Էպիդիդիմիտ

Էպիդիդիմիտ

Էպիդիդիմիտը մակամորձու բորբոքումն է, որ համարվում է որևէ վարակիչ հիվանդության բարդություն, երբ արյան միջոցով վարակները կամ ախտածին միկրոօրգանիզմները հայտնվում են մակամորձում: Այսպիսի բարդություն կարող է առաջանալ գրիպի, թոքաբորբի (պնևմոնիա), անգինայի, միզածորանի բորբոքման՝ ուրետրիտի, երիկամի ավազանի բորբոքման՝ պիելոնեֆրիտի և այլ հիվանդությունների հետևանքով: Բայց առավել հաճախ մինչև 35 տարեկան տղամարդկանց դեպքում էպիդիդիմիտն առաջանում է սեռական ճանապարհով փոխանցվող վարակներից: Ամենատարածված միկրոօրգանիզմը, որ հանգեցնում է տվյալ հիվանդության զարգացման, համարվում է քլամիդիան: Էպիդիդիմիտի զարգացմանը նաև նպաստում է գերսառեցումը, որի արդյունքում տեղի է ունենում փոշտի արյան մատակարարման վատացում:

Սուր էպիդիդիմիտ

Սուր էպիդիդիմիտին բնորոշ է ջերմաստիճանի բարձրացումը մինչև 38-39°С, ամորձում սուր ցավերը, որոնք ուժգնանում են շարժվելիս, փոշտի այտուցվածությունը, կարմրածությունը մակամորձու ախտահարված կողմից: Ցավը կարող է տարածվել դեպի գոտկատեղ, սրբանային, աճուկային և շեքի հատված: Առանց բուժման ցավերը մեղմանում են 2-5 օրվա ընթացքում: Էպիդիդիմիտից հետո մակամորձու մարմնի կամ պոչի հատվածում ձևավորվում է ամուր ինֆիլտրատ (բջջային տարրերի կուտակում ախտահարված օջախի շուրջ), որը փոխարինվում է սպիով: Այդ սպին, համակցված իր սեփական սերմնաբջիջների հանդեպ ինքնաագրեսիայով, հանգեցնում է անպտղության: Երբեմն գործընթացի մեջ կարող է ներգրավվել սերմնածորանը, որը շոշափելիս ցավում է (դեֆերենտիտ), երբեմն էլ ամբողջական սերմնալարը կարող է բորբոքվել, դառնալ մատի հաստության և առաջացնել սուր ցավ (ֆունիկուլիտ):

Քրոնիկական էպիդիդիմիտ

Հաճախ սուր էպիդիդիմիտը վերածվում է քրոնիկականի: Եթե հիվանդությունը չսրանա, ապա ոչ մի ցավ չի զգացվի, բայց սրացման դեպքում փոշտի շրջանում կառաջանա անհարմարության զգացողություն: Այս շրջանում տեղի է ունենում մակամորձու ամբողջական կամ մի հատվածի կոշտացում և ուղեկցվում է սերմնահոսքի անցանելիության խանգարումով: Հետազոտության ժամանակ մակամորձին պինդ է, չափերով մեծացած, ամորձուց սահմանազատված, ցավոտ: Սերմնալարը հաստացած է, սերմնահոսքի տրամագիծը՝ մեծացած: Քրոնիկական էպիդիդիմիտի դեպքում սերմնաբջջի բեղմնավորման ընդունակությունը նվազում է ընդհուպ մինչև անպտություն:

Էպիդիդիմիտի ախտորոշումը

Ախտորոշման մեթոդներն են՝

  • շոշափում (պալպացիա),
  • փոշտի ՈւՁՀ,
  • դիաֆանոսկոպիա (մեծացած փոշտի դեպքում ուրոլոգիայում կիրառվող լուսային հետազոտության մեթոդ),
  • սերմնաբջջի հետազոտություն՝ տարատեսակ պաթոլոգիական միկրոօրգանիզմների հայտնաբերման համար,
  • մեզի հետազոտություն և ցանքս միկրոֆլորայի հետազոտման նպատակով,
  • սեռական ուղիների վարակների տարատեսակ հետազոտություններ,
  • ուռուցք կասկածելու դեպքում կատարվում է օնկոմարկերների ստուգման արյան հետազոտություն, տուբերկուլյոզի միկոբակտերիայով ախտահարության կասկածի դեպքում կատարվում է մեզի կամ սերմնահեղուկի հետազոտություն:

Էպիդիդիմիտի բարդացումները

Առանց համապատասխան բուժման սուր էպիդիդիմիտը որոշ ժամանակ անց կարող է հանգեցնել մակամորձու թարախակալման՝ թարախակույտի (աբսցեսի) ձևավորմամբ: Այս պարագայում հիվանդի վիճակը կտրուկ վատանում է, բարձրանում է մարմնի ջերմաստիճանը, փոշտի մակերեսը դառնում է փայլուն, և դիպչելիս սուր ցավ է առաջացնում: Էպիդիդիմիտը կարող է վերածվել ամորձաբորբի (օրխիտի): Հիվանդության երկարատև ընթացքի դեպքում տեղի է ունենում շարակցական հյուսվածքի գերաճ, ինչը հանգեցնում է մակամորձու անանցանելիության, այսինքն՝ անպտղության:

Բուժումը

Էպիդիդիմիտի բուժման ընթացքում պահպանվում է անկողնային ռեժիմ, բացահայտվում են հիվանդության առաջացման պատճառերը: Փոշտը ֆիքսում են բարձր դիրքում սրբիչի օգնությամբ, որպեսզի սահմանափակեն շարժունակությունը: Անհրաժեշտ է հետևել սննդակարգին՝ բացառելով տապակած, յուղային, կծու սնունդը: Էպիդիդիմիտի սրացման շրջանում կիրառվում են սառը թրջոցներ կամ սառույց են դնում փոշտի վրա (1-2 ժամ սառը, 30 րոպե ընդմիջում): Նշանակվում են հակաբիոտիկներ, վիտամիններ, ֆերմենտներ ու ներծծվող դեղամիջոցներ: Հիվանդության սուր ախտանշանների մեղմացման դեպքում ցուցվում են փոշտի տաք թրջոցներ և ֆիզիոթերապիա:

Կանխարգելումը

Էպիդիդիմիտի կանխարգելումն ուղղված է առաջին հերթին այդ հիվանդության կանխմանը և միզասեռական վարակների ժամանակին բուժմանը:

Փոշտի վնասվածքի դեպքում անհրաժեշտ է խստորեն հետևել բժշկի ցուցումներին: Էպիդիդիմիտի ամենաչնչին կասկածի դեպքում անհրաժեշտ է անհապաղ դիմել ուրոլոգի: Պատահական սեռական կապերի դեպքում անհրաժեշտ է պարբերաբար հետազոտության նմուշ հանձնել սեռավարակների (սիֆիլիսի, գոնորեայի, քլամիդիոզի և այլն) ստուգման համար և դրանց առկայության դեպքում ժամանակին բուժել: Նաև կարևոր է ձմռանը պահպանել տաք ռեժիմ՝ խուսափելով գերսառեցումից:

Բարձրացնում ենք իմունիտետը, որպեսզի պաշտպանվենք վարակներից

Բարձրացնում ենք իմունիտետը, որպեսզի պաշտպանվենք վարակներից

Սթրեսը, քրոնիկ հոգնածությունը, առողջարար սննդի ու առհասարակ օրգանիզմին անհրաժեշտ սննդանյութերի պակասը դառնում են իմունիտետի անկման հիմնական պատճառ․․․․

Հոմոցիստեին

Հոմոցիստեին

Հոմոցիստեինի փոխանակության գործում կարևոր դեր են խաղում В6, В12 վիտամինները և ֆոլաթթուն․․․

Հուզականությունը հղիության ընթացքում․ ի՞նչ անել

Հուզականությունը հղիության ընթացքում․ ի՞նչ անել

Հղիությունն իր ամբողջ էությամբ նոր փորձ է կնոջ համար, նոր փորձ իր հոգեբանական և ֆիզիկական դրսևորումներով։ Ընդ որում յուրաքանչյուր հղիություն տարբերվում է իր նախորդից և միշտ էլ կարող է անակնկալներ մատուցել․․․

Ինչպե՞ս զսպել վնասակար սնունդ ուտելու ցանկությունը

Ինչպե՞ս զսպել վնասակար սնունդ ուտելու ցանկությունը

Մարդիկ, ովքեր ցանկանում է հրաժարվել վատ սովորություններից և սկսել առողջ սնվել, գիտեն, որ ամենադժվարը սիրելի, բայց վնասակար ուտելիքների գայթակղությանը դիմանալն է․․․