Ինչո՞ւ են հղիության թեստերը երբեմն սխալ արդյունք ցույց տալիս

Ինչո՞ւ են հղիության թեստերը երբեմն սխալ արդյունք ցույց տալիս

Այսօր կանանց ճնշող մեծամասնությունը հղիության հաստատման կամ ժխտման նպատակով առաջին հերթին օգտվում է տան պայմաններում անցկացվող թեստերից: Վերջիններս մատչելի են, պարզ, հարմար և արագ: Գրեթե միշտ (97-99%) թեստը հավաստի պատասխան է ցույց տալիս: Իսկ մնացյալ 1-3%-ը ոչ: Ինչ պատճառներով են հղիության թեստերը երբեմն սխալվում:

Ի՞նչ սկզբունքով է աշխատում հղիության թեստը

Խնդրի էությունը հասկանալու համար նախ պարզենք, թե ինչպես է թեստն աշխատում: Եթե մի կողմ դնենք սուբյեկտիվ զգացողությունները, ապա հղիության ամենավաղ նշանը սաղմի կողմից արտադրվող մարդու խորիոնային գոնադոտրոպինն է, որն անցնում է ինչպես արյան, այնպես էլ հղի կնոջ մեզի մեջ: Հենց այս հորմոնն է, որի նկատմամբ զգայուն է թեստը:

Ավելի պարզ ասած՝ թեստի ներծծող հատվածը, որն ընկղմվում է մեզի մեջ, պարունակում է մի նյութ, որը քիմիապես կապված է գունանյութի հետ: Մեզի մեջ ՄԽԳ-ի առկայության դեպքում հղիությունը հաստատող գծիկի հատվածում, որը ևս մեկ բաղադրիչ է պարունակում, ռեակցիա է տեղի ունենում, գունանյութն ազատ է արձակվում և երևում է գունավոր գծիկը (հաճախ մորեգույն կամ կապույտ): Եթե վերոնշյալ հորմոնը բացակայում է, ապա ռեակցիա տեղի չի ունենում, և գծիկը չի գունավորվում: «Ստուգիչ գծիկը» պարունակում է մի նյութ (ռեագենտ), որի հետ փոխազդելիս գունանյութն ազատ է արձակվում ցանկացած դեպքում, անկախ մեզում ՄԽԳ-ի առկայությունից:

Կեղծ բացասական արդյունք

Պետք է ասել, որ կեղծ բացասական արդյունքը (երբ կա հղիություն, սակայն թեստն այն ցույց չի տալիս) ավելի հաճախ է հանդիպում, քան կեղծ դրական արդյունքը: Պատճառը հաճախ թեստի սխալ կիրառումն է կամ շտապողականությունը: Թեստերի առավելագույն զգայունակությունը, ավելի ճիշտ՝ ՄԽԳ-ի նվազագույն քանակը 20-25 մՄՄ/մլ է (գործնականում մոտ 50): Արյան շիճուկում ՄԽԳ-ի խտությունը բեղմնավորումից միայն 7-10-րդ օրն է հասնում այդ ցուցանիշին և շարունակվում է կրկնապատկվել յուրաքանչյուր 2-3-րդ օրը: Մեզի մեջ հորմոնի քանակը մոտավորապես կրկնակի քիչ է, քան արյան մեջ: Հետևաբար թեստը հնարավոր է անցկացնել բեղմնավորումից հետո 10 օրից ոչ շուտ, իսկ հավաստի պատասխան ստանալու համար՝ դաշտանի ուշացման առաջին օրից սկսած, ինչպես և խորհուրդ են տալիս թեստեր արտադրողները:

Կեղծ բացասական պատասխանի այլ պատճառներից են.

  • Թեստից առաջ մեծ քանակությամբ հեղուկի կամ միզամուղ դեղամիջոցների օգտագործումը: 
  • Երիկամների և սրտանոթային համակարգի այնպիսի հիվանդությունները, որոնք խոչնդոտում են բավարար խտությամբ ՄԽԳ-ի արտազատմանը:
  • Կենսաքիմիական հղիությունը կամ վիժման վտանգը: Այս դեպքում ՄԽԳ-ի խտությունը նվազում է:
  • Արտարգանդային կամ մեռելածին հղիությունը: ՄԽԳ-ի պարունակությունն ավելի քիչ է, քան արգանդային հղիության պարագայում:

Կեղծ դրական արդյունք

Կեղծ դրական արդյունքն ավելի հազվադեպ է հանդիպում, քանի որ կնոջ օրգանիզմում հղիության բացակայության պայմաններում ՄԽԳ-ի արտազատման պատճառներն այնքան էլ շատ չեն: Հնարավոր է, որ թեստը երկու գծիկ ցույց տա.

  • Ծննդաբերությունից հետո մի քանի շաբաթվա ընթացքում (ինչպես հեշտոցային, այնպես էլ կեսարյան հատմամբ):
  • Վիժումից, արտարգանդային հղիության հեռացումից կամ աբորտից հետո:
  • ՄԽԳ արտադրող թրոֆոբլաստիկական ուռուցքների առկայության պայմաններում:
  • ՄԽԳ դեղամիջոցների ընդունման դեպքում (վերջին ընդունումից հետո մոտավորապես 10 օրվա ընթացքում):

Հավաստի արդյունք ստանալու համար անհրաժեշտ է արյան շիճուկում ՄԽԳ-ի առկայության քանակական հետազոտությունն անել 2 անգամից ոչ պակաս, 2-3 օր ընդմիջումով: ՄԽԳ-ի խտության նվազումը վկայում է, որ դուք հղի չեք:

Սխալմունքի այլ պատճառներ

Կան մի շարք գործոններ, որոնց պատճառով թեստը սխալ արդյունք է ցույց տալիս, ընդ որում՝ և՛ դրական, և՛ բացասական պատասխանի դեպքում:

Հղիության թեստ. ինչին ուշադրություն դարձնել

Անորակ թեստ: Ցածրորակ թեստերի դեպքում ստուգիչ գծիկը խոնավանալիս կարող է ներթափանցել հղիությունը հաստատող գծիկի հատված, ինչը թյուրիմացաբար ընդունվում է որպես դրական արդյունք:

Անպիտան թեստ: Տուփի վրա սովորաբար նշվում է, որ, եթե թեստի վրա ոչ մի գծիկ չի հայտնվում, նշանակում է, որ պիտանի չէ: Ոչ բոլորն են ուշադրություն դարձնում այս հանգամանքին:

Թեստի պահպանման պայմաններ: Սխալ պահպանման դեպքում, ինչպես գնելուց առաջ, այնպես էլ հետո, հնարավոր է, որ թեստը սխալ արդյունք ցույց տա:

Պիտանելիության ժամկետ: Թեստը հետագայում օգտագործելու նպատակով գնելու դեպքում օգտագործելուց առաջ ուշադրությոն դարձրեք պիտանելիության ժամկետին:

Օգտագործման ձև: Հնարավոր է, որ թեստի սխալ անցկացումը հանգեցնի ինչպես կեղծ դրական, այնպես էլ կեղծ բացասական արդյունքի: Օրինակ՝ գծիկը մեզի մեջ անհրաժեշտ քանակով չընկղմելու դեպքում հնարավոր է, որ մեզն ընդհանրապես չներծծվի արդյունքների հատվածում:

Արդյունքները տուփի վրա նշված ժամկետից ուշ մեկնաբանելու դեպքում գունանյութը կարող է տարածվել շրջակա միջավայրի գործոնների կամ խոնավության ազդեցությամբ:

Մեզի մեջ սպիտակուցների առկայություն: Թեստ-գծիկի գործող նյութը բնույթով սպիտակուցային է, ըստ այդմ՝ տրամաբանական կլինի եզրակացնել, որ մեզի մեջ սպիտակուցի առկայությունը կարող է խեղաթյուրել արդյունքը:

Հոգեբանական գործոն: Հատկապես զգայուն և կասկածամիտ կանայք հղիության պլանավորման դեպքում կարող են ոչ միայն զգալ գոյություն չունեցող հղիության բոլոր նախանշանները, այլև տեսնել երկրորդ գծիկն այնտեղ, որտեղ այն չկա: Այս պարագայում լավ կլինի թեստի մեկնաբանումը վստահել այլ մարդու՝ ամուսնուն, ընկերուհուն, մորը և այլն:

Ինչպե՞ս խուսափել սխալներից

Որպեսզի կեղծ հույսեր չփայփայեք և զուր տեղը չընկճվեք, թեստն անցկացնելիս պետք է հստակ առաջնորդվել հրահանգներով, ինչպես նաև կարելի է՝

  • անցկացնել ոչ թե մեկ, այլ երկու թեստ (տարբեր արտադրողների),
  • թեստը կրկնել 2-3 օր հետո՝ անկախ սկզբնական արդյունքից,
  • արյուն հանձնել ՄԽԳ-ի առկայությունը որոշող հետազոտության համար (ցանկալի է պարբերաբար՝ 2-3 օր ընդմիջմամբ):
Նորածինների մոտ առկա որոշակի տարօրինակություններ, որոնք առաջին հայացքից կարող են վախեցնել անփորձ ծնողներին

Նորածինների մոտ առկա որոշակի տարօրինակություններ, որոնք առաջին հայացքից կարող են վախեցնել անփորձ ծնողներին

Ծնվելուց հետո առաջին չորս շաբաթվա ընթացքում երեխայի օրգանիզմը ներարգանդային կյանքից անցում է կատարում դեպի հետծննդյան շրջան

Ինչպե՞ս հեռացնել սպիները էպիզիոտոմիայից  (շեքահատում) և ծննդաբերական այլ վնսվածքներից հետո

Ինչպե՞ս հեռացնել սպիները էպիզիոտոմիայից (շեքահատում) և ծննդաբերական այլ վնսվածքներից հետո

Հետծննդաբերական նույնիսկ փոքր սպին կարող է վատթարացնել սեռական կյանքի որակը

Ի՞նչ է հարկավոր վերցնել Ձեզ հետ ծննդատուն գնալիս

Ի՞նչ է հարկավոր վերցնել Ձեզ հետ ծննդատուն գնալիս

Առանձին թղթապանակում հարկավոր է հավաքել բոլոր անհրաժեշտ փաստաթղթերը և դրանց կրկնօրինակները

Ճիշտ շնչառությունը ծննդաբերության ընթացքում

Ճիշտ շնչառությունը ծննդաբերության ընթացքում

Ծննդաբերության ընթացքում ճիշտ շնչառությունը հեշտացնում է կծկանքների ընթացքը և բարելավում է մայրիկի և երեխայի ինքնազգացողությունը: