Ինչպե՞ս շնչել ծննդաբերական ցավը մեղմելու համար․ վարժություններ

Ինչպե՞ս շնչել ծննդաբերական ցավը մեղմելու համար․ վարժություններ

Հղիության սկզբում սովորաբար կինն այնքան տարված է լինում փոքրիկի մասին մտքերով, որ չի մտածում ծննդաբերության ընթացքի մասին: Բայց որքան մոտենում է երկար սպասված օրը, այնքան հաճախ է հարց առաջանում, թե ինչպես վարվել ծննդաբերության ժամանակ, ինչպես մեղմել կծկումները և ինչպես ճիշտ շնչել: Ծննդաբերության ժամանակ ճիշտ շնչառության դերը խիստ մեծ է, քանի որ հենց այն է օգնում կնոջը վերականգնել ուժերը և նպաստում է ծննդաբերության ավելի արագ և թեթև ընթացքին:

Ճիշտ շնչառությունն արագ ծննդալուծման գրավականն է

Բազմաթիվ մասնագետներ պնդում են, որ կծկումների և ճիգերի ժամանակ ճիշտ շնչառությունն օգնում է մեղմացնել ծննդաբերության ընթացքը և նույնիսկ որոշ չափով արագացնել այն: Իսկապե՞ս շնչառության ճիշտ տեխնիկան կարող է նվազեցնել երկունքի ցավը: Այո, իրականում այդպես է:

Ճիշտ շնչառության ժամանակ կինը կարողանում է հանգստանալ, թուլանալ, բացի այդ շնչառության հատուկ տեխնիկաները մշակված են այնպես, որ դիաֆրագման՝ ստոծանին, չի խանգարում ծննդաբերությանը, նույնիսկ օգնում է:

Ինչո՞վ է բացատրվում այն, որ ճիշտ շնչառությունը կարող է ապահովել ծննդաբերության ավելի արագ ընթացք: Ամեն ինչ շատ պարզ է. եթե ծննդաբերության ժամանակ կինը կենտրոնացած է ճիշտ շնչառության վրա, նա ավելի քիչ է ուշադրություն դարձնում ցավին, արգանդի պարանոցն ավելի արագ է բացվում, և հետևաբար՝ փոքրիկն ավելի վաղ է լույս աշխարհ գալիս:

Թթվածինը շատ մեծ դեր ունի ծննդկանի մկանների համար, քանի որ դրա բավարար քանակությունն օգնում է մկաններին ավելի լավ կծկվել, և բացի այդ, հենց փոքրիկին էլ մեծ քանակությամբ թթվածին է անհրաժեշտ, իսկ ճիշտ շնչառությունն ամբողջ օրգանիզմին կապահովի թթվածնով:

Չնայած որ բոլորս ծնվել ենք շնչառության ոչ պայմանական ռեֆլեքսով, միևնույնն է հղի կնոջ համար կարևոր է շնչառական հատուկ վարժությունների տիրապետելը: Ծննդաբերության ժամանակ կինը պետք է հատուկ եղանակով շնչի, դա ոչ մի կերպ չի կարելի համեմատել սովորական շնչառության հետ: Այդ պատճառով էլ անհրաժեշտ է պատրաստվել ծննդաբերությանը և նախօրոք սովորել շնչառական հատուկ վարժությունները:

Նաև պետք է նշել, որ վարժությունները սովորելը մի քանի ամիս է պահանջում, միայն այդ դեպքում դուք կկարողանաք առավելագույն կերպով մարզել ձեր հմտությունները, որոնք կօգնեն ծննդաբերության տարբեր փուլերում օգտագործել համապատասխան շնչառական վարժություններ: Այո, շնչառությունը տարբեր է լինում՝ կախված ծննդաբերության փուլերից: Գլխավորը՝ պետք է հղի կինը կարողանա կառավարել ներշնչելու և արտաշնչելու գործընթացները:

Ճիշտ շնչառական տեխնիկան ըստ ծննդաբերական փուլերի

Այսպիսով, ինչպես արդեն նշվեց, ծննդաբերության յուրաքանչյուր փուլի համար գոյություն ունի շնչառական վարժությունների համապատասխան տեխնիկա: Ավելի մանրամասն դիտարկենք յուրաքանչյուր փուլը և պարզենք այդ փուլերում շնչառական վարժությունների բոլոր առանձնահատկությունները:

Ճիշտ շնչառություն կծկումների ժամանակ

Սովորաբար կինն ուղևորվում է ծննդատուն հենց առաջին կծկումների ի հայտ գալուն պես։ Դրանք մեկ հայտնվում, մեկ անհետանում են, առանձնապես ցավոտ չեն և արտահայտվում են որովայնը ձգելիս: Աստիճանաբար կծկումները դառնում են մշտական և կրկնվում են որոշակի հաճախականությամբ:

Կանոնավոր կծկումների ժամանակ ծննդկանը պետք է հստակ իմանա, թե ինչ չի կարելի անել այս փուլում: Մասնավորապես չի կարելի փորձել ճնշել ցավի զգացողությունը․ մի՛ կծկվեք, մի՛ լարվեք և մի՛ բղավեք: Այդ գործողությունները հանգստություն չեն բերի, ձեր օրգանիզմը կհոգնի և ժամանակից շուտ կհյուծվի, իսկ ցավը միևնույնն է չի դադարի:

Առաջին անգամ ծննդաբերող կանանցից շատերը խիստ լարվում են կծկումների ժամանակ, ինչը ճնշում է ծննդաբերական գործընթացը, քանի որ գերլարվածությունը խանգարում է արգանդի պարանոցի ճիշտ և արագ բացվելուն: Այդ դեպքում բժիշկներն ստիպված են լինում ցավազրկել և խթանել ծննդաբերությունը՝ օգտագործելով դեղորայքային միջոցներ: Կնոջ ճնշվածությունը ոչ մի լավ բանի չի հանգեցնի, քանի որ այդ դեպքում փոքրիկին անբավարար քանակությամբ է թթվածին մատակարարվում, ինչը կարող է հանգեցնել թթվածնային անբվարարության, իսկ դա ծննդաբերությունից հետո կարող է ազդել փոքրիկի զարգացման վրա:

Մանկաբույժների կարծիքով այն փոքրիկները, ովքեր ծննդաբերության ժամանակ թթվածնաքաղց ենբտարել, ավելի դժվար են հարմարվում և ավելի մեծ հակում են ունենում հիվանդությունների հանդեպ: Ահա թե ինչու են այսքան կարևոր շնչառական տեխնիկաները, որոնց կարող եք ծանոթանալ ստորև:

Վարժություններ

Երբ կծկումներն սկսվեն, կատարեք այս վարժությունը՝ չորս հաշվին ներշնչեք քթով, իսկ արտաշնչեք բերանով՝ վեց հաշվին: Հիշե՛ք, որ ներշունչը պետք է ավելի կարճ լինի, քան արտաշունչը: Շրթունքներին խողովակի տեսք հաղորդեք, երբ բերանով արտաշնչում եք: Այս տեխնիկան կօգնի առավելագույնս թուլացնել մկանները, հանգստանալ և հարստացնել օրգանիզմը թթվածնով, քանի որ հենց ամբողջական արտաշունչն է արյունը հագեցնում անհրաժեշտ քանակությամբ թթվածնով:

Այս տեխնիկան կիրառելով՝ ստիպված եք լինելու մշտապես հաշվել և հետևաբար՝ ժամանակ չեք ունենա ցավի մասին մտածելու: Այստեղ կարևոր է քթով ներշնչել և բերանով արտաշնչել:

Երբ կծկումներն ավելի ինտենսիվ և հաճախակի դառնան, պետք է արագացնել շնչառությունը, որի համար խորհուրդ է տրվում հետևյալ տեխնիկան: Շնչառության այս տեսակը նաև անվանում են «շների շնչառություն», ինչը հնարավոր է առաջին հայացքից ծիծաղելի հնչի, բայց ոչ կծկումների ժամանակ: Դուք պետք է շնչեք մակերեսորեն՝ բաց բերանով:

Բաց թողեք բոլոր նախապաշարմունքները և մի վախեցեք ծիծաղելի տեսք ունենալուց, ո՛չ մանկաբարձների, ո՛չ էլ բժիշկներ համար դա զարմանալի չի լինի, քանի որ ձեր գլխավոր խնդիրն է կծկումների ժամանակ առավելագույն կերպով մեղմացնել «տանջանքները» և օգնել երեխային արագ լույս աշխարհ գալ: Այդ պատճառով անհրաժեշտ է մի փոքր բացել բերանը և սկսել հաճախակի շնչել:

Արգանդի պարանոցի բացվելու ժամանակ կարելի է կիրառել մեկ այլ շնչառական տեխնիկա, որը նաև անվանվում է «գնացք»: Այս տեխնիկայի սկզբունքը բավականին պարզ է, կծկումների սկսվելուն պես անհրաժեշտ է շնչել արագ, մակերեսորեն, ներշնչել քթով, իսկ հետո արագ արտաշնչել բերանով՝ շրթունքները պահելով խողովակաձև դիրքով: Այն պահին, երբ կծկումների ինտենսիվությունը նվազում է, և ցավն ավելի մեղմանում, փորձեք հանգստացնել շնչառությունը: Այս մեթոդը կօգնի հաղթահարել կծկումների ամենասուր ցավը:

Ինչպե՞ս է պետք վարվել ծննդաբերական ճիգերի ժամանակ

Երբ սկսվում են ծննդաբերական ճիգերը, ծննդկանը պետք է պարզապես վստահի մանկաբարձին, քանի որ հենց նա է բացատրում, թե ինչպես պետք է վարվել, որպեսզի փոքրիկի ծնունդնանցնի հնարավորինս արագ:

Լսեք մանկաբարձ-գինեկոլոգի խորհուրդները, նա բացատրում է, թե ինչպես շնչել, ինչպես ուժ տալ, երբ է պետք դա անել և երբ է պետք հանգստանալ: Ծննդաբերական ճիգերի միջին տևողությունը մեկ րոպե է: Անհրաժեշտ է առավելագույնս խորը ներշչել և արտաշնչելիս ուժ տալ՝ փորձելով օդի ամբողջ ծավալով ճնշում գործադրել արգանդի վրա:

Ուշադիր եղեք, որ այդ լարվածությունը չկուտակվի գլխում, քանի որ այդ դեպքում չեք խուսափի դեմքի և աչքերի անոթների պատռվելուց: Ձեր բոլոր ջանքերը պետք է ուղղված լինեն փոքրիկի ծնվելուն: Եթե այնպես լինի, որ չհասցնեք անհրաժեշտ քանակությամբ օդ ներշնչել, անհանգստանալու կարիք չկա, պարզապես կրկին արագ ներշնչեք և նորից ուժ տվեք:

«Մոմի շնչառությունը» ճիգերի ժամանակ համարվում է ամենաարդյունավետը: Այս տեխնիկան կիրառելու համար անհրաժեշտ է քթով ներշնչել, իսկ հետո բերանով արտաշնչել այնպես, կարծես մոմ եք փորձում հանգցնել: Դա կարող է նաև ուղեկցվել ձայնավոր հնչյունների արտաբերմամբ:

Հենց փոքրիկի գլուխը երևա, կարող եք շնչել ավելի ազատ կամ կիրառել վերոնշյալ երկրորդ տեխնիկան:

Եթե ծննդկանը ճիգերի ժամանակ ճիշտ շնչի, փոքրիկը բավականին արագ լույս աշխարհ կգա, արդեն 3-4 ճիգից հետո։ Դրանց ավարտին ցավը հանգստանում է, իսկ եթե կինն ուժ չունի, մանկաբարձը հնարավորություն է տալիս պարբերաբար հանգստանալու:

Լավ կլինի շնչառական վարժությունները հնարավորինս հաճախ կատարել, որպեսզի առավելագույնս նախապատրաստվեք ծննդաբերությանը: Սկզբում հնարավոր է առաջանա «գերօդափոխություն», որի նշաններն են գլխապտույտը, աչքերի առաջ սևանալը, նախաուշագնացության վիճակը: Տվյալ ախտանշաններից ազատվելուն կօգնի ներշնչելը և շունչը պահելը կամ նախապես միացրած ձեռքերի ափերի մեջ շնչելը:

Բաց բերանով շնչելիս երբեմն առաջանում է չորություն բերանի խոռոչում, որից կարելի է ազատվել լեզվի ծայրով քիմքին դիպչելով կամ բերանը ջրով ողողելով:

Ծննդաբերության ժամանակ պատահական շնչառությունը միայն կվատթարացնի և կերկարաձգի դրա ընթացքը: Կառավարեք ձեր յուրաքանչյուր շունչը՝ չմոռանալով այդ ընթացքում հաշվել և մի վատնեք ձեր ուշադրությունն այլ գործերի կամ ցավի վրա, գլխավորը հիշեք, որ փոքրիկի համար ավելի դժվար է ծննդաբերության ընթացքը, այնպես որ՝ կարող եք այդ ընթացքում խոսել փոքրիկի հետ: Լավ կլինի, եթե ծննդաբերության ընթացքում ձեր կողքին լինի հարազատներից որևէ մեկը, ով կկարողանա հանգստացնել ձեզ, որպեսզի կենտրոնանաք միայն շնչառության վրա:

Ցանկալի է վաղ սկսել պարապմունքները, որպեսզի շնչառական վարժությունները սովորական երևույթ դառնան և հեշտությամբ հիշվեն: Ծննդաբերության ժամանակ ճիշտ շնչելու համար կարևոր է, որ կարողանաք թուլանալ և ազատվել խուճապից:

Ամփոփելով ևս մեկ անգամ նշենք, որ ծննդաբերությունը բավականին լուրջ և բարդ ընթացք է ունենում և դրան հարկավոր է նախապատրաստվել: Շատ կարևոր է նաև նախապատրաստվել հոգեբանորեն․ պատկերացրեք իրավիճակներ և ձեր վարքը ծննդաբերության տարբեր փուլերում: Հիշե՛ք, որ բժիշկը և մանկաբարձը ձեր օգնականներն են, այդ պատճառով ուշադիր լսեք նրանց խորհուրդներին և կատարեք նրանց հրահանգները:

Եթե կարողանաք նախապես սովորել և տիրապետել ճիշտ շնչառական տեխնիկաների, դրանք զգալի կերպով կօգնեն թուլանալ և բոլոր ուժերը կենտրոնացնել ծննդաբերության ընթացքի վրա: Թեթև և հաջող ծննդաբերություն ենք մաղթում:

Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար