Սակտոսալպինքս (հիդրոսալպինքս)

Կանանց անպտղության հիմնական պատճառներից մեկն արգանդափողերի ֆունկցիայի խանգարումն է։ Այդ դեպքում խոսքը «մեխանիկական» անպտղության մասին է։ Այդ դեպքում սերմնաբջիջները, հանդիպելով խոչընդոտների, չեն կարողանում հասնել ձվաբջջին։

Ի՞նչ է սակտոսալպինքսը (հիդրոսալպինքս)

Սակտոսալպինքսը (հիդրոսալպինքս) արգանդափողում ի հայտ եկած գոյացություն է՝ լի էքսուդատով՝ երբեմն թարախային։ Այդպիսի գոյացությունը, անկախ պարունակությունից, ժամանակի ընթացքում խցանում է արգանդափողը և դժվարացնում ձվաբջջի տեղաշարժը դեպի արգանդի խոռոչ։ Հիվանդությունն ունի բորբոքային բնույթ, կարող է լինել ինչպես միակողմանի, այնպես էլ երկկողմանի, կարող է ընթանալ ինչպես սուր, այնպես էլ քրոնիկ ձևով։

Առաջացման հիմնական պատճառները

• Արգանդափողերի կամ ձվարանների բորբոքում։ 
• Կպումներ վիրահատական միջամտություններից հետո։ 
• Սեռական օրգանների վարակներ։ 
• Էնդոմետրիոզ և այլն։ 

Ախտանշանները

Սակտոսալպինքսի ախտանշանները նման են արգանդափողերի բորբոքաման ախտանշաններին՝ առատ արտադրություն, սուր կծկումային կամ ձգող ցավ, մարմնի ջերմաստիճանի բարձրացում, դաշտանաին ցիկլի խանգարում, սուր դաշտանային ցավ և այլն։ Երբեմն, սակայն, հիվանդությունը կարող է ընթանալ առանց ախտանշանների։

Ախտորոշումը

Հիվանդությունը հեշտությամբ ախտորոշվում է ՈւՁՀ-ի միջոցով հնարավոր է հայտնաբերել ձվարանների և արգանդի միջև եղած հեղուկը, փողի լայնացումը և ձևախեղումը։ Ախտորոշումը կարող է իրականացվել նաև լապարոսկոպիայի միջոցով։

Բուժումը

Սակտոսալպինքսի բուժումն ուղղված է անպտղության և բուն խնդրի վերացմանը։ Այսօր բուժման ընդունված և ամենաարդյունավետ ձևն ախտահարված արգանդափողի հեռացումն է և հաջորդող ԱՄԲ-ն, եթե կա ցուցում։ Սալպինգէկտոմիան կատարվում է լապարոսկոպիկ եղանակով։