Հղիություն աշնանը. խորհուրդներ

Դրական կողմերը

Աշնանային ամիսները բավականին բարենպաստ են մայրանալ պատրաստվող կանանց համար, քանի որ աշունն այն ժամանակահատվածն է, երբ դեռ հասանելի են թարմ մրգերը, կանաչեղենն ու բանջարեղենը: Աշնանը հեշտ է բալանսավորված սննդակարգ պահպանել: Կարելի է պատրաստել մրգահյութեր, թարմ աղցաններ, կամ շոգեխարշած բանջարեղեն:

Ոչ պակաս կարևոր է նաև երկարատև զբոսանքի հնարավորույթունը. այս եղանակին ոչ շատ շոգ է, ոչ էլ շատ ցուրտ: Փորձեք ամեն օր մաքուր օդ շնչել և ջերմանալ աշնանային արևի ներքո, որն օգտակար է ինչպես ձեզ, այնպես էլ ձեր փոքրիկի համար:

Բացասական կողմերը

Աշնանն իմունիտետն անկում է, և շնչառական սուր վարակներով հիվանդանալու վտանգ է առաջանում: Եղանակային կտրուկ փոփոխությունները և մթնոլորտային ճնշման տատանումները կարող են հղի կնոջ մոտ գլխացավերի առաջացման և վեգետատիվ անոթային դիստոնիայի սրացման պատճառ դառնալ:

Բացի այդ, կարճ օրերը և ամպամած եղանակը հաճախ բացասական են ազդում տրամադրության վրա՝ առաջացնելով քնի պակաս և քրոնիկ հոգնածություն:

Ինչպե՞ս պայքարել աշնանային տհաճությունների դեմ

Որքան էլ ձանձրալի և տխուր թվան աշնանային օրերը, ապագա մայրիկը պետք է կարողանա իր համար ապահովել լավ տրամադրություն և անվտանգություն՝ փոքրիկին: Փորձեք ավելի շատ ժամանակ տրամադրել ինքներդ ձեզ և խուսափեք տհաճ իրավիճակներից: Շնչառական սուր վարակներից խուսափելու համար խորհուրդ է տրվում՝

• խուսափել մարդաշատ վայրերից, 
• ապահովել օրգանիզմն անհրաժեշտ վիտամիններով՝ խմել կիտրոնով, մեղրով թեյ, թարմ քամած հյութեր, օգտագործել մրգեր, բանջարեղեն: Բժշկի ցուցումով կարելի է օգտագործել վիտամինային հավելումներ,
• հաճախակի օդափոխել տունը և սենյակներում խոնավ մաքրություն անել:

Փորձեք շատ ժամանակ տրամադրել հանգստին, քիչ նյարդայնացեք, անհրաժեշտության դեպքում բժշկի ցուցումով ընդունեք հանգստացնող միջոցներ: Մաշկն արտաքին գործոններից պաշտպանելու համար օգտագործեք սնուցող քսուքներ:

Հագուստը կարելի է ընտրել այնպես, որ բաղկացած լինի մի քանի շերտից, որպեսզի անհրաժեշտության դեպքում կարողանաք հանել այն: Ընտրեք ցածրակրունկ, հարմարավետ կոշիկ:

Բարձր տրամադրության և առույգության համար խորհուրդ է տրվում լավ նախաճաշել (ի հավելումն կարող եք խմել կիտրոնով քաղցր թեյ, թխվածքաբլիթներ), իսկ բանանը, լոլիկը, եգիպտացորենի կամ բրնձի շիլաները և սերոտոնին պարունակող այլ մթերքները կապահովեն լավ քուն:

Տանը կարող եք տեղադրել սպիտակ լուսավորմամբ ջահեր, որ կլրացնեն արևի լույսի պակասը: Բարենպաստ եղանակին բաց մի թողեք զբոսանքի դուրս գալու հնարավորությունը: Շփվեք ձեր սիրելի մարդկանց հետ, զբաղվեք ձեզ հաճելի գործերով՝ կարդացեք, ֆիլմեր դիտեք, արեք այն ինչ ձեր սրտով է: