Կանանց

Հիգիենա

Հիգիենան բազմաթիվ բաժիններ ունի՝ սննդի հիգիենա, երեխաների և դեռահասների հիգիենա, աշխատանքի հիգիենա, սպորտային հիգիենա, անձնական հիգիենա, արտաքին միջավայրի հիգիենա, զինվորական հիգիենա և այլն։ Այս հոդվածում անդրադառնում ենք մազերի, բերանի խոռոչի հագուստի և ննջասենյակի հիգիենային։

Մազերի հիգիենա։ Գլխամաշկի և մազերի ճիշտ խնամքը կարգավորում է ճարպագեղձերի գործունեությունը, ինչպես նաև լավացնում է արյան շրջանառությունը և փոխանակման գործընթացները։ Այդ պատճառով պետք է պատասխանատվությամբ վերաբերվել գլխամաշկի խնամքին։

Մազերը լվանալու հաճախականությունը կախված է մի շարք գործոններից՝ դրանց երկարությունից, մազի և գլխամաշկի տիպից, աշխատանքի բնույթից, տարվա եղանակից և այլն։ Ձմռանը սովորաբար մազերն ավելի հաճախ են լվանում, քանի որ գլխարկ կրելու դեպքում գլխամաշկը չի շնչում, որի պատճառով մաշկային ճարպն ավելի շատ է արտադրվում, քան սովորաբար։

Պետք չէ մազերը շատ տաք ջրով լվանալ, հնարավոր է, որ յուղոտ դառնան, քանի որ տաք ջուրն ակտիվացնում է ճարպագեղձերի աշխատանքը։ Հարկավոր է առանձնակի զգուշավորությամբ ընտրել լվացող միջոցը (շամպույն, բալզամ, լոսյոն և այլն)։ Մազերը լավ ներծծում են ջուրը, դրա հետ նաև այնպիսի նյութեր, որոնք կարող են վնասակար լինել ինչպես մազերի, այնպես էլ գլխամաշկի և ամբողջ օրգանիզմի համար։

Պարզաջրելուց հետո ցանկալի է պաղ ջուր պահել մազերին։ Լվանալուց հետո հարկավոր է մազերը չորացնել տաք սրբիչով, այնուհետև թողնել, որ չորանան բաց վիճակում։ Ցանկալի չէ հարդարիչով չորացնել մազերը, քանի որ այն չափից շատ է չորացնում։

Չի կարելի սանրվել այլ մարդու սանրով։

Բերանի խոռոչի հիգիենա։ Բերանի խոռոչի ճիշտ խնամքը նպաստում է ատամների առողջության պահպանմանը, ինչպես նաև կանխում է ներքին օրգանների բազմաթիվ հիվանդություններ։

Հարկավոր է ամեն օր լվանալ ատամները՝ առավոտյան և երեկոյան։
Չի կարելի այլ մարդու ատամի խոզանակն օգտագործել։ Ունեցեք ձերը։
Ուտելուց անմիջապես հետո ողողեք բերանը։
Ատամների կամ լնդերի հիվանդությունների առաջին իսկ ախտանշանների դեպքում դիմեք բժշկի։
Կանխարգելիչ զննման նպատակով տարին երկու անգամ այցելեք ստոմատոլոգի։

Հագուստի և կոշիկի հիգիենա։ Անձնական հիգիենայի հարցում կարևոր դեր է խաղում նաև հագուստի մաքրությունը։ Հագուստը մարմինը պաշտպանում է կեղտոտվելուց, մեխանիկական և քիմիական վնասվածքներից, ցրտահարումից, մանրէներից և այլն։

Սպիտակեղենը պետք է փոխել ամեն օր։

Գուլպաները, զուգագուլպաները, կիսագուլպաները նույնպես պետք է փոխել ամեն օր։

Պետք է հագուստը չթողնել կեղտոտ վիճակում, պետք է կանոնավոր լվանալ այն։

Չի կարելի այլ մարդու հագուստ կամ կոշիկ կրել։

Հագուստն ու կոշիկը պետք է համապատասխանեն եղանակային պայմաններին։

Ցանկալի է նախապատվությունը տալ բնական գործվածքներից կարված հագուստին և բնական նյութերից կարված կոշկեղենին։

Հագուստն ու կոշիկը պետք է համապատասխան չափսի լինեն, ընտրվեն մարդու անատոմիական առանձնահատկությունները հաշվի առնելով։

Ննջասենյակի հիգիենա։ Ընտանիքի յուրաքանչյուր անդամ պետք է ունենա իր անկողնային սպիտակեղենն ու սրբիչները։

Անկողնու սպիտակեղենը պետք է փոխել ամեն օր կամ շաբաթական առնվազն երեք-չորս անգամ։

Անկողինը պետք է հարմարավետ լինի։

Քնելուց առաջ հարկավոր է օդափոխել սենյակը։

Ցանկալի է գիշերաշապիկով քնել։