Ամառը և հղիությունը

Հղիության 9 ամիս: Ամռան ընթացքում հղիության եռամսյակներից որևէ մեկի զուգադիպելու հավանականությունը շատ մեծ է: Տարվա ամենաշոգ եղանակը կարող է օգտակար լինել և մի շարք դրական հույզեր պարգևել ինչպես մորը, այնպես էլ փոքրիկին, եթե մի քանի խորհրդի հետևեք:

Արևը

Ապագա մայրերը պետք է հնարավորինս քիչ ժամանակ անցկացնեն կիզիչ արևի տակ հետևյալ պատճառներով՝

• տոթի ազդեցությամբ արյան մակարդելիությունն իջնում է, և բարձրանում է արյունահոսությունների հավանականությունը,
• ակտիվանում է հիպոֆիզի աշխատանքը, որն արգանդը կրճատող օքսիտոցին է արտադրում,
• շատանում է վարիկոզը,
• շատանում է պիգմենտավորումը:

Կարդացեք՝ Պիգմենտային բծերի առաջացման պատճառները հղիության ընթացքում

Իսկ ահա օդային լոգանք ընդունելն ամռանը խիստ օգտակար է: Սակայն այդ նպատակի համար պետք է ընտրել առավոտյան կամ երեկոյան ժամերը՝ օգտվելով արևից պաշտպանող կրեմներից մինչև իսկ այն դեպքում, եթե գտնվում եք հղիներին խորհուրդ տրվող ստվերում: Մի մոռացեք ջրով շշի մասին, այն մշտապես պետք է տեղ գտնի ձեր պայուսակում:

Ալերգիա

Հղիությունը սրացնում է առկա հիվանդությունները: Քանի որ ամռանն են հատկապես շատ ծաղիկներ ու բույսեր ծաղկում, ապա հնարավոր է ձեր ալերգիան սրանա կամ մինչև իսկ ի հայտ գա առաջին անգամ, եթե այն նախկինում չի էլ եղել: Օգտակար կլինի, եթե ամառանոց կամ ծովափ մեկնելուց առաջ այցելեք ձեր բժշկին և պարզեք, թե ալերգիայի նշանների և միջատների խայթոցի դեպքում ո՞ր հակահիստամիանային դեղամիջոցն է առավել նպատակահարմար օգտագործել: Բույսերի ծաղկման ժամանակահատվածում զբոսանքից վերադառնալուց հետո ցնցուղ ընդունեք:

Կարդացեք՝ Ալերգիան և հղիությունը

Լոգանքը

Լոգանքը շատ օգտակար է ապագա մայրերի համար: Այն առողջացնում ու կոփում է, մարզում շնչառական ու մկանային համակարգերը, օրգանիզմը նախապատրաստում ծննդաբերությանը: Տաք ավազի և զովացնող ջրի հակադրությունը ամրացնում է նյարդային համակարգը և կանխում ընկճախտը (դեպրեսիան): Սակայն հարկ է հիշել մի քանի պարզ կանոն՝

• լողանալ կարելի է միայն հատուկ նշանակության լողափերում կամ ստուգված ջրամբարներում,
• միայնակ մի գնացեք լողափ,
• ջրում երկար մի մնացեք,
• մի մտեք սառը ջուրը,
• հեռու չլողաք. այլոց համեմատությամբ հղիների ջղաձգվելու հավանականությունն ավելի մեծ է,
• չսուզվեք, որպեսզի ջուրը չհոսի ձեր քթըմպանին. ջրում կարող են լինել վարակի հարուցիչներ:

Ուղևորություններ

Հղիությունն առիթ չէ, որպեսզի նստեք տանը և դուրս գաք միայն բժշկին այցելելու համար, առավել ևս, որ հաջորդ տարի կրծքահասակ փոքրիկի հետ հազիվ թե կարողանաք ծովափ մեկնել: Ուստի կարող եք ճանապարհորդությունները մտցնել ձեր ամառային ծրագրերում՝ հետևելով մի քանի խորհրդի։

• Ճանապարհորդությունից առաջ այցելեք ձեր բժշկին՝ կանխարգելիչ նպատակով:
• Դեղարկղ պատրաստեք ձեզ հետ տանելու համար:
• Ճանապարհորդության ընթացքում վերահսկեք ձեր արյան ճնշումը՝ չմոռանալով տոնոմետրը:
• Ուր էլ մեկնեք, մինչև իսկ տնից ոչ ավել, քան 100 կմ հեռու, ձեզ հետ ունեցեք անձնագիր, փոխանակային քարտ. արտասահման մեկնելիս անպատճառ բժշկական ապահովագրություն ձևակերպեք:
• Երթուղին ընտրելիս մի հրապուրվեք բացառիկ ուղևորություններով:
• Ճանապարհորդությունների ընթացքում խուսափեք երկար ժամանակ միևնույն դիրքում մնալուց: Ավտոմեքենայով ճամփորդելիս հաճախակի կանգ առեք, գնացքում շարունակ մի մեկնվեք թախտին, անցուդարձ արեք գնացքում:
• Հղիության 7-րդ ամսից հետո ցանկալի է խուսափել օդանավով թռչելուց:

Սննդակարգը

Սննդակարգն այնպիսին է, ինչպիսին տարվա մյուս եղանակներին: Կերեք այն ամենը, ինչն օգտակար է ու թարմ՝ հնարավորինս սահմանափակելով կծու, աղի և տապակած մթերքները: Ամռանն առանձնապես պետք է ուշադիր ընտրել միսն ու կաթնամթերքը: Եթե ամռանը զուգադիպում է հղիության երրորդ եռամսյակը և եթե այտուցվելու հակում ունեք, ապա փոքր-ինչ սահմանափակեք հեղուկների գործածումը և հետևեք միզարտադրությանը (դիուրեզին): Նկատի ունեցեք նաև այն հյութը, որն առկա է մրգերում՝ ձմերուկի, սեխի, վարունգի մեջ և այլն: Ի դեպ՝ ձմերուկի մասին։ Որքան էլ ուզենաք, մի գնեք առաջին ձմերուկները, որոնք հաճախ հագեցած են քիմիայով, այլ սպասեք մինչև ժամանակը գա: Աղի օգտագործումը մաքսիմալ նվազեցրեք: Հատապտուղների հասունացման շրջանում վայելեք մորին, ելակը, թութը, հապալասը, որոնք ամինաթթուների պարունակությամբ առաջատարներ են: Կարող եք աղանդերներ պատրաստել հատապտուղներից ու յոգուրտից կամ կեֆիրից, որոնք համով են, օգտակար և քիչ կալորիական: Սառը ապուրները՝ մածնաբրդոշ, բազուկապուր, հիանալի միջոց են հագենալու և զովանալու համար:

Օրվա ռեժիմը

Ամռան տապը մինչև իսկ ոչ հղիներին է մի շարք անհարմարություններ պատճառում, իսկ ապագա մայրերին՝ առավել ևս. տոքսիկոզ, այտուցներ, գլխապտույտ, հևոց և այլն: Կյանքը տանելի դարձելու համար օգտակար սովորություն դարձրեք հետճաշյա քունը: Հենց օրվա ամենաշոգ ժամեին հաճույքով քնած կլինեք տանը: Եթե ինչ-որ տեղ պետք է գնաք կամ մեկնեք, աշխատեք քայլել հարթ մակերեսներով, գլխածածկ գնեք: Անպայման շշով ջուր վերցրեք: Լավ կլինի, եթե հարազատները ձեզ ուղեկցեն:

Քրտնարտադրությունը

Ամռանը բոլորն են քրտնում, իսկ ահա հղիության շրջանում այն ավելի է սաստկանում: Հաճախակի ընդունեք ցնցուղ և օդային լոգանքներ, մարմինը շփեք խոնավ սրբիչով, երեսը ցողեք գոլ, հանքային ջրով: Կարելի է նաև ցողացիրով ցողվել անանուխի թուրմով, ինչպես նաև անանուխի կամ կիտրոնի մի քանի կաթիլ յուղ ավելացրած ջրով: Կրծքի տակ, ազդրերի ներսային մակերեսին շփաբորբ կամ քրտնախաշ երևալիս օգտվեք ցինկի օքսիդի հիմքով քսուքներից կամ մանկական ցանափոշիներից: Գնեք հովհար. այս հնաոճ իրը հարմարավետություն կհաղորդի ձեզ տոթ օրերին: Հագուստը ձեր ընտրությունը պետք է լինի հօգուտ բնաթելերով հյուսված գործվածքի՝ շնչող և ազատ: Ամռանը պետք չէ կրել սինթետիկ և ընդգծող նեղ հագուստ: Առավելությունը պետք է տալ բաց գույներին, քանզի մուգ գույները «կլանում են լույսը»: Անպատճառ ձեռք բերեք գլխածածկ. դա կարող է լինել նրբագեղ, ծղոտե գլխարկ՝ ժապավենով զարդարված, գլխաշոր, զվարճալի գլխարկ՝ հովարով կամ պանամա: 

Մաշկը

Ամռանը մաշկը դառնում է չոր և ձգվածության առավել հակվածությամբ: Մի մոռացեք մաշկը խոնավացնելու և խնդրահարույց մասերի մերսման մասին: Ձեռք բերեք հատուկ հղիների համար նախատեսված մաշկի խնամքի և ձգվածության կանխարգելման խնամքի պարագաներ: Հիշյալ միջոցներն զգուշորեն գործածեք, քանզի դրանք կարող են ալերգիա առաջացնել: Զգուշացեք նաև արևայրուքից՝ պիգմենտավորման բարձր վտանգի պատճառով: