Շնչառական վարժություններ լավ ինքնազգացողության համար
17161
Շնչել: Ի՞նչը կարող է ավելի բնական լինել: Մենք չենք էլ պատկերացնում, թե որքան օգտավետ է մեզ համար յուրաքանչյուր ներշունչը և արտաշունչը: Որպեսզի զգանք դրանց բարենպաստ ներգործությունը, ամենևին էլ անհրաժեշտ չէ յոգայով զբաղվել: Գիտակցված շնչառության մասնագետ Լյուբով Բոգդանովան առաջարկում է կատարել չորս պարզ վարժություն, որոնք կօգնեն արագ լավացնել ինքնազգացողությունը:
Հանգստության հոգոց
Ինչո՞ւ: Որպեսզի կանգնեցնենք մտքերի հոսքը, թուլացնենք լարվածությունը, վերադառնանք «այստեղ և հիմա»:
Շնչառական այս վարժությունը թեթևության հոգոցի է նման, և կարելի է կատարել նաև հասարակական տրանսպորտում, փողոցում և անգամ աշխատավայրում: Խորը ներշունչ կատարեք՝ շրթունքները պահելով այնպես, կարծես օդ եք խմում ձողիկի միջով: Արտաշնչելիս բացեք բերանը՝ անձայն արտասանելով «ա-ա-ա»: Արտաշնչեք առանց ջանք ներդնելու, առավելագույնս հանգիստ: Կրկնեք երեք անգամ:
Մեկ բաժակ սուրճ
Ինչո՞ւ: Որպեսզի առույգանաք, բարձրացնեք տրամադրությունը, կանգնեցնենք մտքերի հոսքը, վերադառնանք «այստեղ և հիմա»:
Աչքերը փակ են, ոտքերը՝ ուսերի լայնության, ձեռքերը ծալված են, դրված կոնքերին: Շնչեք քթով կամ բերանով, ինչպես որ ավելի է դուր գալիս: Ներշնչելիս ձեռքերը պարզեք վեր՝ լայն բացելով ափերը: Արտաշնչելիս թուլացեք՝ վերադառնալով սկզբնական դիրքին: Ներշունչն ու արտաշունչը մի ընդմիջեք: Կրկնեք 20 անգամ, հանգստացեք և նորից կրկնեք 20-ական անգամ: Այս շնչառական վարժությունը կարող եք կատարել նաև նստած դիրքում:
Փետուրը քթում
Ինչո՞ւ: Որպեսզի թուլացնեք լարվածությունը, դուրս նետեք բացասական ապրումները՝ առանց վնասելու ձեզ և շրջապատող մարդկանց:
Խորը ներշունչ կատարեք (քթով կամ բերանով) և օդն արտաշնչեք քթով՝ կարճատև, ինտենսիվ դադարներ տալով: Կրկնեք երեք անգամ: Հանգստացեք և ևս երկու անգամ կրկնեք նույնը՝ յուրաքանչյուրը կատարելով երեք անգամ:
Կուժ
Ինչո՞ւ: Որպեսզի ներդաշնակություն զգաք ինքներդ ձեր և աշխարհի միջև, վերադառնաք «այստեղ և հիմա»:
Կլորացրեք շուրթերը կարծես թե պատրաստվում եք օդ խմել ձողիկով: Դանդաղ, խորը ներշնչեք բերանով: Պատկերացրեք, թե ինչպես է ձեր մարմինը որովայնից մինչև կոկորդ աստիճանաբար լցվում օդով: Չփոխելով շուրթերի դիրքը՝ դանդաղ արտաշնչեք բերանով: Արտաշնչելու ավարտին ներս քաշեք որովայնը՝ օգնելով, որպեսզի թթվածնի մնացորդն ամբողջովին դուրս գա: Կրկնեք երեք անգամ:
Սթրեսային իրավիճակներում շատերը, անգամ չնկատելով այդ, պահում են շունչը կամ էլ մակերեսորեն են շնչում, ինչը միայն ուժգնացնում է սթրեսը: Որպեսզի գիտակցված շնչառությունը դառնա կյանքի մի մասը, Լյուբով Բոգդանովան խորհուրդ է տալիս սկզբնական շրջանում հիշեցում դնել հեռախոսի վրա: Թող այն զանգ տա օրը մի քանի անագմ, անգամ ամենաանհարմար պահերին: Վերջիվերջո բոլոր այս վարժությունները հնարավոր է կատարել շրջապատի մարդկանց համար աննկատ:
