Վիտամինները հղիությունից հետո

23.02.2016 13710
Հղիության ընթացքում կնոջ օրգանիզմն իր ունեցած ամբողջ պաշարն օգտագործում է՝ ապահովելով իր և երեխայի բոլոր օրգան-համակարգերի բնականոն կենսագործունեությունը։ Հետագայում լակտացիայի և կրծքով կերակրման շրջանը նույնպես պահանջում է օգտակար նյութերի որոշակի պաշար, այդ պատճառով հարկավոր է երեխայի ծնունդից հետո վիտամիններ ընդունել, ինչը կօգնի հաղթահարել հետծննդաբերական շրջանը՝ չվնասելով սեփական առողջությանը և գեղեցկությանը, ինչպես նաև արագ վերականգնել ուժերը։

Կարդացեք՝ Կալցիումը հղիության ընթացքում

Ինչո՞ւ է հարկավոր վիտամիններ օգտագործել ծննդաբերությունից հետո

Որպեսզի վերականգնումը սահուն, առանց խնդիրների ընթանա և կարճ տևի։ Հղիության և ծննդաբերության հետևանքով հյուծված օրգանիզմն ուղղակի հավելյալ աջակցություն է պահանջում վիտամինների տեսքով։

Լակտացիան հավելյալ ծանրաբեռնվածություն է։ Սննդի բազմազանությունը (միս, կաթ, բանջարեղեն, մրգեղեն, վիտամիններով հարուստ այլ մթերքներ) չի լրացնում վիտամինների անհրաժեշտ քանակը։

Սննդամթերքները չեն լրացնում նաև վիտամին C-ի պակասը, բացի այդ, ասկորբինաթթու պարունակող մրգեր շատ ուտելու դեպքում հնարավոր է, որ ալերգիա առաջանա։

B խմբի վիտամինները նույնպես ավելի հեշտ է լրացնել հավելյալ ընդունելով, քան դրանք պարունակող մթերքներ ուտելով։

Ի՞նչ վիտամիններ օգտագործել ծննդաբերությունից հետո

Ծննդաբերույունը սովորաբար ուղեկցվում է մեծ քանակությամբ արյան կորստով, ինչի արդյունքում արյան մեջ հեմոգլոբինի մակարդակը նվազում է։ Սակավարյունությունից խուսափելու նպատակով պետք է օրգանիզմում լրացնել երկաթի պակասը։ Երկաթ պարունակող դեղամիջոցների օգտագործումը պետք է շարունակվի այնքան, մինչև հեմոգլոբինի մակարդակը կարգավորվի։

Կրծքով կերակրող մոր համար հատուկ կարևորություն ունի վիտամին D-ն։ Այն ամրացնում է ոսկորները և ատամները, իսկ պակասը հանգեցնում է օստեոպորոզի։ Վիտամին D-ով հարուստ մթերքներից են ձկան յուղը, կաթնաշոռը, լյարդը և այլն։

B խմբի վիտամինները կարևոր են դեպրեսիվ տրամադրությունից խուսափելու համար։ Հետծննդաբրական դեպրեսիան ծանր է անդրադառնում կյանքի մի շարք ոլորտների վրա, ուստի ավելի լավ է վիտամինների օգնությամբ խուսափել դրանից։

Վիտամին В9՝ ֆոլաթթու, նշանակվում է դեռևս հղիության պլանավորման փուլում, այն անփոխարինելի է կնոջ համար, բարելավում է կենտրոնական նյարդային համակարգի, ինչպես նաև իմունային և արյան համակարգի աշխատանքը։ Ֆոլատներ են պարունակում լոբազգիները, կաղամբը, կանաչ սոխը, բրոկոլին, գազարը, հնդկաձավարը, կաթնաշոռը, խավիարը, կանաչ ոլոռը, սպանախը և այլն։

Կարդացեք՝ Ֆոլաթթվի դերն ու նշանակությունն առողջության համար

Վիտամին В1 են պարունակում արևածաղկի սերմերը, ընկույզը, սպանախը, սալորը և այլն։
Վիտամին В2 են պարունակում խոզի միսը, ձուն, կաթը և այլն։
Վիտամին В6-ով է հարուստ լյարդը, խոզի միսը, բանանը, կարտոֆիլը, կաղամբը և այլն։
Վիտամին В12 են պարունակում կաթնաթթվային մթերքները, կանաչ սոխը, ծովամթերքը և այլն։

Վիտամին С-ն օգնում է վերադարձնել մաշկի առողջությունը, ամրացնում է անոթները և իմունիտետը։ Այդ վիտամինով են հարուստ ցիտրուսային մրգերը, բրոկոլին, սև հաղարջը և այլն։

Կարդացեք՝ Որքա՞ն վիտամին C է անհրաժեշտ մեր օրգանիզմին

Վիտամին A-ն մասնակցում է կմախքի ոսկորների և ատամների, իմունային համակարգի ձևավորմանը, նրանից է կախված տեսողության որակը։ Պարունակվում է լյարդում, սերուցքային կարագում, ձվի դեղնուցում։

Այսօր դեղագործական տարբեր ընկերություններ առաջարկում են հատուկ հղի և կերակրող կանանց համար նախատեսված վիտամինային համալիրներ, որոնք ապահովում են վիտամինների և միկրոտարրերի անհրաժեշտ քանակը։

Վիտամինները պետք է ընտրել միայն բժշկի հետ խորհրդակցելուց հետո, քանի որ դրանց ավելցուկը կարող է կողմակի ազդեցություն թողնել օրգանիզմի վրա (ցան, գլխացավ, ստամոքսաղիքային տրակտի խանգարում, այտուցվածություն և այլն)։