Ձվարանի կիստայի կամ այլ նորագոյացությունների պայթումը գինեկոլոգիական վտանգավոր վիճակ է, այդ պատճառով արագ հոսպիտալացում և անհապաղ բժշկական օգնություն է պահանջում։

Բարդությունները

Խնդիրն անսպասելիորեն է առաջանում կամ էլ ի հայտ է գալիս որոշ գործոնների ազդեցությամբ՝ սեռական ակտ, վնասվածք, ֆիզիկական ծանրաբեռնվածություն և այլն։ Վտանգը ներքին արյունահոսությունն է, որի արդյունքում զարկերակային ճնշումն ընկնում է և կարող է շոկ, պերիտոնիտ, հետագայում՝ սեպսիս զարգանալ։

Ախտանշանները

Կիստայի կամ նորագոյացության պատռվելու նշաններն են՝

• ընդհանուր թուլություն, ինքնազգացողության կտրուկ վատացում, 
• գլխապտույտ, անգամ՝ գիտակցության կորուստ, 
• տախիկարդիա, 
• գունատություն և այլն։

Կլինիկական պատկերի արտահայտվածությունը կախված է ներորովայնային արյունահոսության արագությունից, բացի այդ, մեծ դեր են խաղում օրգանիզմի առանձնահատկություններն ու կոմպենսատոր մեխանիզմները։

Ախտորոշումը

Ժամանակ չկորցնելու նպատակով շատ հետազոտություններ չեն անցկավում, բժիշկը սահմանափակվում է անամնեզի հավաքմամբ և բուժառուի զննմամբ։ Վերջնական ախտորոշումն իրականացվում է փոքր կոնքի օրգանների ՈւՁՀ-ի միջոցով։

Նախավիրահատական ախտորոշման մի մասն է նաև լաբորատոր փուլը՝ արյան և մեզի ընդհանուր հետազոտություն, արյան մակարդելիության գնահատում՝ կոագուլոգրամա, վարակների հայտնաբերման հետազոտություններ, անեսթեզիոլոգի խորհրդատվություն և այլն։

Բուժումը

Ներորովայնային արյունահոսության դեպքում կատարվում է`

• վիրահատական բուժում, 
• արյունահոսող օջախի հայտնաբերում և վերացում: 

Հազվադեպ, եթե արյունահոսությունը ուժգին չէ և կլինիկական պատկերը թույլ է արտահայտված, հնարավոր է հոսպիտալացնել պացիենտին և սահմանել հսկողություն: