Ե՞րբ դիմել գինեկոլոգին

Ե՞րբ դիմել գինեկոլոգին

Գինեկոլոգ մասնագետի մասին գիտեն բոլոր կանայք. չէ՞ որ նա բացառապես կանանց բժիշկ է, ում աշխատանքն ուղղված է կանանց սեռական օրգանների պաթոֆիզիոլոգիայի և ֆիզիոլոգիայի հարցերի ուսումնասիրմանը, գինեկոլոգիական հիվանդությունների կանխարգելմանն ու բուժմանը: Կանայք գինեկոլոգին են դիմում տարբեր պատճառներով:

Ո՞ր խնդիրները կօգնի լուծել գինեկոլոգը

Գինեկոլոգի օգնությամբ լուծվող խնդիրները տարբեր են: Բժիշկը զննում է այցելուին, հետազոտման նյութ է վերցնում, ՈւՁՀ է անցկացնում, խորհուրդներ տալիս և խնդրի առկայության դեպքում առաջարկում համապատասխան բուժում: Եթե անհասկանալի կամ տհաճ զգացողություններ ունեք, ցիկլի խանգարում, անսովոր արտադրություն, պետք է դիմել բժշկի: Հղիություն եք նախատեսում, բուժվում եք անպտղությունից, հղի եք, բեղմնականխման մեթոդների կամ վարակներից պաշտպանվելու միջոցների մասին եք ցանկանում տեղեկանալ` կրկին պետք է դիմել գինեկոլոգի:

Կնոջ վերարտադրողական համակարգի հիվանդությունների ճիշտ ժամանակին հայտնաբերումից և բուժումից է կախված նրա ամբողջ օրգանիզմի առողջությունը:

Ե՞րբ այցելել գինեկոլոգի

Տարվա մեջ 1-2 անգամ պետք է պրոֆիլակտիկ բուժզննման նպատակով (անգամ ոչ բացահայտ գանգատների դեպքում) դիմել բժշկի: Հասարակ զննությունը, անհրաժեշտության դեպքում կատարվող ՈւՁՀ-ն և կոլպոսկոպիան կօգնեն կանխարգելել մի շարք հիվանդություններ կամ հայտնաբերել դրանք զարգացման վաղ փուլում և ժամանակին բուժել:

Հարկավոր է դիմել գինեկոլոգի նաև հետևյալ դեպքերում՝

  • եթե դաշտանը ցավոտ է, առատ և երկարատև (7 օրից ավել),
  • դաշտանն անկանոն է, 
  • դաշտանը չափազանց կարճատև է, 
  • միջդաշտանային արնահոսություն կա, 
  • դաշտանին նախորդող օրերի ընթացքում որովայնի ստորին հատվածում ցավ եք զգում, դեպրեսիա, թուլություն, դյուրագրգռություն եք նկատում, 
  • սեռական օրգանների այրոց և քոր ունեք, 
  • տհաճ հոտ և անսովոր արտադրություն եք նկատում,
  • սեռական շուրթերի շրջանում գրգռվածություն, ցան, գոյացություններ, կոշտացում եք նկատում, 
  • ցավ եք զգում սեռական հարաբերության ընթացքում կամ հետո,
  • արյունահոսություն կամ քսվող արյունային արտադրություն եք նկատում սեռական հարաբերությունից հետո,
  • նորահայտ ցավ եք զգում որովայնի ստորին հատվածում,
  • եթե պատրաստվում եք սեռական կյանքով ապրել, 
  • բեղմնավորման հետ կապված խնդիրներ են ի հայտ եկել,
  • դաշտանն ուշանում է, 
  • հղի եք կամ հղիության կասկած ունեք,
  • միզարձակման ընթացքում այրոց և սուր ցավ եք զգում, մեզում արյուն եք նկատում,
  • պատրաստվում եք հղիանալ,
  • ցանկանում եք բեղմնականխման մեթոդ ընտրել, 
  • փոփոխություններ կրծքագեղձերում (պտուկներից եկող արտադրություն, դրանց դեֆորմացիա, ցավ, կոշտացում և այլն),
  • եթե որովայնի ստորին հատվածում սուր, մղկտացող ցավ ունեք՝ ուղեկցվող ջերմության բարձրացմամբ, գիտակցության կորստով, 
  • ցավն ու ջերմության բարձրացումն ի հայտ են եկել հղիության ընդհատումից կամ այլ միջամտությունից հետո,
  • հղիության ընթացքում ցավեր և արնահոսություն ունեք։

Ինչպե՞ս նախապատրաստվել այցելությանը

Որպեսզի գինեկոլոգին այցն անցնի առանց ավելորդ հուզմունքի և վստահության մթնոլորտում, պետք է գտնել ձեր մշտական բժշկին: Եթե առաջին անգամ եք այցելում տվյալ բժշկին, պետք չէ անհանգստանալ: Պատրաստ եղեք բժշկի մի շարք հարցերին պատասխանելուն: Առաջին դաշտանի սկիզբը, վերջին դաշտանի օրը, դաշտանային արտադրության բնույթն ու տևողությունը, սեռական կյանքի սկիզբը, սեռական զուգընկերների քանակը, բեղմնականխման մեթոդը, տարած և առկա հիվանդությունները, հղիությունները, ծննդաբերությունները և աբորտները. բժիշկը կարող է հարցնել այս ամենի մասին, որպեսզի կարողանա հասկանալ ձեր օրգանիզմի առանձնահատկությունները:

Կանխարգելիչ նպատակով բուժզննման նախընտրելի է գնալ ցիկլի առաջին փուլում, դաշտանից հետո 8-12-րդ օրը: Այցին նախորդող 2-3 օրերին պետք է հրաժարվել հեշտոցային մոմիկների և հաբերի օգտագործումից, ցնցուղումից և սեռական կյանքից:

Եթե հիվանդ եք և հակաբիոտիկներ կամ հակավիրուսային դեղեր եք օգտագործում, հայտնեք բժշկին այդ մասին. դեղերը կարող են խեղաթյուրել անալիզների արդյունքները:

Այցից առաջ պետք չէ չափից շատ ջանալ հիգիենայի հարցում: Բավական է միայն լոգանք ընդունելը, պետք չէ հեշտոցի լվացում կատարել, քանի որ միկրոֆլորայի քսուքի հետազոտության արդյունքը կխեղաթյուրվի:

Այցին գրանցվելիս հարցրեք, թե կոնկրետ ինչպես է պետք նախապատրաստվել. լի, թե դատարկված միզապարկ, եթե արյան անալիզ պետք է հանձնվի, գնալ քաղցած, թե ոչ և այլն:

 

Աղբյուրը

Լորձային արտադրություն հեշտոցից

Լորձային արտադրություն հեշտոցից

Հեշտոցից արտահոսող լորձային արտադրությունը, եթե նորմալ բնույթի է, բնական երևույթ է։ Վերարտադրողական տարիքի բոլոր կանայք էլ ունենում են...

Տրամադրությունը պայմանավորող հորմոնները

Տրամադրությունը պայմանավորող հորմոնները

Պատասխանատու են մեր հոգեհուզական վիճակի համար։ Ահա այն հիմնական հորմոնները, որոնք պայմանավորում են մեր լավ տրամադրությունը․․․

Գեղեցկության և առողջության երաշխիքները

Գեղեցկության և առողջության երաշխիքները

Տարիքին համընթաց օրգանիզմում բազմաթիվ փոփոխություններ են կատարվում, ոմանք, այնուամենայնիվ, շարունակում են պահպանել իրենց գեղեցիկ տեսքն ու առողջությունը․․․

Ե՞րբ պլանավորել հղիությունը վիժումից հետո

Ե՞րբ պլանավորել հղիությունը վիժումից հետո

Հաճախ է պատահում, որ կանայք, որոնց դեպքում վիժումը եղել է հղիության վաղ ժամկետում, ցանկանում են հղինալ վիժումից անմիջապես հետո․․․․