Վարժություններ լողավազանում․ հետծննդյան վերականգնում
7509
Որոշ կանայք բավականին արագ և շատ են նիհարում ծննդաբերությունից հետո, սակայն հաճախ, այնուամենայնիվ, գիրանում են։ Ոմանց հաջողվում է վերադարձնել հղիությունից առաջ ունեցած կազմվածքը, ոմանց՝ ոչ։ Այս հարցում կարևոր տարբերություն կա։ Պաթոլոգիական գիրությունն այլ բան է, կնոջ և աղջկա կազմվածքի բնական տարբերությունները՝ այլ։
Կազմվածքի վերականգնման գործում շատ օգտակար է լողը, քանի որ ջուրը քաշը նվազեցնելու լավագույն միջոցներից է և լողավազանում հատուկ վարժություններ կատարելով հնարավոր է ոչ միայն նիհարել, այլև վերականգնել ողնաշարի վիճակը։
Լողավազանում մարզվելիս գործնականորեն անհնար է վնասվածքներ ստանալ, ինչը շատ կարևոր է մկանների ու հոդերի թուլություն ունեցող մարդկանց համար։ Անգամ տարրական շարժումները դժվարությամբ են կատարվում ջրում, քանի որ այն դիմադրում է մեր մարմնին և մկաններին ստիպում է աշխատել։ Այդ պատճառով մկաններում նյութափոխանակությունը հնարավոր է ակտիվացնել պարզ վարժությունների միջոցով, որոնք լողավազանից դուրս անելու դեպքում առանձնապես օգտակար չէին լինի։
Բացի այդ ամենը, ջրային միջավայրը մերսող ազդեցություն է թողնում կմախքային մկանների և ներքին օրգանների վրա, ինչն իր հերթին բարենպաստ է ազդում ամբողջ օրգանիզմի վրա։
Վարժություններ
Մեջքով սեղմվեք լողավազանի պատին և ձեռքերը հետ տանելով՝ բռնեք եզրից։ Ներս քաշեք որովայնը և ծնկները ծալելով՝ ոտքերը սեղմեք կրծքին։ Ոտքերը հնարավորինս թեքեք մեկ աջ, մեկ ձախ։ Յուրաքանչյուր կողմ թեքվելիս չորս հաշվով մնացեք այդ վիճակում և սկզբնական դիրքի վերադարձեք, թուլացեք։ Կրկնեք 10-20 անգամ։
Դեմքով դեպի լողավազանի եզրը շրջվեք և բռնվեք, ծալեք արմունկները և ոտքերը պահեք այնպես, ինչպես սովորաբար պահում եք լողալիս։ Ձգեք և ներս քաշեք որովայնը, ոտքերը միացրեք իրար և սկսեք դանդաղորեն ծալել ծնկները և ոտքերը մոտեցնել կրծքին։ Մինչև չորսը հաշվեք և թուլացրեք ոտքերը և թոըյլ տվեք իջնել ներքև։ Կրկնեք 10-20 անգամ։
Մեջքով կանգնեք դեպի լողավազանի եզրը, տարածեք ձեռքերը և բռնեք եզրից։ Իրար կպցնելով ոտքերը՝ թուլացրեք և իջեցրեք ներքև, այնուհետև ներս քաշեք որովայնը և ճոճեք ուղիղ պահած ոտքերը նախ աջ, ապա մեջտեղ և ձախ։ Ուսերը և մարմնի վերին հատվածը պետք է անշարժ մնան։ Կրկնեք 10-20 անգամ։
Ողնաշարի և պարանոցի մկանները թուլացնելու և հանգստացնելու համար խորհուրդ ենք տալիս լողալ մեջքի պառկած վիճակում։
Նմանատիպ նյութեր
Մարմնամարզության դրական ազդեցությունը հղիության ընթացքում
Մարմնամարզությունը ծննդաբերությանը հաջորդող 3-5 օրվա ընթացքում
Հետծննդաբերական մարմնամարզություն․ մինչև 6-րդ շաբաթ
Մարմնամարզություն ծննդաբերությունից հետո․ 6-րդ շաբաթից մինչև 3-րդ ամիս
Մարմնամարզություն․ հարթ որովայն ծննդաբերության 6-րդ ամսից հետո
