Այտուց հղիության ընթացքում

19.12.201610883

Ապագա մայրիկներին հաճախ անհանգստացնող երևույթ է այտուցը, որը հատկապես ի հայտ է գալիս հղիության երկրորդ կեսին:

Այտուցը միջհյուսվածքային տարածքում հեղուկի կուտակումն է: Հղիությունն իրենով նպաստում է աննշան այտուցների զարգացմանը, քանի որ այս ընթացքում մեծացող արգանդն սկսում է ճնշել մեծ անոթները, արդյունքում դժվարանում է արյան շրջանառությունը: Այստուցվում են հատկապես ոտքերը: Երբեմն էլ այտուցը տարածվում է ողջ մարմնով, և անգամ հայտնվում դեմքին, ինչն արդեն գեստոզի նախանշան է:

Այտուցներ հաճախ առաջանում են երակների վարիկոզ հիվանդության դեպքում, ինչը վատթարանում է հղիության ընթացքում: Կինը ոտքերի ցավ և հոգնածություն է զգում: Եթե կան այտուցի նշաններ, մաշկի գունատություն, ապա հարկավոր է խորհրդակցել բժշկի հետ: Եթե այտուցն այլ ախտանշաններով չի ուղեկցվում, և կինն առողջական խնդիրներ չունի, ապա սովորաբար խորհուրդ է տրվում՝

  • չչարաշահել հեղուկի ընդունումը (օրական մինչև 1.5լ), 
  • սահմանափակել աղի օգտագործումը, խուսափել տապակած, ապխտած, կծու սննդից, 
  • միևնույն դիրքով երկար չնստել, չպառկել, 
  • զբոսնել ոչ շատ երկար, զբաղվել լողով, հղիների համար նախատեսված հատուկ վարժություններով, 
  • օրվա ընթացքում մի քանի րոպե հանգստանալ ոտքերը վեր պահած դիրքում, 
  • կատարել ոտքերի մերսում, 
  • հետևել զարկերակային ճնշման տատանումներին:

Անհրաժեշտության դեպքում բժիշկը համապատասխան անալիզներ կնշանակի: Եթե գեստոզ է զարգացել, ապա նկատվում է զարկերակային ճնշուման բարձրացում, մեզում հայտնվում է սպիատկուց:

Ոչ մի դեպքում ինքնաբուժությամբ մի զբաղվեք, և մի օգտագործեք միզամուղներ: