Առողջ սնվելը որոշում է ամբողջ կյանքի համար

Առողջ սննդի մասին շատ է խոսվում, որովհետև այն ամուր առողջության գրավականն է: Պարզապես որոշեք ճիշտ սնվել ու ձերբազատվել դրա բացակայության պատճառով առաջացած խնդիրներից, որոշեք և այդպես արեք միշտ, որովհետև եթե մի օր որոշեք հետ կանգնել ձեր մտադրությունից, ապա կրկին ի հայտ կգան նախկին խնդիրներն ու տհաճ զգացողությունները:

Կարևոր է գիտակցել, որ այդ խելամիտ քայլով դուք փոխում եք ոչ միայն ձեր սննդային սովորությունները, այլև ինչ-որ չափով փոխում եք նաև ձեր ամբողջ կյանքը:

Սննդակարգից բացառեք վնասակար մթերքները

Ճիշտ սնվելու համար նախ պետք է սովորեք չգնել առողջությանը վնասող մթերքներ՝ երշիկեղեն, գազավորված ըմպելիքներ, ճարպոտ, քիմիական նյութեր և սննդային հավելումներ պարունակող մթերքներ, արագ սնունդ՝ տապակած կարտոֆիլ, հավի թևիկներ և այլն:

Ամենօրյա առողջ սնունդը պետք է ներառի մրգեր, բանջարեղեն, անյուղ կաթնամթերք, միս, ձուկ և այլն: Ցանկության դեպքում դուք ինքներդ էլ կարող եք շատ համեղ, ինչպես նաև օրգանիզմի համար օգտակար ուտեստներ պատրաստել այս մթերքների համադրությունից:

Ճիշտ սննդակարգի առաջին պայմաններից մեկը նախաճաշելն է: Կարող եք վարսակաձավարից ապուր ուտել, իսկ սուրճն էլ փոխարինել կանաչ թեյով, որը կառույգացնի և կկոտրի քաղցը:

Ճաշը պետք է լինի վիտամիններով հարուստ և հագեցնող: Կարող եք հավով և բանջարեղենային խավարտով մի ուտեստ պատրաստել: Ընթրիքին փորձեք համեմատաբար ավելի թեթև սնունդ ընդունել, օրինակ՝ կաթնաշոռ և կանաչ թեյ:

Ճիշտ սնվել նշանակում է սնվել օրվա ընթացքում մոտ 5 անգամ՝ փոքր չափաբաժիններով: Լրացուցիչ կարող եք մրգեր և չիր ուտել, կեֆիր խմել: Սխալ է այն պատկերացումը, որ երեկոյան ժամը 6-ից հետո չի կարելի ուտել: Իրականում վերջին սնունդը պետք է ընդունել քնելուց 2-3 ժամ առաջ:

Եթե ցանկանում եք անցնել ճիշտ սննդակարգի, ապա պետք է սովորեք նաև շատ ջուր խմել: Վերջինս խիստ անհրաժեշտ է օրգանիզմի նորմալ կենսագործունեության, առողջ մաշկի, ինչպես նաև գեղեցիկ կազմվածը պահպանելու համար: Օրվա ընթացքում հարկավոր է խմել 1-1,5 լ մաքուր ջուր, առանց գազի և հավելումների, ընդ որում՝ նախընտրելի է ջուրը խմել նախքան սնվելը և ոչ թե անմիջապես հետո: Դա կօգնի ձեզ կոտրել սկզբնական քաղցը և խուսափել չափից շատ ուտելուց: Խորհուրդ է տրվում ջուրը խմել ուտելուց մոտ 30ր առաջ:

Ճիշտ սննդակարգ պահելը շատ կարևոր է և հնարավոր է, եթե իսկապես ցանկանաք պահել: Միգուցե չստացվի հենց առաջին փորձից, հոգ չէ, սկսեք փոքր քայլերից, աստիճանաբար վնասակար մթերքները փոխարինեք առողջարար և օրգանիզմի համար օգտակար նյութերով:

Աղբյուրը