Ռետրոխորիալ հեմատոմա

Ռետրոխորիալ հեմատոմա

Ռետրոխորիալ (գրավիդարային) հեմատոման արյան թանձրուկի կուտակումն է արգանդի պատի և պտղաձվի, ավելի ճիշտ՝ պտղձվի թաղանթի՝ խորիոնի միջև առկա տարածության մեջ։ Խորիոնն ապագայում՝ 16-րդ շաբաթից հետո, վերածվում է ընկերքի, նշանակում է, որ այն նույն գործառույթներն է իրականացնում, ինչ ընկերքը։ Ռետրոխորիալ հեմատոման առաջանում է հղիության առաջին եռամսյակում։

Սովորաբար ախտաբանական այդ վիճակը հղիության ընդհատման սպառնալիքի հետևանք է լինում, սակայն կարող է առաջանալ արգանդի պատի անոթների վնասման հետևանքով, ընդ որում՝ վնասվում են խորիոնի թավիկների պատճառով, երբ խորիոնն աճում է։

Տեսակները

Ըստ առաջացման ժամանակի՝ առանձնացնում են ռետրոխորիալ և ռետրոընկերքային հեմատոմա, որոնք սկզբունքորեն նույնն են։ Ըստ ծանրության աստիճանի՝ ռետրոխորիալ հեմատոման լինում է թեթև, միջին և ծանր։

Պատճառները

Հեմատոմայի ձևավորման պատճառները նման են այն գործոններին, որոնք վիժման վտանգ են առաջացնում`

  • արգանդի վրա մեխանիկական ազդեցություններ (վնասվածքներ), 
  • հորմոնային խանգարումներ (պրոգեստերոնի անբավարարություն), 
  • պտղաձվի գենետիկական շեղումներ (զարգացման արատներ), 
  • սթրեսներ, 
  • ֆիզիկական մեծ ծանրաբեռնվածություն, 
  • արգանդի բորբոքային և ուռուցքային հիվանդություններ (էնդոմետրիտ, էնդոմետրիոզ, միոմա), 
  • սեռավարակներ, 
  • մասնագիտական վտանգներ (ճառագայթում, աղմուկ, վիբրացիա), 
  • տոքսիկոզ և գեստոզ
  • անոթային ճնշման կտրուկ տատանումներ, 
  • սեռական օրգանների ինֆանտիլիզմ և շեղումներ, 
  • թմրանյութերի, ոգելից խմիչքների և ծխախոտի օգտագործում, 
  • համակարգային հիվանդություններ (համակարգային կարմիր գայլախտ), 
  • քրոնիկական սոմատիկ հիվանդություններ (շաքարային դիաբետ, սրտանոթային հիվանդություններ և այլն), 
  • արյան մակարդման համակարգի հիվանդություններ, 
  • անոթների, ինչպես նաև արգանդի անոթների ախտաբանական վիճակներ, 
  • աղտոտված էկոլոգիա և այլն։

Ախտանշանները

Սովորաբար հեմատոման պատահմամբ հայտնաբերվում է պլանային ՈւՁՀ-ի ընթացքում։ Կինը գանգատներ չի ունենում և իրեն լավ է զգում, սակայն երբեմն ռետրոխորիալ հեմատոմային ուղեկցում են հղիության ընդհատման սպառնալիքի նշանները։

Հիմնական դրսևորումը լինում է հեշտոցից եկող մուգ կարմիր կամ շագանակագույն արնախառն արտադրությունը։ Վերջինիս ինտենսիվությունն աննշան է և կախված է հեմատոմայի չափսերից ու հղիության ժամկետից։

Մուգ կարմիր արտադրությունը հեմատոմայի դեպքում ավելի շատ դրական, քան բացասական նշան է։ Այն վկայում է հեմատոմայի դատարկվելու մասին։

Վտանգավոր արտադրություն

Վառ կարմիր արտադրությունը լավ ախտանշան չէ, հատկապես երբ ուղեկցվում է որովայնի ստորին շրջանի ցավով։ Այն վկայում է կամ հեմատոմայի մեծացման և վիժման վտանգի ուժգնացման մասին, կամ էլ այն մասին, որ հեմատոման նոր է ձևավորվել և անհապաղ բուժում է պահանջում։

Բացի այդ, կնոջն անհանգստացնում է ձգող կամ նվվացող բնույթի ցավը, որն ի հայտ է գալիս որովայնի ստորին հատվածում կամ գոտկատեղի շրջանում։ Սովորաբար ցավը մշտական է լինում, սակայն կարող է և պարբերաբար ծագել ու ուժգնանալ ֆիզիկական աշխատանքից հետո և այլ գործոնների ազդեցությամբ։

Որոշ դեպքերում ռետրոխորիալ հեմատոման ընթանում է առանց ախտանշանների և հայտնաբերվում է ծննդաբերությունից հետո, երբ ընկերքի վրա երևում է արնազեղման հին հետքը։

Ախտորոշումը

Ռետրոխորիալ հեմատոմայի ախտորոշման հիմնական միջոցը արգանդի և պտղաձվի ՈւՁՀ-ն է, որի ընթացքում հայտնաբերվում են հետևյալ նշանները՝

  • արգանդի պատի տեղային հաստացում, ինչը վկայում է արգանդի տոնուսի բարձրացման մասին, 
  • պտղաձվի ձևի փոփոխություն վերջինիս վրա միոմետրիումի հաստացած հատվածի ճնշման արդյունքում (պտղաձուն ձեռք է բերում կաթիլի ձև), 
  • ռետրոխորիալ հեմատոմայի հայտնաբերում, չափսերի, տեղակայման հատվածի հստակեցում։ 

Բացի այս, ըստ ցուցման անհրաժեշտ են լաբորատոր հետևյալ հետազոտությունները՝

  • արյան և մեզի ընդհանուր հետազոտություն
  • արյան մակարդելիության որոշման հետազոտություն, 
  • միկրոֆլորայի հետազոտմանն ուղղված քսուքի ուսումնասիրում, 
  • արյան կենսաքիմիական հետազոտություն,
  • սեռավարակների հայտնաբերմանն ուղղված հետազոտություններ, 
  • հորմոնների հետազոտություն (ըստ ցուցումների):

Բուժումը

Ռետրոխորիալ հեմտոմայի բուժմամբ զբաղվում է մանկաբարձ-գինեկոլոգը։ Թերապևտիկ միջոցառումները շարունակվում են հղիության ընդհատման վտանգի ամբողջ ընթացքում, ինչպես նաև կրկնվում են վտանգավոր ժամկետներում (12-14, 20-24, 28-32, 36-38-րդ շաբաթներում)։ Արգանդի տոնուսը և վիժման սպառնալիքի նշանների վերացման նպատակով նշանակվում է անկողնային ռեժիմ:

Արգելվում է՝

  • սեռական կյանք վարել, 
  • ծանր իրեր բարձրացնել, 
  • ֆիզիկական ծանր աշխատանք կատարել։ 

Այս և այլ նպատակներով կնոջը հնարավոր է հոսպիտալացնել։ Խորհուրդ է տրվում կարգավորել սննդակարգը՝ բացառելով գազագոյացմանը նպաստող մթերքները (կաղամբ, լոբեղեն), ինչպես նաև շոկոլադը, սուրճը, կոպիտ բջջանքը։ Գազով լեցուն ստամոքսը ճնշում է գործադրում արգանդի վրա և ուժգնացնում վիժման վտանգը՝ մեծացնելով հեմատոման։ Հարկավոր է խուսափել սթրեսային իրավիճակներից և հանգիստ պահել հոգեհուզական վիճակը։ Կախված դրությունից՝ բժիշկը մի շարք դեղամիջոցներ է նշանակում։

Հետևանքները և կանխատեսումները

Մեծամասամբ ռետրոխորիալ հեմատոման հղիության հետագա ընթացքին չի սպառնում։ Ծննդալուծումն իրականացվում է բնական ճանապարհով և առանց բարդությունների։ Բացասական կանխատեսման նշան է հեմատոմայի մեծ չափսը կամ եթե հեմատոմայի ընդգրկման տարածքը 40% և ավել է լինում պտղաձվի չափսերից։

Հնարավոր հետևանքները՝

  • ինքնաբեր վիժում, 
  • չզարգացող հղիություն
  • պտղի ներարգանդային քրոնիկական հիպոքսիա, 
  • պտղի ներարգանդային զարգացման հապաղում։
Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար