Վերարտադրողական տարիք

Վերարտադրողական տարիք է համարվում այն ժամանակահատվածը, երբ կինը կարող է երեխա լույս աշխարհ բերել, իսկ տղամարդը՝ բեղմնավորել նրան։ Ֆիզիոլոգիապես հնարավոր է հղիանալ առաջին դաշտանից մինչև դաշտանադադարի սկիզբն ընկած ժամանակահատվածում։ Համարվում է, որ այդ շրջանը 15-ից 49 տարեկանն է։ Իրականում այդ տարիքը շատ ավելի փոքր է․ չէ՞ որ պետք է հաշվի առնել նաև հոգեբանական պատրաստվածությունը և օրգանիզմի զարգացման առանձնահատկությունները։

Կանանց և տղամարդկանց վերարտադրողական համակարգի զարգացման առանձնահատկությունները տարբեր կերպ են արտահայտվում, այդ պատճառով էլ երեխայի բեղմնավորելու կարողությունն անհատականորեն է դիտարկվում։ Տղամարդկանց և կանանց վերարտադրողական լավագույն տարիքը համարվում է 18-35 տարեկանը։ Այդ տարիքում մարդն ամբողջովին կազմավորված է լինում և հոգեբանորեն պատրաստ ծնող լինելուն, սակայն տեսականորեն կինը կարող է առողջ երեխա լույս աշխարհ բերել 14-15 տարեկանում, ինչպես նաև 50-ում։ Տղամարդը կարող է հայր դառնալ ինչպես 15, այնպես էլ 60 և ավել տարեկանում։ Մասնագետներն առանձնացնում են մանկածնության տարիքի մի քանի շրջան։

Կանանց վերարտադրողական վաղ տարիք

Համարվում է, որ կինը կարող է հղիանալ հենց առաջին դաշտանի ժամանակ։ Այո, այդպես է, ձվաբջիջն արդեն պատրաստ է բեղմնավորման, բայց երիտասարդ աղջկա չկազմավորված օրգանիզմը հաճախ ընդունակ չի լինում առողջ երեխա լույս աշխարհ բերել։ Մեծամասամբ վաղ հղիությունը բարդություններ է ունենում, ավելի ծանր տոքսիկոզ-գեստոզ և վիժման վտանգ։ Այդ մայրերի երեխաները վատ են զարգանում և դանդաղ քաշ հավաքում։ Բացի այդ, կինն այդ տարիքում հոգեբանորեն պատրաստ չի լինում մայրությանը։ Այդ պատճառով առաջին դաշտանից մինչև 20 տարեկանն ընկած շրջանն անվանում են վերարտադրողական վաղ տարիք։

Կարդացեք՝ Երիտասարդացնո՞ւմ է արդյոք մեծ տարիքում հղիանալը

Հղիանալու լավագույն տարիքը

Բազմաթիվ բժիշկներ, վերարտադրողական տարիք ասելով, նկատի ունեն 18-ից մինչև 35 տարեկանն ընկած ժամանակահատվածը։ Այդ տարիքում կանանց մեծամասնությունն ընդունակ է առողջ երեխա ունենալ, քանի որ նրանք երիտասարդ են, ուժեղ, իսկ հորմոնային համակարգն էլ բնականոն է։ Նրանց օրգանիզմն ամբողջովին կազմավորված է և պատրաստ մայրանալու։ Մեծ նշանակություն ունի նաև ապագա մայրերի հոգեբանական հասունությունը և երեխայի համար պատասխանատվություն կրելու կարողությունը։

Վերարտադրողական ուշ տարիք

35 տարեկանից հետո կանանց մեծամասնության սեռական ֆունկցիան մարում է, նվազում է հորմոնների արտադրությունը և առողջական խնդիրների առաջացման նպաստավոր պայմաններ են ստեղծվում։ Իհարկե ոչ բոլորի դեպքում է այդպես, շատ բան է կախված նաև կնոջ օրգանիզմի անհատական առանձնահատկություններից, բայց բժիշկները շատերին խորհուրդ չեն տալիս հղիանալ։

Կարդացեք՝ Հղիությունը մեծ տարիքում

Վերարտադրողական ուշ տարիքում կինը ֆիզիոլոգիապես դեռ կարող է հղիանալ, սակայն մեծ է բարդությունների և երեխայի զարգացման գենետիկական շեղումների, օրինակ՝ Դաունի համախտանիշի առաջացման վտանգը։ Տարիքին համընթաց այդ հավանականությունը մեծանում է, ինչը պայմանավորված է հորմոնային ֆոնի խանգարումներով և առողջական ընդհանուր վիճակի վատացմամբ։ 45-50 տարեկանում սկսվում է մենոպաուզան և հղիանալը դառնում անհնար։

Կարդացեք՝ Արտամարմնային բեղմնավորումը 35 տարեկանից հետո

Տղամարդկանց վերարտադրողական տարիքը

Տղամարդու օրգանիզմի առանձնահատկություններով պայմանավորված՝ բեղմնավորելու բարենպաստ ժամանակահատվածը համեմատաբար մեծ է։ Տղամարդը կարող է հայր դառնալ արդեն իսկ 15 տարեկանում, իսկ սերմնաբջիջների արտադրությունը թեև դանդաղում է 35 տարեկանից հետո, բայց կարող է շարունակվել մինչևխոր ծերություն։ Մասնագետների մեծամասնությունը, սակայն, տղամարդկանց վերարտադրողական լավագույն տարիքը սահմանափակում են նույն ժամանակահատվածով, ինչ կանանցը՝ 18-35 տարեկան։ Միայն այդ շրջանում է ակտիվորեն արտադրվող տեստոստերոն հորմոնն ապահովում սերմնաբջիջների սովորական քանակն ու շարժունակությունը։

Ժամանակակից կանանց շատ է հետաքրքրում, թե ինչպես է հնարավոր երկարացնել վերարտադրողական տարիքը, սակայն քանի որ վերարտադրողական ֆունկցիան անմիջականորեն կախված է հորմոնային ֆոնից, ապա մարդու ցանկությունը հաճախ դեր չի խաղում։ Հորմոնային համակարգի խանգարումներից խուսափելու համար հարկավոր է առողջ ապրելակերպ վարել և որոշ դեղամիջոցներ օգտագործել։

Վերարտադրողական տարիքի մասին տեղեկությունները կօգնեն խուսափել բեղմնավորման և հղիության հետ կապված խնդիրներից, ինչպես նաև առողջ երեխա լույս աշխարհ բերել։

Աղբյուր