Հղիության վակուումային ընդհատում

Հղիության վակուումային ընդհատում

Հղիության ընդհատման տվյալ մեթոդն իր անվտանգ և ապահով մոտեցումով տարբերվում է վիրաբուժական աբորտի այլ տեսակներից: Այն նշանակվում է բժիշկ գինեկոլոգի կողմից այնպիսի բժշկական ցուցումների դեպքում, ինչպես հղիության չհաջողված դեղորայքային ընդհատումն է, պտղի զարգացման անոմալիաները, մոր կյանքին վտանգ սպառնացող քրոնիկական հիվանդությունները, կամ պարզապես կատարվում է կնոջ ցանկությամբ:

Հղիության վակուումային ընդհատումը կատարվում է առաջին եռամսյակում (նախընտրելի է 6-12 շաբաթներում): Որքան վաղ ժամկետներում այն կատարվի, այնքան քիչ կլինի բարդությունների առաջացման վտանգը: Տվյալ վիրահատությունը տևում է 5-10 րոպե, և 1-2 ժամ անց կինն արդեն դուրս է գրվում: Ի տարբերություն արգանդի խոռոչը քերելու եղանակին՝ արգանդի վնասված հատվածն ընդամենը 20 սմ խորանարդ է կազմում, այսինքն արգանդի լորձաթաղանթի վնասումը շատ չնչին է:

Վակուումային աբորտի բացասական կողմն այն է, որ այն անցանկալի հղիությունից ազատելու 100%-անոց արդյունք չի երաշխավորում: Վիճակագրական տվյալներով՝ 2% դեպքերում պտղաձուն մնում է իր տեղում:

Վակուումային աբորտի հակացուցումները

Այս միջամտությունը հակացուցված է վարակային հիվանդությունների սուր ընթացքի փուլում՝ հերպեսից մինչև սովորական մրսածություն: Սա պայմանավորված է նրանով, որ այդ դեպքում հնարավոր է վարակը փոխանցվի սեռական օրգաններին և հանգեցնի հետվիրահատական բարդությունների: Այդ պատճառով, հիվանդության առկայության դեպքում բժիշկը նշանակում է դեղորայքային բուժում նախքան վիրահատությունը:

Մյուս հակացուցումը արտարգանդային հղիությունն է: Այս պաթոլոգիայի դեպքում պտղաձուն զարգանում է արգանդից դուրս, ինչը վտանգավոր է մոր կյանքի համար: Արյան վատ մակարդելիության պարագայում բժիշկը կառաջարկի աբորտի և բուժման անցկացման անհատական եղանակ:

Շատ կանանց մտահոգում է՝ արդյոք այս միջամտությունը ցավոտ է: Այն կարող է անցկացվել տեղային անզգայացման կամ ներերակային անզգայացման ներքո, բայց միջամտությունն իրենով ուժգին ցավային զգացողություններ չի առաջացնում: Հնարավոր է մի փոքր անհարմարության զգացողություն լինի արգանդի պարանոցի բացվելիս: Վիրահատությունից հետո բնական է որովայնի ստորին հատվածում ձգող ցավերի առաջացումը, քանի որ վակուումային ասպիրացիան վերջիվերջո վիրաբուժական միջամտություն է: Ընդհանուր առմամբ, բուն միջամտության ժամանակ վառ արտահայտված ցավեր չեն դիտվում:

Վիրահատության հիմքում ընկած է էլեկտրավակուումային գործիքի օգտագործումը: Դրա միջոցով արգանդում ստեղծվում է կայուն բացասական ճնշում, և արդյունքում պտղաձուն շերտազատվում է և դուրս գալիս: Այս միջամտության դեպքում արգանդի անոթները չեն տուժում, իսկ արգանդի պարանոցը լայնացնող մետաղական գործիքներից հրաժարվելն օգնում է խուսափել վնասվածքներից: Այսպիսով նվազում է ցերվիկալ անբավարարության հավանականությունը, ինչը, հնարավոր է խոչընդոտեր հետագա հղիությունը:

Վիրահատության նախապատրասվելը

Կինը նախ և առաջ խորհրդատվության է գնում գինեկոլոգի մոտ, ով պարզում է հղիության ժամկետները, որոշում է աբորտի տեսակը, նշանակում է անհրաժեշտ ստուգումները: Սովորաբար խորհուրդ է տրվում ըստ անհրաժեշտության հանձնել հետևյալ անալիզները՝

  • արյան ընդհանուր անալիզ,
  • մեզի ընդհանուր անալիզ,
  • հեշտոցի միկոֆլորայի որոշման քսուք,
  • արյան մակարդելիությունը ստուգող անալիզ,
  • սեռավարակների հայտնաբերման համար՝ ՊՇՌ անալիզ,
  • RW,
  • հեպատիտի և ՄԽԳ անալիզ և այլն:

Կարդացեք՝ Մարդու խորիոնային գոնադոտրոպինը (ՄԽԳ) հղիության ընթացքում:

Անալիզների արդյունքներով գնահատվում է կնոջ առողջական վիճակը, բացառվում են տվյալ միջամտության հակացուցումները:

Վիրահատության ընթացքը

Բոլոր անհրաժեշտ հետազոտություններն անցնելուց հետո կատարվում է վակուումային ասպիրացիան: Վիրահատությունն անցկացվում է գինեկոլոգիական աթոռի վրա, կինը պառկում է, ինչպես սովորական ստուգման ժամանակ, հեշտոցի ներքին պատերն ու մուտքը մշակվում են հականեխիչ լուծույթով: Եթե կինը նախկինում չի ծննդաբերել, ապա անհրաժեշտ է հատուկ գործիքի միջոցով լայնացնել արգանդի պարանոցը: Հատուկ խողովակի միջոցով էլեկտրական պոմպը ներմուծվում է արգանդի խոռոչ, որտեղ այն ստեղծում է 0.5 մթնոլորտային ճնշման դաշտ: Գործիքը զգուշությամբ անցկացվում է արգանդի պատերով՝ հպվելով լորձաթաղանթին: Այդ ընթացքում պտղաձուն շերտազատվում է և քաշվում է խողովակի մեջ: Քանի որ արգանդի հյուսվածքները հեռացվում են, այն սկսում է կծկվել, որի ընթացքում հնարավոր է որոշակի սպազմ լինի:

Հետվիրահատական շրջան

Վիրահատության տևողությունը 5 րոպե է: Ավարտից հետո հիվանդին հարկավոր է մի քանի ժամյա հանգիստ բուժհաստատությունում: Վարակներից խուսափելու համար բժիշկը նշանակում է համապատասխան հակաբիոտիկների կուրս, իսկ եթե կինն ունի կծկումային ցավեր՝ նաև ցավազրկող դեղամիջոցներ: Լավ կլինի ողջ օրը նվիրեք հանգստանալուն: Եթե բարդություններ չառաջանան հաջորդ օրը կարելի է վերադառնալ առօրյա գործերին: Միջամտությունից 2-3 շաբաթ անց հարկավոր է այցելել բուժող բժշկին, անցնել ՈՒՁ և այլ հետազոտություններ:

Սեռական հարաբերություններից պետք է հրաժարվել մոտ 2-3 շաբաթ, որպեսզի արգանդը հասցնի ապաքինվել: Պարտադիր պետք է խուսափել հղիությունից առնվազն երկու ամիս: Եթե վիրահատությունից որոշ ժամանակ անց հղիության թեստը և ՄԽԳ անալիզը դրական արդյունք են ցույց տալիս, սա կարող է խոսել նրա մասին, որ պտղի և ընկերքի հեռացումն ամբողջությամբ չի կատարվել և հղիությունը պահպանվել է: Շատ վտանգավոր է, եթե պարզվի, որ հղիությունն արտարգանդային է: Այդ պատճառով էլ շատ կարևոր է, որ վիրահատությունից երկու շաբաթ անց կինն անպայման դիմի գինեկոլոգի և ըստ անհրաժեշտության անցնի ՈՒՁ հետազոտություն:

Հղիության ընդհատման վակուումային տարբերակը նվազագույն վտանգներ է կրում՝ համեմատած մյուս մեթոդների հետ: Բայց պետք է հասկանալ, որ այս միջամտությունը կյանքի բնական ցիկլում այնուամենայնիվ որոշակի ազդեցություն է թողնում օրգանիզմի վրա, այդ թվում և հետագայում երեխա լույս աշխարհ բերելու կարողության վրա:

Ինչ է էպիզիոտոմիան և ինչպես վերականգնվել դրանից հետո

Ինչ է էպիզիոտոմիան և ինչպես վերականգնվել դրանից հետո

Ծննդաբերության ժամանակ հեշտոցը լայնանում է, բայց երբեմն դա կարող է բավարար չլինել երեխայի գլուխը տեղավորելու համար

Ի՞նչ անել, եթե առանց որևէ պատճառի կապտուկներ են առաջանում

Ի՞նչ անել, եթե առանց որևէ պատճառի կապտուկներ են առաջանում

Կապտուկը անոթների վնասվածքի պատճառով մաշկի վրա առաջացած արյունազեղումն է

Ստամոքսի քաղցկեղ

Ստամոքսի քաղցկեղ

Ընթացակարգի ժամանակ ստամոքսի մեջ մտցվում է հատուկ սարք, որի միջոցով բժիշկն ուսումնասիրում է ստամոքսի բոլոր հատվածները, ինչպես նաև 12-մատնյա աղին։

Ինչպե՞ս է գործում հղի կանանց դիմադրողականությունը

Ինչպե՞ս է գործում հղի կանանց դիմադրողականությունը

Գենի և դիմադրողականության տեսանկյունից՝ պտուղը օտար օրգանիզմ է կնոջ համար