Պսորիազը և հղիությունը

Պսորիազը մաշկի բորբոքային հիվանդություն է՝ պայմանավորված գենետիկական, իմունալոգիական և արտաքին գործոններով: Հիվանդությունը հրահրող արտաքին գործոններն են սթրեսը, որոշ դեղամիջոցների ընդունումը և վարակիչ հիվանդությունները: Կնոջ հորմոնային ֆոնի փոփոխությունները նույնպես ազդում են հիվանդության ընթացքի վրա, ընդ որում՝ հնարավոր է վատթարացնեն կամ բարելավեն վիճակը: Կանանց մտահոգում է, որ իրենց հիվանդությունը կարող է փոխանցվել երեխային: Պսորիազը վարակիչ չէ և կարելի է կրծքով կերակրել՝ առանց որևէ վախի: Թեպետ, այն ունի գենետիկական նախահակում: Պսորիազը հղիանալուն չի խոչընդոտում և կնոջ վերարտադրողական ֆունկցիայի վրա բացասական ազդեցություն չի թողնում:

Ոմանց համար հիվանդությունը թեթև ընթացք է ստանում հղիության դեպքում, ինչը հավանաբար պայմանավորված է էստրոգեն և պրոգեստերոն հորմոնների բարձր մակարդակով, իսկ ծննդաբերությունից հետո սկսում է ավելի ծանր արտահայտվել: Հիվանդության վատթարացում նկատվում է նաև դաշտանադադարի դեպքում, կամ հնարավոր է հենց այդ ժամանակ այն սկսի առաջին անգամ ի հայտ գալ:

Պսորիատիկ արթրիտի դեպքում հղիությանը զուգահեռ կնոջ մոտ հնարավոր է ուժգնանան հոդացավերը, ինչը պայմանավորված է քաշի ավելացմամբ:

Կարդացեք՝ Հղիության ընթացքում քաշի ավելացման բնական չափը:

Հնարավոր է պսորիազը սկսվի հղիության ընթացքում և ծանր արտահայտվի: Պատճառը կրկին հորմոնային տատաումներն են և վիտամին D-ի նյութափոխանակության խանգարումը: Որովայնի մաշկի, շեքի շրջանում առաջանում են կարմիր ախտահարումներ:

Հղիության ընթացքում առաջացած պսորիազը սովորաբար անհետանում է ծննդաբերությունից հետո:

Բուժումը

Հղիության ընթացքում պսորիազի բուժումն առաձնակի դժվարություն է ներկայացնում, քանի որ շատ դեղամիջոցներ հակացուցված են՝ այդ թվում նաև տեղային կիրառման պատրաստուկները: Դա պայմանավորված է նրանով, որ դեղորայքն ունի տերատոգեն ազդեցություն, այսինքն կարող է առաջացնել պտղի զարգացման անոմալիաներ:

Հղիության ընթացքում հակացուցված են A վիտամինի հիմքով պատրաստուկները, D վիտամինի հիմքով պատրաստուկները կարելի է կիրառել շատ քիչ քանակությամբ միայն: Հղիության ընթացքում թույլատրելի են հանգստացնող, փափկեցնող և խոնավեցնող քսուքները: Երբեմն կարելի է կիրառել գլյուկոկորտիկոիդային պրեպարատներ, սակայն խորհուրդ չի տրվում կիրառել այն որովայնի, ուսերի և կրծքի շրջանում՝ հաշվի առնելով զոլերի առաջացման վտանգները:

Չի թույլատրվում հղիության ընթացքում ընդունել ացիտրետին և մետոտրեկսատ, քանի որ դրանք մեծացնում են բնածին դեֆեկտների և ինքնաբուխ վիժման վտանգները: Հղիություն կարելի է պլանավոր նշված դեղորայքից հրաժարումից մի քանի ամիս անց: Ի դեպ, մետոտրեկսատն ազդում է նաև սպերմատոգենեզի վրա, հետևաբար եթե ամուսինն ընդունում է այս դեղամիջոցը, ապա խորհուրդ չի տրվում հղիություն պլանավորել դեղորայքի ընդունման և բուժումը դադարեցնելուց հետո 3 ամիսների ընթացքում:

Հղիության ընթացքում թույլատրելի դեղամիջոց է ցիկլոսպորինը, սակայն այն կիրառվում է միայն ծանր դեպքերում, քանի որ մայրիկի օրգանիզմում առաջացնում է կողմնակի ազդեցություններ: