Թութք (հեմորոյ)

05.12.20171832

Հղիության ընթացքում փոքր կոնքի անոթների ճնշվածության արդյունքում հնարավոր է, որ հետանցքի շրջանի և ուղիղ աղիքի երակները լայնանան, այսինքն՝ թութք ի հայտ գա։

Թութքի առաջացման վտանգի գործոններն են՝

  • անոթային համակարգի կառուցվածքի գենետիկական առանձնահատկություններ, 
  • փորկապություն, 
  • ֆիզիկական ծանր աշխատանք, 
  • երկարատև նստակյաց աշխատանք, 
  • քրոնիկական կոլպիտ, 
  • հավելումների քրոնիկական բորբոքում, 
  • հղիության առաջին և երկրորդ կեսի տոքսիկոզ, 
  • գիրություն, 
  • աղիների սպազմ՝ պայմանավորված սթրեսով և նյարդային լարվածությամբ։

Կարդացեք՝ Թութքը հղիությունից առաջ և հետո

Ախտանշանները

Սկզբնական շրջանում սկսում է անհանգստացնել անհարմարության զգացումը, հետանցքի շրջանի այրոցն ու օտարածին մարմնի առկայության զգացումը։ Դեֆեկացիան ցավոտ է լինում։ Թութքային հանգույցները կարող են դուրս գալ հետանցքից, պատռվել, որի դեպքում թույլ, քսվող արյունային արտադրություն է ի հայտ գալիս։ Հնարավոր է, որ անգամ չնկատեք արյունը, սակայն մշտապես խոնավություն և քոր զգաք հետանցքի շրջանում։

Բուժումը չսկսելու դեպքում ժամանակի ընթացքում ցավն ուժգնանում է քայլելիս, նստելիս, ինչպես նաև հազալիս։ Արտաթորելիս ցավն ավելի ուժեղ է լինում։ Ծանր դեպքերում ցավն այնքան ուժեղ է լինում, որ հնարավոր չի լինում նստել և քայլել, բարձրանում է ջերմությունը։

Բուժումը

Ինչպես ցանկացած հիվանդություն, այնպես էլ թութքը ավելի հեշտ է կանխարգելել, քան բուժել։ Կանխարգելման երկու հիմնական միջոց կա՝ ծննդաբերությունից հետո Կեգելի վարժություններ կատարել և կանխել փորկապությունը։

Փորկապությունից խուսափելու համար խորհուրդ է տրվում հում և խաշած բանջարեղեն, մրգեր ուտել և մրգահյութեր խմել, ինչպես նաև օրական մոտավորապես երկու լիտր ջուր խմել։ Հաճախ առավոտյան քաղցած ժամանակ խմած մեկ բաժակ սառը ջուրը կարող է լուծել խնդիրը։

Օգտակար է նաև մեկ գդալ բուսական ձեթը, օրինակ՝ ձիթապտղի, կամ մեկ բաժակ կեֆիրը քաղցած ժամանակ։ Թութքի առաջին աստիճանների դեպքում մազեր, գելեր, մոմիկներ և ցավը մեղմող, բորբոքումը վերացնող այլ միջոցներ են նշանակվում։

Թութքային հանգույցների ամբողջական վերացման համար վիրաբուժական միջամտություն է կատարվում։ Կան նաև խնայող մեթոդներ՝ ինֆրակարմիր ֆոտոկոագուլյացիա (այրում) կամ սկլերոզավորում։