Ինչպես վարվել դաշտանի օրերին
31086
Դաշտանը չպետք է փոխի կյանքի բնականոն ընթացքը: Լոգանքն անգամ օգտակար է: Բանն այն է, որ դաշտանի օրերին պետք է խստորեն պահպանել հիգիենայի կանոններին, քանի որ այս շրջանում մեծանում է վարակների նկատմամբ զգայունակությունը: Արտաքին սեռական օրգանները պետք է լվանալ օրական 3-4 անգամ, անհրաժեշտության դեպքում՝ ավելի հաճախ: Խորհուրդ է տրվում օճառ չօգտագործել:
Ֆիզկուլտուրայով զբաղվելը չի արգելվում, սակայն անհրաժեշտ է խուսափել շեքի հատվածի ծանրաբեռնվածությունից:
Սննդակարգում պետք է նվազեցնել քաղցրեղենի, կենդանական ճարպի, աղի, համեմունքների, ապուխտների և շոկոլադի քանակը: Միևնույն ժամանակ օգտակար է կաթնաշոռը, կարմիր միսը, կանաչեղենը, խնձորը, խոտաբույսերը՝ կատվախոտ, մասուր, երիցուկ:
Դաշտանի ընթացքում հարկավոր է լիարժեք քուն առնել, գիշերը երկար ժամանակ չանցկացնել հեռուստացույցի կամ համակարգչի մոտ, առավել հետևողական լինել մարմնի մաքրության նկատմամբ:
Խորհուրդ է տրվում այս շրջանում պահպանել հոգեկան հանգստությունը, խուսափել վիճաբանություններից, զերծ մնալ անախորժ իրադարձություններից, քանի որ հակառակ դեպքում դաշտանը կարող է և ցավոտ անցնել:
Հաճախ դեռատի աղջիկներին հուզում է մի հարց՝ արդյո՞ք համադասարանցիներն զգում են, որ ինքը դաշտան ունի: Իհարկե ոչ: Հաճախ մաշկը մաքրվում է բշտիկներից, երբեմն թեթև գունատություն է նկատվում, աստիճանաբար լավանում է ինքնազգացողությունը և բարձրանում է տրամադրությունը: Իզուր չէ, որ դաշտանն ունի ժողովրդական այլ անվանում ևս՝ ամենամսյա մաքրում:
Երբ բժիշկը նախազգուշացնում է ծնողներին դստերը դաշտանի սկզբին նախապատրաստելու անհրաժեշտության մասին, հաճախ ստանում է հետևյալ պատասխանը՝ ժամանակը կգա, կիմանա: Արդյունքում արյան ի հայտ գալուն պես (իսկ արյունը երեխաների պատկերացումներում սարսափելի հիվանդության նշան է) աղջիկը վախենում է, ուժգին սթրես ապրում:
Երբեմն նախազգուշացված չլինելով՝ աղջիկները ոչ մաքուր թաշկինակներ, անձեռոցիկներ կամ զուգարանի թուղթ են օգտագործում դաշտանի օրերին՝ դրանով իսկ իրենց ենթարկելով վարակման վտանգին:
Որոշ աղջիկների պարագայում առաջին դաշտանից առաջ ամիսը մեկ անգամ թույլ ցավ է զգացվում որովայնի ստորին հատվածում: Պետք չէ հատուկ սպասել այդ ցավին, հնարավոր է, որ այն չլինի ընդհանրապես: Այնուամենայնիվ, դաշտանի մասին հիմնական տեղեկությունները պետք է հայտնել երեխային դեռևս 9 տարեկանում:
Արյան սակավություն ունեցող աղջիկների նախապատրաստումը պետք է իրականացվի արյունաբանի և մանկաբույժի հսկողությամբ՝ նախ բուժելով անեմիան՝ սակավարյունությունը: Անհրաժեշտ է սննդակարգում ավելացնել մսի, խնձորի, մեղրի քանակը: Երբեմն բժիշկը բուժումը նշանակում է երկաթ պարունակող դեղամիջոցներով:
Չափից առատ՝ մեկ շաբաթից ավել տևող դաշտանի դեպքում հարկավոր է դիմել մանկաբույժի, ինչպես նաև խորհրդակցել գինեկոլոգի և արյունաբանի հետ՝ կատարելով արյան նախնական հետազոտություն:
