Պապիլլոմաները բարորակ գոյացություններ են, որոնք կարող են ի հայտ գալ մարմնի տարբեր մասերում։ Հիմնականում հանդիպում են գորտնուկների կամ սրածայր կոնդիլոմաների տեսքով։ Պատճառը մարդու պապիլլոմավիրուսն է, որը կարող է պասիվ առկա լինել օրգանիզմում և դրսևորվել, երբ ընդհանուր իմունիտետը թուլանում է։

Մարդու պապիլոմավիրուսի տեսակները շատ են, և դրանցից որոշներն օնկոգեն մեծ ռիսկ են կրում։ Հնարավոր չէ վիրուսը վերացնել օրգանիզմից, սակայն հնարավոր է այն պասիվ վիճակում պահել՝ բարձրացնելով իմունիտետը։

Պապիլլոմաների հեռացման ցուցումները

Միջամտությունը կատարվում է, երբ բուժառուն պարզապես ցանկանում է ազատվել դրանից կամ էլ երբ դրանք վնասված են կամ վնասվելու ռիսկային տեղերում են, շատ են կամ մեծ։

Հեռացումը կատարվում է ամբուլատոր պայմաններում՝ մի շարք հետազոտություններ կատարելուց հետո (արյան ընդհանուր հետազոտություն, հեպատիտների հայտնաբերման հետազոտություն և այլն)։

Միջամտությունը կատարվում է Սուրգիտրոն սարքով, որն անվնաս է և թույլ է տալիս գոյացությունը հեռացնել բարձր հաճախականությամբ ռադիոալիքների օգնությամբ։ Անցավ է, սպիներ չի թողնում, իսկ վերականգնումն արագ և թեթև է անցնում։

Վերականգնումը

Վերականգնումն ընթանում է առանց դժվարությունների և տհաճ զգացողությունների։ Այդ շրջանում՝ առաջին օրերին, հարկավոր է սահմանափակել ջրի հետ կոնտակտը, մեկ շաբաթ զերծ մնալ սաունա, սպորտզալ, լողավազան գնալուց։