Ուրետրիտը՝ միզուղիների բորբոքումը, հանդիպում է ինչպես տղամարդկանց, այնպես էլ կանանց դեպքում։ Կախված առաջացման պատճառից՝ տարբերում են ինֆեկցիոն և ոչ ինֆեկցիոն ուրետրիտ։

Որո՞նք են առաջացման պատճառները

Ինֆեկցիոն ուրետրիտն առաջանում է սեռավարակների պատճառով և իր հերթին լինում է երկու տեսակի՝

• սպեցիֆիկ ինֆեկցիոն ուրետրիտ,
• ոչ սպեցիֆիկ ուրետրիտ։

Ոչ ինֆեկցիոն ուրետրիտն առաջանում է ալերգիկ ռեակցիաների, միզուղիների վնասվածքների (օրինակ միզային կաթետրի պատճառով առաջացած) և այլ պատճառներով։ Հաճախ ոչ ինֆեկցիոն ուրետրիտը վերածվում է ինֆեկցիոնի, երբ վարակ է գումարվում։

Ինչպե՞ս է դրսևորվում հիվանդությունը

Ուրետրիտի հիմնական դրսևորումներն են՝ այրոց, ցավ կամ կտրող զգացում միզելիս, հատկապես՝ սկզբում, ցավ շեքի հատվածում և արտադրություն միզուկից։ Արտադրությունը սովորաբար առավոտյան է դիտվում։

Ոչ սպեցիֆիկ բակտերիալ ինֆեկցիայի դեպքում այն առատ է, լորձաթարախային բնույթի, կապտականաչ, տհաճ հոտով։

Գոնորեային ուրետրիտի դեպքում արտադրությունն առավոտյան է նկատվում՝ միզուղիներից եկող սպիտակ թարախի կաթիլի տեսքով։ Կանանց դեպքում ուրետրիտի բարդություններից են՝ հեշտոցի միկրոֆլորայի խախտումը, միզապարկի բորբոքումը (ցիստիտ) և միզուղիների բորբոքային այլ հիվանդությունները։

Ախտորոշումը և բուժումը

Վերոնշյալ ախտանշանները նկատելու դեպքում հարկավոր է դիմել ուրոլոգի որը համապատասխան հետազոտություններ կնշանակի՝ մանրէաբանական ցանքս և ՊՇՌ, որպեսզի պարզի հիվանդության հարուցչի տեսակը։

Հաճախ կանանց դեպքում ախտանշաններն արտահայտված չեն լինում։ Այդ պարագայում վարակը հայտնաբերվում է միայն լաբորատոր հետազոտություն կատարելուց հետո, ընդ որում՝ հնարավոր է, որ վարակն անցնի զուգընկերոջը, որի դեպքում ախտանշաններն ավելի սուր ու արագ կարտահայտվեն։