Ուրեապլազմա և միկոպլազմա

25.02.201417653

Գինեկոլոգիական հետազոտություններ անցած կանանց շրջանում բավականին հաճախ հայտնաբերվում են ուրեապլազմաներ և միկոպլազմաներ։ Ի՞նչ միկրոօրգանիզմներ են դրանք և ինչ հետևանքներ կարող են ունենալ։

Ուրեապլազմաները և միկոպլազմաները միկրոօրգանիզմներ են, որոնք հանդիպում են մարդու վերին շնչառական ուղիներում և միզասեռական համակարգում։ Հայտնի է միկոպլազմայի մոտ 20 տեսակ, որոնցից չորսը կարող են հիվանդություններ առաջացնել։

Սեռական կյանքով ապրող ամեն չորրորդ կին ունի ուրեապլազմա։ Մարդկային միկոպլազման կանանց շրջանում ավելի հազվադեպ է հանդիպում՝ ամեն տասներորդ կնոջ մոտ։ Գենիտալ միկոպլազմա է հայտնաբերվել նաև նորածին երեխաների և սեռական ոչ ակտիվ կյանք վարող կանանց շրջանում։

Մինչև այսօր անհայտ է, թե ինչու ուրեապլազմաների և միկոպլազմաների տարածված լինելու պարագայում դրանք ոչ բոլոր վարակվածների դեպքում են հիվանդություններ առաջացնում։ Հիվանդանում են ցածր դիմադրողականություն ունեցող անձինք։ Կանանց միկոպլազման կարող է դառնալ արգանդի վզիկի բորբոքման (ցերվիցիտի) պատճառ։ Բակտերիալ վագինոզի և կանացի սեռական օրգանների բորբոքման դեպքում հաճախ առանձնացնում են միկոպլազման և ուրեապլազման։ Այս հարուցիչների առկայությունը կարող է պիելոնեֆրիտի, աբորտի և ծննդաբերությունից հետո բարդությունների պատճառ դառնալ։ Հղիության ընթացքում ընկերքի վարակման պատճառով նկատվում է վաղաժամ ծննդաբերություն, նորածինների դեպքում`թոքերի բորբոքում, սեպսիս, մենինգիտ։

Ուրեապլազմաների և միկոպլազմաների պատճառով առաջացած հիվանդությունների ախտորոշման համար օգտագործվում են պոլիմերազ շղթայական ռեակցիայի մեթոդով հետազոտությունը (ПЦР) և մանրէաբանական ցանքսը։ Պոլիմերազ շղթայական ռեակցիայի մեթոդը ախտորոշման ամենազգայուն և արագ մեթոդն է։ Սակայն այդ մեթոդի բարձր զգայունակության պատճառով հաճախ կարող են ստացվել կեղծ դրական արդյունքներ, ուստի պահանջվում է լրացուցիչ ախտորոշում։ Եթե հետազոտության ընթացքում հայտնաբերվել են միկրոօրգանիզմներ, դա դեռ չի նշանակում, որ առկա է նաև հիվանդությունը։

Անհրաժեշտ է հիվանդին մանրակրկիտ հետազոտել՝ անցկացնելով զննում, փոքր կոնքի օրգանների ուլտրաձայնային հետազոտություն, քսուքի, մեզի և այլ հետազոտություններ։ Ուրեապլազմայով և միկոպլազմայով հնարավոր է վարակվել սեռական ճանապարհով, օրգանների փոխպատվաստման հետևանքով և մորից հղիության կամ ծննդաբերության ժամանակ երեխային փոխանցվելու արդյունքում։ Ուրեապլազմայով և միկոպլազմայով վարակումը կանխարգելող միջոց է պահպանակը։