Միզապարկի իջեցումը տարածված երևույթ է, որի բժշկական անվանումը ցիստոցելե է: Այս պաթոլոգիան հանդիպում է և՛ տղամարդկանց, և՛ կանանց շրջանում, սակայն վերջիններիս դեպքում այն ավելի տարածված է, ինչը պայմանավորված է հղիությամբ, ծննդաբերությունով, տարատեսակ ֆիզիկական գերլարումների առկայությամբ և այլն:

Ցիստոցելեն բնորոշվում է միզապարկի իջեցումով կամ արտանկումով, ինչը տեղի է ունենում միզապարկն իր դիրքում պահող մկանային ապարատի և կապանների թուլացման արդյունքում: Այդպես, մկանակապային ապարատի տոնուսի իջեցման արդյունքում տեղի է ունենում միզապարկի անատոմիական դիրքի փոփոխություն՝ դեպի ներքև ուղղությամբ:

Օրգանի իջեցումն առաջացնում է անհարմարության զգացում, բնականոն միզարձակման խանգարումներ, միզելու կեղծ ցանկություն և այլն:

Պատճառները

Պատճառները տարատեսակ են, բայց բոլորն այս կամ այն կերպ ազդում են միզապարկի մկանակապային ապարատի տոնուսի վրա:

• Գլխավոր պատճառներից մեկը կնոջ օրգանիզմում հորմոնային հավասարակշռության էական խախտումն է: Հաճախ դա տեղի է ունենում կլիմաքսի շրջանում:
• Այս պաթոլոգիան կարող է զարգանալ որպես հղիության կամ ծանր ծննդաբերության, երբեմն էլ՝ գինեկոլոգիական վիրահատության հետևանք:
• Ֆիզիկական ինտենսիվ ծանրաբեռնվածությունը, ծանրության հաճախակի բարձրացումը բացասական ազդեցություն են ունենում կնոջ օրգանիզմի վրա և կարող են հանգեցնել միզապարկի իջեցման:
• Քաշի արագ անկումը և գիրացումը նույնպես կարող են նպաստել այս պաթոլոգիայի զարգացմանը:
• Պաթոլոգիայի զարգացման պատճառներից է նմանատիպ անոմալիաների հանդեպ գենետիկ նախահակումը կամ փոքր կոնքի օրգանների բնածին պաթոլոգիան: Փոքր կոնքում տարատեսակ ուռուցքային գոյաթությունները նույնպես կարող են առաջացնել օրգանի իջեցում:

Նշանները

Ցիստոցելեն առաջացնում է որոշակի անհարմարություն և հնարավոր է նաև ինքնազգացողության վատթարացում: Հիմնական նշաններն են.

• անմիզապահություն, որը հատկապես արտահայտվում է որովայնի մկանները լարելիս, ծանրություն բարձրացնելիս, հազալիս և այլն, 
• բնականոն միզարձակման խանգարումներ, միզելու հաճախության բարձրացում, միզապարկի ոչ ամբողջական դատարկման զգացում, 
• նյարդային ցնցումներ, առօրյա սթրեսային իրավիճակներ, որոնք նույնպես ուղեկցվում են ակամա միզարձակմամբ, 
• որովայնի ստորին շրջանի ցավեր, 
• ցավ սեռական հարաբերության ժամանակ, 
• ծանրության, անհարմարության զգացում սեռական օրգանների շրջանում,
• միզասեռական համակարգի վարակիչ հիվանդությունների հաճախացում:

Ախտանշանների ի հայտ գալուն պես հարկավոր է դիմել բժշկի: Բուժման մեթոդի ընտրությունը կախված է կնոջ տարիքից, պաթոլոգիական պրոցեսի ծանրությունից, ուղեկցող այլ հիվանդություններից: Արդյունավետ ազդեցություն է ունենում բուժական ֆիզկուլտուրան, հատկապես Կեգելի վարժությունները, որոնք ուղղված են հեշտոցային մկանները մարզելուն:

Կարդացեք՝ Կեգելի վարժությունները հղիության ընթացքում: