Կորդոցենտեզ

Կորդոցենտեզն ինվազիվային միջամտություն է, որի ընթացքում կատարում են պորտալարի անոթների պունկցիա (ասեղնածակում) լաբորատոր հետազոտությունների համար արյուն վերցնելու կամ պտղին արյան լուծույթներ և/կամ դեղամիջոցներ ներարկելու նպատակով։

Դասակարգումը

Ըստ պորտալարին հասնելու ձևի՝

• պունկցիայի (ասեղնածակման) ադապտերի օգտագործմամբ, 
• «ազատ ձեռքի» մեթոդ։ 

Ըստ կատարման ձևի՝

• մեկ ասեղով, 
• երկու ասեղով։ 

Ցուցումները

• Բնածին և ձեռքբերովի արատների պրենատալ ախտորոշում։
• Պտղի ունեցած հիվանդության ախտորոշում և ծանրության աստիճանի գնահատում։
• Պտղի ֆունկցիոնալ վիճակի գնահատում (արյան կենսաքիմիական ցուցանիշներ, հորմոնների պարունակություն)։ 
• Ֆետոթերապիա (արյան լուծույթների և/կամ դեղամիջոցների ներարկում)։

Հակացուցումները

• Բորբոքային սուր պրոցես կամ քրոնիկական բորբոքման սրացում։ 
• Հղիության սպառնացող կամ սկսվող ընդհատում։ 

Միջամտության պայմանները և հետվիրահատական շրջանի առանձնահատկությունները

Միջամտությունը կատարվում է հղիության երկրորդ կեսին։ Հիմնականում անզգայացման անհրաժեշտություն չի լինում։ Միջամտությունից հետո կատարվում է պտղի ֆունկցիոնալ վիճակի գնահատում (սրտխփոցի առկայություն և պարբերականություն)։ Ըստ ցուցման նշանակվում է պահպանիչ թերապիա, հակաբիոտիկային կանխարգելում և/կամ թերապիա։

Բարդությունները

• Հաճախ հանդիպող բարդություն է պորտալարի ասեղնածակման հատվածում արնահոսությունը, ինչը տևում է առավելագույնը մեկ րոպե։
• Պտղի ֆունկցիոնալ վիճակի խանգարում։ 
• Հղիության ընդհատում։ 
• Պորտալարի հեմատոմա։ 
• Վարակում։ 
• Վիժման սպառնալիք։