Հեշտոցի արտադրությունը փոքրիկ աղջիկների դեպքում

Հեշտոցի արտադրությունը փոքրիկ աղջիկների դեպքում

Կա մի այնպիսի համոզմունք, որ կանանց բազմաթիվ հիվանդություններ ունենում են միայն սեռական կյանք վարող կանայք: Դա է պատճառը, որ փոքրիկ աղջնակների դեպքում արտադրություն հայտնաբերելը հաճախ վախեցնում է մայրիկներին, որոնք ընդունում են այն որպես երեխայի առողջությանը վտանգ սպառնացող երևույթ:

Պարզենք, թե որ դեպքում է արտադրությունը համարվում բնականոն և որ դեպքում է այն վտանգավոր ու պահանջում մանկական գինեկոլոգի այց: Հեշտոցի արտադրությունը բնորոշ է իգական սեռի ներկայացուցիչներին բոլոր տարիքներում (նույնիսկ նորածիններին): Այս արտադրությունը կնոջ վերարտադրողական համակարգի օրգանների գործունեության և ինքնամաքրման արդյունք է:

Սովորաբար հեշտոցային սեկրետը (արտադրությունը) բաղկացած է լինում՝

  • նորացվող բջիջներից, որոնք պատում են ներքին սեռական օրգանների մակերեսը,
  • լորձից, որն արտադրվում է արգանդի խոռոչի և պարանոցի գեղձերի կողմից,
  • միկրոօրգանիզմներից,
  • արյան բջիջներից և այլ բաղադրիչներից:

Փոքր աղջիկների հեշտոցային արտադրությունը լինում է ֆիզիոլոգիական և պաթոլոգիական ծագման:

Բնականոն համարվող արտադրություն, որից պետք չէ վախենալ

Այսպիսին է համարվում բաց գույն ունեցող, լորձանման արտադրությունը, որը կարող է պարունակել ձգվող թելանման կամ փշուրանման խառնուրդներ: Երիտասարդ մայրիկները կարող են չանհանգստանալ, եթե հայտնաբերեն այս բնույթի արտադրություն։ Առատ լորձանման արտադրություն հաճախ է հանդիպում նորածինների կյանքի երկրորդ շաբաթում: Հազվադեպ հնարավոր է, որ արտադրության մեջ երևան արյան հետքեր, և հնարավոր է այն ուղեկցվի նաև կաթնագեղձերից պղտոր, խիտ հեղուկի արտադրությամբ: Անհանգստանալու կարիք չկա, քանի որ նման երևույթը բացառապես անվտանգ է և կոչվում է նորածինների սեռական կամ հորմոնային կրիզ: Այն բնականոն երևույթ է և ունի իր բացատրությունը: Այդ միջոցով է երեխայի օրգանիզմը պատասխանում մայրիկի սեռական հորմոնների մակարդակի բարձրացմանը, որոնք հայտնվում են իր օրգանիզմում ընկերքի կամ կաթի միջոցով: Այս վիճակը բուժում չի պահանջում: Պարզապես անհրաժեշտ է ավելի ուշադիր հետևել երեխայի հիգիենային:

Երեխայի սեռական զարգացման 3-4-րդ շաբաթներից հետո գալիս է հորմոնային հանգստի շրջանը: Մինչև երեխայի 7-8 տարեկանը, երբ սկսվում է նախասեռական հասունացման շրջանը, լորձանման արտադրությունը գրեթե ամբողջությամբ վերանում է: Սեռական զարգացման այս շրջանը բնորոշվում է օրգանիզմի հորմոնային ֆոնի վերակառուցմամբ: Առաջին դաշտանի սկսվելուց մոտ մեկ տարի առաջ հորմոնային փոփոխությունների ազդեցության ֆոնին կարող է կրկին նկատվել հեշտոցային՝ ֆիզիոլոգիական արտադրություն: Իննից տաս տարեկանում կամ ոմանց դեպքում 15 տարեկանում արտադրությունը դառնում է ցիկլային, առատ և այդպես կարգավորվում է մենստրուալ ցիկլը:

Պաթոլոգիական արտադրություն, պատճառները և նշանները

Նորածինների դեպքում պաթոլոգիական արտադրությունը բնորոշվում է առատությամբ, արյան կամ թարախի առկայությամբ, ինչպես նաև սուր, տհաճ հոտով: Սովորաբար թարախային արտադրությունը հեշտոցի լորձաթաղանթը կամ արտաքին սեռական օրգանները ախտահարող բորբոքային պրոցեսի հետևանք է լինում: Դրա պատճառը երեխայի հեշտոցի և վուլվայի (արտաքին սեռական օրգաններ) ֆիզիոլոգիական առանձնահատկություններն են: Բանն այն է, որ փոքր աղջնակների հեշտոցը պատող լորձաթաղանթը փխրուն և նուրբ կառուցվածք ունի: Բացի այդ, երեխաների հեշտոցում չկան համապատասխան պայմաններ, որ այնտեղ գոյատևեն կաթնաթթվային ցուպիկները: Իսկ դրանք հասուն կնոջ դեպքում ապահովում են թթվային միջավայր, որը կանխում է ախտածին բակտերիաների ու սնկերի զարգացումը: Այնպես որ՝ մանկան հեշտոցի միջավայրը հիմնային է և այնտեղ մշտապես առկա են պայմանականորեն ախտածին միկրոօրգանիզմներ: Ցածր իմունիտետի, հիգիենայի կանոնների խախտման, ալերգիկ հիվանդությունների դեպքում այդ բակտերիաներն սկսում են ակտիվորեն բազմանալ, ինչն էլ հանգեցնում է արտադրության:

Բորբոքային պրոցեսի սկիզբը բնութագրվում է ոչ միայն ախտածին դեղին կամ կանաչավուն արտադրության ի հայտ գալով, այլև այնպիսի նշաններով, ինչպիսիք են՝

  • արտաքին սեռական օրգանների և հարակից շրջանի մաշկի կարմրություն՝ հիպերեմիա,
  • այտուցվածություն,
  • թույլ կամ ուժեղ այրոց և քոր, որոնք կտրուկ սրանում են միզարձակման ժամանակ:

Դեղնականաչավուն արտադրությունը վկայում է բակտերիալ վուլվովագինիտի (շեքի և հեշտոցի լորձաթաղանթի բորբոքում) առկայության մասին: Հեշտոցի միկրոֆլորայի հավասարակշռության խախտման դեպքում առաջացող արտադրությունն ունենում է մոխրագույն կամ կաթնային կրեմանման սպիտակ տեսք և ուղեկցվում է տհաճ հոտով: Եթե աղջնակի օրգանիզմում առկա լինի տրիխոմոնադային վարակ (ծննդաբերական ուղիների անցման ժամանակ), կառաջանա փրփուրանման արտադրություն: Ալերգիկ վուլվովագինիտի դեպքում արտադրությունը կլինի ջրիկ, իսկ լորձաթաղանթը՝ շատ բարակ ու չոր:

Ո՞ր դեպքերում է պահանջվում բուժում

Բուժումը նշանակվում է բացառապես բժշկի կողմից: Երեխայի տարիքից և նրա քրոնիկական հիվանդությունների առկայությունից կախված մշակվում է անհատական ծրագիր: Նախ և առաջ բժիշկը պարզում է, թե ինչն է վուլվովագինիտի հարուցիչը, որքանով է այն զգայուն հակաբիոտիկների նկատմամբ: Այնուհետև նշանակում է դեղորայքային բուժում՝ հակասնկային, հակաբիոտիկ դեղամիջոցներով և այլն: Սուր ընթացքի և առատ արտադրության դեպքում երեխային անհրաժեշտ է խիստ անկողնային ռեժիմ:

Եթե պարզվում է, որ հիվանդության առաջացմանը նպաստել է ճիճվային վարակը, ապա անհրաժեշտ է բուժում իրականացնել նաև փոքրիկի ծնողների համար: Ընդ որում՝ խորհուրդ է տրվում դեղորայքային բուժմանը զուգահեռ երեխային խոտաբուսային կամ հակասեպտիկ թուրմերով լվացումներ կատարել:

Կարելի է կիրառել հետևյալ կանխարգելիչ միջոցները՝

  • վարել ճիշտ, առողջ ապրելակերպ,
  • զգույշ լինել տարբեր վարակներ կրող մարդկանց հետ շփվելիս,
  • պահպանել հիգիենայի կանոնները,
  • հնարավորինս շուտ բուժել ցանկացած վարակային հիվանդություն:

Այսպիսով՝ եթե նկատել եք պաթոլոգիական արտադրություն, ապա երեխային հնարավորինս շուտ տարեք բժշկի, որպեսզի խուսափեք բարդացումներից և կրճատեք բուժման ժամանակահատվածը: Հիշեք, որ հիվանդությունն ավելի հեշտ է բուժել վաղ շրջանում:

 

Աղբյուրը՝ mama.ru

Թարգմանությունը և ադապտացիան՝ sotskiy.am

Լորձային արտադրություն հեշտոցից

Լորձային արտադրություն հեշտոցից

Հեշտոցից արտահոսող լորձային արտադրությունը, եթե նորմալ բնույթի է, բնական երևույթ է։ Վերարտադրողական տարիքի բոլոր կանայք էլ ունենում են...

Տրամադրությունը պայմանավորող հորմոնները

Տրամադրությունը պայմանավորող հորմոնները

Պատասխանատու են մեր հոգեհուզական վիճակի համար։ Ահա այն հիմնական հորմոնները, որոնք պայմանավորում են մեր լավ տրամադրությունը․․․

Գեղեցկության և առողջության երաշխիքները

Գեղեցկության և առողջության երաշխիքները

Տարիքին համընթաց օրգանիզմում բազմաթիվ փոփոխություններ են կատարվում, ոմանք, այնուամենայնիվ, շարունակում են պահպանել իրենց գեղեցիկ տեսքն ու առողջությունը․․․

Ե՞րբ պլանավորել հղիությունը վիժումից հետո

Ե՞րբ պլանավորել հղիությունը վիժումից հետո

Հաճախ է պատահում, որ կանայք, որոնց դեպքում վիժումը եղել է հղիության վաղ ժամկետում, ցանկանում են հղինալ վիժումից անմիջապես հետո․․․․