Արևը և վերարտադրողական ֆունկցիան

Վերջին շրջանի հետազոտությունները ցույց են տվել, որ ԱՄԲ-ից հետո այն կանայք, ովքեր եղել են անձրևից զերծ, տաք և արևոտ վայրում, ունեցել են հղիանալու ավելի բարձր հնարավորություններ:

Ամառվա երկար օրերն ու հիանալի եղանակը կայտառություն են հաղորդում, իսկ եթե նաև պլանավորում եք հղիանալ, ապա այն լավագույն ժամանակահատվածն է: Եվրոպայի վերարտադրողական առողջության ամենամյա կոնֆերանսում ներկայացված ուսումնասիրությունները ցույց են տվել, որ այն կանայք, ովքեր ԱՄԲ-ից մեկ ամիս առաջ ավելի շատ են մնացել բարձր ջերմաստիճանով վայրերում, արևի ճառագայթների ներքո, անձրևից հեռու, ունեցել են հղիանալու 3 անգամ ավելի բարձր հավանականություն:

Բժիշկ Ֆրանկ Վանդեկերչկովն ասում է, որ հավանաբար արևը դրական ազդեցություն է ունենում օոցիտների՝ չբեղմնավորված ձվաբջիջների վրա, որոնք հավաքվել էին ձվազատման խթանումից շաբաթներ առաջ: Նա բացատրում է, որ արևի լույսը նպաստում է օրգանիզմում վիտամին D-ի արտադրման, իսկ այն ազդում է մելատոնին հորմոնի մակարդակի վրա: Այս երկուսն էլ իրենց դերն ունեն կնոջ վերարտադրողական ցիկլի կարգավորման հարցում: Արևի լույսի ազդեցությամբ այս հորմոններն ավելի մեծ քանակությամբ են արտադրվում: Վիտամին D-ն բարելավում է ձվաբջջի որակը և բարձրացնում սերմնավորման հավանականությունը: Մելատոնինը կարգավորում է քունը և օրվա ռիթմը, ինչպես նաև մենստրուացիայի ցիկլերը:

Ահա թե ինչու է վիտամին D-ն կարևովորվում ինչպես հղիության պլանավորման փուլում, այնպես էլ դրա ամբողջ ընթացքում: Հատկապես տարվա ցուրտ ամիսներին, երբ հնարավոր չէ արևի լույսից ստանալ այն, բժիշկը կնշանակի վիտամինային հավելումներ: Հղիության ընթացքում վիտամին D-ի ցածր մակարդակը բարձրացնում է վաղաժամ ծննդաբերության, վարակների վտանգը, ինչպես նաև հանգեցնում է պրեէկլամպսիայի, ոսկրերի թերզարգացման:

Կարդացեք՝ Նախապատրաստում հղիությանը, վիտամինների և հանքանյութերի դերը

Թեև հետազոտությունն իրականացվել է մասնավորապես ԱՄԲ կատարած կանանց շրջանում, այնուամենայնիվ բնական ճանապարհով բեղմնավորման դեպքում էլ բարենպաստ ազդեցություն կդիտվի: Այնպես որ, եթե հղիություն եք պլանավորել, ապա ամառը հիանալի ժամանակահատված է, մանավանդ որ ըստ այլ հետազոտությունների՝ ամռան ամիսներին սերմնաբջիջների ակտիվությունը երկու անգամ աճում է:

Աղբյուրը՝ fitpregnancy.com