Ընկերքը հղիության ընթացքում կարևորագույն օրգաններից է։ Հենց դրա միջոցով է երեխան ստանում սննդարար բոլոր նյութերը, այն իրականացնում է երիկամների, թոքերի, որովայնի և ստամոքսի գործառույթները, պաշտպանում է վարակներից։ Ընկերքը ժամանակավոր օրգան է, կազմավորվում է հղիության ընթացքում և շերտազատվում է ծննդաբերության ժամանակ։

Ի՞նչ է նշանակում ընկերքի հասունություն

Ընկերքի հասունության աստիճանը մի ցուցիչ է, որը նշվում է ուլտրաձայնային յուրաքանչյուր հետազոտության ժամանակ։ Հղիության ընթացքում ընկերքն աճում է երեխայի աճին համընթաց, զարգանում է և ծերանում։ Որքան բարձր է հասունության աստիճանը, այնքան քիչ գործառույթներ կարող է իրականացնել։ Տարբերում են հասունության չորս աստիճան՝

• 0 աստիճանը բնորոշ է մինչև 27-30 շաբաթական ժամկետին,
• 1-ին աստիճանը՝ 30-35 շաբաթականին, 
• 2-րդ աստիճանը՝ 35-39 շաբաթականին, 
• 3-րդ աստիճանը՝ 39 շաբաթականից սկսած։

Ցավոք հաճախ են հանդիպում շեղումները։ Պատճառները տարաբնույթ են՝ հորմոնային խանգարումներ, քրոնիկական հիվանդություններ կամ ֆիզիոլոգիական առանձնահատկություններ։ Բոլոր շեղումները, սակայն, խիստ անհատական են և բուժում կարող է նշանակել միայն բժիշկը։

Կարդացեք՝ Ընկերքի վաղաժամ շերտազատում

Ընկերքի վաղաժամ ծերացումը վտանգավոր է հատկապես վաղ ժամկետներում։ Այդպիսի դեպքերում նշանակվում է բուժման հատուկ կուրս։ Ընկերքի վաղաժամ ծերացման դեպքում պարտադիր պետք է դոպլերոմետրիա անել արյունաշրջանառության վիճակը պարզելու և պտղի հիպոքսիան բացահայտելու նպատակով։

Կարդացեք՝ Դոպլեր հետազոտությունը հղիության ընթացքում

Այդպիսի խնդրով ուղեկցվող հղիությանը վաղաժամ ծննդաբերություն է սպառնում, ուստի և հատուկ ուշադրություն է պահանջում։