Քթի արյունահոսություն 

Քթի արյունահոսությունը  արյան հոսքն  է քթից, որը տեղի է ունենում անոթային պատի վնասման դեպքում: Այս դեպքում արյունը կարմրագույն է և հոսում է կաթիլներով կամ շիթով: Արյան առատ հոսքը կարող է սպառնալ կյանքին: 

Կախված նրանից, թե որ հատվածն է վնասվել, առանձնացնում ենք. 

• Արյունահոսություն առջևի հատվածից. այս դեպքում վնասվում են քթի խոռոչի փոքր անոթները: Նման արյունահոսությունը վտանգավոր չէ և ինքնաբերաբար դադարում է։ 

• Արյունահոսություն ավելի խորքային հատվածից. այս դեպքում վնասվում են խորքային խոշոր անոթները։ Արյունը առատ հոսում է և  կանգ չի  առնում: 

Արյունահոսության պատճառները 

• Մեխանիկական ազդեցությամբ քթի լորձաթաղանթի վնասվածք, 

• քթի խոռոչի բորբոքային հիվանդություններ, 

• ուռուցքների առաջացում, 

• հիպերթերմիա  (մարմնի ջերմաստիճանի բարձրացում) վարակի կամ արևի տակ երկար մնալու պատճառով, 

• արյան ճնշման կտրուկ տատանում, 

• հորմոնալ ֆոնի խախտում, 

• ոչ ստերոիդային հակաբորբոքային միջոցների կիրառում, 

• ալկոհոլի օգտագործման պատճառով անոթների լայնացում, 

• սրտանոթային համակարգի պաթոլոգիա: 

 

Ախտանիշներ 

Առանձնացնում ենք արյան կորստի ծավալի մի քանի աստիճան. 

• թեթև աստիճանի արյունահոսություն. արյան կորուստը մինչև 500 մլ, 

• միջին աստիճանի արյունահոսություն` 500 մլ-ից մինչև 1400 մլ, 

• ծանր աստիճանի` ավելի քան 1400 մլ: 

 

Քթի արյունահոսության կլինիկական դրսևորումները ներառում են. 

• քթից կամ բերանի խոռոչից արյան արտահոսք 

• թուլություն, սրտխառնոց և գլխապտույտ 

• գլխացավ և ականջների փակվածություն 

• սրտի բաբախի արագացում 

• արյան ճնշման իջեցում 

• դեմքի և վերջույթների գունատություն: 

Ախտորոշում 

Քթի արյունահոսության ախտորոշումը դժվարություններ չի ներկայացնում, և իրականացվում է գանգատների ու ընդհանուր ստուգման հիման վրա՝ օգտագործելով ֆարինգոսկոպ կամ ռինոսկոպ: 

Բժիշկները պաթոլոգիայի պատճառը հաստատելու համար նշանակում են հետազոտության մի քանի լրացուցիչ մեթոդներ. 

• արյան և մեզի ընդհանուր ստուգում,   

• կոագուլոգրամմա, 

• ներքին օրգանների ՈՒՁՀ, 

•Էլեկտրոկարդիոգրաֆիա, 

• քթանցքերի և գանգի խոռոչի ռենտգեն հետազոտություն, 

• քթի տոմոգրաֆիա և ՄՌՏ։ 

Քթի արյունահոսության բուժումը 

Բժիշկները բուժում են քթի արյունահոսությունը՝ կիրառելով կոնսերվատիվ և վիրաբուժական մեթոդներ: 

Կոնսերվատիվ մեթոդները ներառում են. 

• Առաջնային հատվածում տամպոնի տեղադրում։ 

• Խորքային հատվածում տամպոնի  տեղադրում. տամպոնը ռետինե կատետրով տեղադրվում է քթի խոռոչի խորքում և ամրացվում թելերով, որոնք դուրս են գալիս բերանից և քթից։ 

• Տամպոնի տեղադրմանը զուգահեռ նշանակվում է հեմոստատիկ դեղերի օգտագործում։ 

Անարդյունավետ կոնսերվատիվ թերապիայի դեպքում հնարավոր է վիրաբուժական մեթոդների կիրառումը. 

• Էլեկտրոկոագուլյացիա 

• կրիոկոագուլյացիա 

• ռադիոալիքային մեթոդ 

• լազերային կոագուլյացիա։ 

Հիշե՛ք, որ քթի արյունահոսության ինքնաբուժությամբ զբաղվելը կարող է ոչ միայն անարդյունավետ լինել, այլ նաև վտանգավոր:

 

Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին , Յութուբյան ալիքին