Այլ նյութեր
ԱՄԲ-ի անհաջող փորձերից հետո․ ի՞նչ հետազոտություններ են անհրաժեշտ
Արտամարմնային բեղմնավորման (ԱՄԲ) յուրաքանչյուր անհաջող փորձ զույգերի համար կարող է լինել ոչ միայն հուզական, այլև բժշկական տեսանկյունից կարևոր փուլ։ Չնայած մեկ անհաջող ցիկլը դեռևս չի նշանակում, որ հետագա հաջողության հավանականությունը ցածր է, կրկնվող անհաջողությունների դեպքում անհրաժեշտ է մանրակրկիտ վերագնահատել հնարավոր պատճառները և ընտրել հետագա ճիշտ մարտավարությունը։
Ի՞նչ գործոններ են գնահատվում առաջին հերթին
Հետագա բուժման պլանավորման ընթացքում հաշվի են առնվում.
- կնոջ տարիքը,
- ձվարանային ռեզերվը,
- ստացված ձվաբջիջների քանակն ու որակը,
- էմբրիոնների զարգացումը,
- նախկին ԱՄԲ ցիկլերի առանձնահատկությունները,
- տղամարդու գործոնը։
Յուրաքանչյուր դեպք պահանջում է անհատական մոտեցում, քանի որ նույն արդյունքի հետևում կարող են լինել տարբեր պատճառներ։
Արգանդի խոռոչի գնահատման կարևորությունը
Իմպլանտացիայի հաջողության համար անհրաժեշտ է, որպեսզի արգանդի խոռոչը լինի բարենպաստ միջավայր զարգացող էմբրիոնի համար։ Որոշ դեպքերում կարող են հայտնաբերվել այնպիսի փոփոխություններ, որոնք սովորական ուլտրաձայնային հետազոտությամբ միշտ չէ, որ տեսանելի են։
Ցուցումների առկայության դեպքում կարող են իրականացվել.
- տրանսվագինալ ուլտրաձայնային հետազոտություն,
- հիստերոսկոպիա,
- օֆիսային հիստերոսկոպիա,
- էնդոմետրիումի բիոպսիա։
Այս հետազոտությունները հնարավորություն են տալիս հայտնաբերել պոլիպներ, ենթալորձային միոմաներ, սինեխիաներ կամ քրոնիկ էնդոմետրիտի նշաններ։
Պե՞տք են արդյոք գենետիկական հետազոտություններ
Կրկնվող անհաջողությունների որոշ դեպքերում կարող է քննարկվել.
- զույգի կարիոտիպի որոշումը,
- սերմնաբջիջների ԴՆԹ-ի ֆրագմենտացիայի գնահատումը,
- էմբրիոնների նախաիմպլանտացիոն գենետիկական թեստավորումը (PGT)։
Սակայն կարևոր է հիշել, որ այս հետազոտությունները պետք է նշանակվեն միայն համապատասխան ցուցումների առկայության դեպքում։
Չպետք է անտեսել նաև տղամարդու գործոնը
Անպտղության դեպքերի զգալի մասում առկա է նաև տղամարդու գործոնի մասնակցությունը։ Հետևաբար, անհրաժեշտության դեպքում ստանդարտ սպերմոգրամայից բացի կարող են իրականացվել նաև լրացուցիչ անդրոլոգիական հետազոտություններ։
Անհատականացված մոտեցումը՝ հաջողության կարևոր նախապայման
ԱՄԲ-ի կրկնվող անհաջող փորձերից հետո ամենակարևոր քայլը պատճառների համակարգված գնահատումն է։ Լավ մշակված հետազոտական և բուժական մարտավարությունը հնարավորություն է տալիս բացահայտել հնարավոր խնդիրները և բարձրացնել հետագա հաջող հղիության հավանականությունը։
12
