Լյուտեինիզացնող հորմոն․ անցում աղջնակից կնոջ

25.02.201514827

Լյուտեինիզացնող հորմոնն արտադրում է հիպոֆիզը։ Այն պատասխանատու է իգական սեռական հորմոնների արտադրման համար, կարգավորում է դաշտանային ցիկլը և նպաստում է արգանդի ու ձվարանների զարգացմանը։

Անցում աղջնակի կարգավիճակից կնոջ կարգավիճակի

Մինչև դեռահասության տարիքը լյուտեինիզացնող հորմոնի մակարդակը ցածր է։ Սեռահասունացմանը զուգընթաց օրգանիզմն ազդակ է տալիս հիպոֆիզին, և լյուտեինիզացնող հորմոնն սկսում է ակտիվորեն արտազատվել արյան մեջ։ Սկսում են զարգանալ իգական սեռական օրգանները, խթանվում է էստրոգենների և պրոգեստերոնի սինթեզը։

Կարդացեք՝ Պրոգեստերոն․ մայրական բնազդի հորմոն

Լյուտեինիզացնող հորմոնի խտությունը փոփոխվում է դաշտանային ցիկլի ընթացքում, արյան մեջ արտազատվող ակտիվ մասն առաջացնում է ձվազատում։ Հղիության ընթացքում լյուտեինիզացնող հորմոնն իր տեղը զիջում է էստրոգեններին։ Դաշտանադադարից հետո այս հորմոնի մակարդակը կնոջ օրգանիզմում բարձրանում է։ Անպտղության դեպքում նկատվում է լյուտեինիզացնող հորմոնի խտության մեծացում և ստերոիդների ցածր մակարդակ։

Կարդացեք՝ Էստրոգեն․ կարևորագույն հորմոն կնոջ օրգանիզմում

Սովորաբար լյուտեինիզացնող հորմոնի հետազոտություն է անցկացվում սեռական գեղձերի աշխատանքի խանգարման, անպտղության, սեռական ցանկության նվազման, սպասվելիք ձվազատման օրը որոշելու դեպքում եւ այլն։

Ինչո՞ւ է անհրաժեշտ հետևել լյուտեինիզացնող հորմոնի մակարդակին

Հնարավոր է, որ լյուտեինիզացնող հորմոնի մակարդակը դեռահասության տարիքում բարձր լինի։ Վախենալու ոչինչ չկա։ Դա կոչվում է հիպոֆիզի վաղժամ հասունացում։ Արդեն իսկ հասուն տարիքի կանանց օրգանիզմում էլ այն կարող է բարձրանալ, ինչը կվկայի ձվարանների պոլիկիստոզային համախտանիշի մասին, սակայն ճշգրիտ ախտորոշման համար անհրաժեշտ կլինի մի շարք հավելյալ հետազոտություններ անցկացնել, քանի որ լյուտեինիզացնող հորմոնն այդ պարագայում միանշանակ ցուցիչ չէ։

Կարդացեք՝ Ի՞նչ է իրենից ներկայացնում ձվարանների պոլիկիստոզային համախտանիշը

Ինչ վերաբերում է լյուտեինիզացնող հորմոնի կտրուկ բարձրացմանը, ապա նշենք, որ դրա պատճառները բազմազան են։ Պատճառների շարքում գլխավորը դաշտանադադարն է, իսկ եթե հորմոնի մակարդակը բարձր է վերարտադրողական տարիքի կնոջ օրգանիզմում, ապա դա կարող է վկայել վաղ դաշտանադադարի մասին, և դաշտանային ցիկլը վերականգնելու նպատակով սովորաբար հորմոնային թերապիա է պահանջվում։ Լյուտեինիզացնող հորմոնի բարձրացման պատճառ կարող են լինել նաև սեռական գեղձերի առաջնային դիսֆունկցիան և հորմոնային դեղամիջոցների օգտագործումը։

Լյուտեինիզացնող հորմոնի մակարդակի նվազումը կարող է վկայել ճարպակալման, հիպերպրոլակտինեմիայի, հիպոֆիզային նանիզմի, Սիմոնդսի հիվանդության մասին։ Հորմոնի մակարդակը կարող է նվազել նաև վիրահատությունից, ուժգին սթրեսից, ինչպես նաև այնպիսի դեղամիջոցների օգտագործումից հետո, ինպիսիք են անաբոլիական ստերոիդները, հակակոնվուլսանտները, պերօրալային բեղմնականխիչները։

Լյուտեինիզացնող հորմոնի խնդիրը կնոջ վերարտադրողական օրգանների՝ արգանդի և ձվարանների բնականոն աշխատանքը պահպանելն է։ Քանի դեռ լյուտեինիզացնող հորմոնի մակարդակը նորմայի սահմաններում է, կինը կարող է հղիանալ, եթե չկան խանգարող այլ գործոններ։