը չպետք է ընդունել որպես «նորմա» կամ պարզապես համակերպվել դրա հետ։