Ուլտրաձայնային հետազոտությունը տղամարդկանց դեպքում

Տղամարդիկ ուժեղ սեռի ներկայացուցիչներ են, բայց հաճախ են կանաց աջակցության կարիքը զգում: Դա լինում է հատկապես այն ժամանակ, երբ նրանց խնդիրն առողջական է։ Եթե այն կապված է ինտիմ ոլորտի հետ, ապա կանանցից պահանջվում է իրենց ամբողջ բնածին նրբազգացությունը, համբերությունն ու հավատարմությունը տղամարդուն օգնելու համար: Տղամարդուն հեշտ չէ բժշկի այցելելու կամ զննման գնալու որոշում կայացնել: Այդ պատճառով շատ կարևոր է, որ կինը բացատրի ժամանակին կատարված ախտորոշման կարևորությունը․ չէ՞ որ ժամանակակից մեթոդները թույլ են տալիս արագ և հստակ պատասխանել անհանգստացնող բոլոր հարցերին: Տղամարդու առողջական վիճակի ստուգման այդպիսի մի մեթոդ է սեռական օրգանների ուլտրաձայնային հետզոտությունը:

Ինչպե՞ս է կատարվում տղամարդկանց ՈւՁՀ-ն

Իզուր չէ, որ այս մեթոդը համարվում է լավագույնը: Բժիշկը կարողանում է առանց վիրահատական միջամտության տեսնել ներքին օրգաններում կատարվող գործընթացների բավականին հստակ պատկեր: Տղամարդու սեռական օրգանների ՈւՁ հետազոտությունը կարող է տալ բազմաթիվ հարցերի պատասխաններ: Այն թույլ է տալիս՝

• տեսնել խորշիկային մարմինների կառուցվածքը, մասնավորապես դրանց արյունային մատակարարումը, կառուցվածքային փոփոխությունները, կուտակումները, արյունազեղումները և այլ գոյացությունները, 
• բացահայտել կողմնակի մարմինների առկայությունը միզուղիներում, 
• որոշել փոքր կոնքի արյունատար անոթներում արյան հոսքի հնարավոր խանգարումները կամ թրոմբների առկայությունը, 
• ժամանակին հայտնաբերել տարաբնույթ նորագոյացությունները,
• վնասվածքների ժամանակ տեղեկություն ստանալ խորշիկային մարմինների և դրանց թաղանթների վիճակի մասին, 
• որոշել հնարավոր հեմատոմաների տեղակայումը և չափսերը, 
• իրականացնել ընթացիկ բուժման վերահսկում և ժամանակին կատարել շտկումներ նշանակված բուժման սխեմայում:

Այդպիսով՝ տղամարդկանց փոքր կոնքի օրգանների ՈՒՁՀ կիրառվում է ինչպես առաջնային ախտորոշման համար, այնպես էլ արդեն գոյություն ունեցող խնդրի բուժման ընթացքում: Իսկ եթե նաև հաշվի առնենք այս մեթոդի անցկացման պարզությունը, որ չի պահանջվում երկարատև նախապատրաստում, լրացուցիչ միջամտություններ և ցավոտ չէ, ապա այն կարելի է համարձակորեն համարել ներկայումս գոյություն ունեցող ախտորոշիչ մեթոդներից ամենալավը:

Ծանոթանանք ավելի մանրամասնորեն

Սովորաբար ՈՒՁՀ սարքերը հագեցած են տարբեր ցուցիչներով, որոնց ընտրությունը կախված է հետազոտության նպատակից և տվյալ իրավիճակից:

Առանձնացնում են՝ 

• ախտորոշման տրանսաբդոմինալ (միջորովայնային) եղանակ, որը կատարվում է որովայնի առաջնային պատի միջով,
• տրանսռեկտալ եղանակ՝ ուղիղ աղու միջով, 
• տրանսուրետրալ եղանակ՝ միզուկի միջով:

Սովորաբար հետազոտությունն սկսվում է տրանսաբդոմինալ մեթոդով, որը թույլ է տալիս գնահատել շագանակագեղձի, միզապարկի և հարակից օրգանների ընդհանուր վիճակը: Եթե չեն դիտվում շեղումներ, և հիվանդը ոչ մի գանգատ չունի, ապա հետազոտությունն այդքանով ավարտվում է: Եթե ստացված պատկերը պահանջում է հստակեցում, կիրառվում է տրանսռեկտալ մեթոդը: Այն թույլ է տալիս շագանակագեղձի ամբողջական հետազոտություն անցկացնել, ինչպես նաև տեսնել սերմնային պղպջակները, որոնք չեն երևում նախորդ մեթոդով հետազոտելիս: Այսպես կարելի է գտնել անհանգստացնող հարցերի պատասխանները՝ կապված հնարավոր բորբոքումների կամ բեղմնավորման անհաջող փորձերի հետ: Տրասռեկտալ ուլտրաձայնային հետազոտության ժամանակ սարքի ցուցիչը ամենամոտն է գտնվում հետազոտվող օրգանին, և այդ պատճառով էկրանին արտացոլվող պատկերն ավելի շատ տեղեկություն կարող է տալ:

Որպեսզի տրանսաբդոմինալ ուլտրաձայնային հետազոտության արդյունքները հստակ լինեն, անհրաժեշտ է, որ միզապարկը լիքը լինի: Իսկ տրանսռեկտալ ՈՒՁՀ-ի դեպքում նման պայմանի առկայություն չի պահանջվում: Ինչ վերաբերում է տրանսուրետրալ մեթոդին, այն այնքան էլ տարածված չէ և հիմնականում կիրառվում է տղամարդկանց սեռական օրգանների փոքր ինվազիվ վիրահատությունների ժամանակ:

Ե՞րբ է անհրաժեշտ դիմել մասնագետի

Ինչպե՞ս որոշել արդյոք տղամարդուն անհրաժեշտ է այցելել ուլտրաձայնային հետազոտության: Իհարկե ավելորդ չեր լինի առողջական խնդիրները բացառելու համար այս հետազոտության պարբերաբար այցելելը, բայց համաձայնեք, որ նման գիտակցված քայլի գնալը ուժեղ սեռի ոչ բոլոր ներկայացուցիչներին է բնորոշ: Իսկ եթե ձեր զուգընկերոջ տարիքը մոտ է քառասունին, անհրաժեշտ կլինի ՈՒՁՀ մասնագետին այցելելը ներառել պարտադիր գործողությունների ցանկում: Հենց այս տարիքային սահմանն է, որ բնորոշվում է շագանակագեղձի ուռուցքների առաջացման մեծ վտանգով, իսկ ինչպես հայտնի է հիվանդությունը կանխարգելելն ավելի հեշտ է, քան այն բուժելը:

Որքան էլ ցավալի է, տղամարդու առողջական խնդիրները գնալով ավելի շատ են անհանգստացնում երիտասարդներին: Սա հանգեցնում է ոչ միայն ֆիզիկական ակտիվության կորստի, այլև անձնական և ընտանեկան կյանքում դժվարությունների առաջացման: Եթե ձեր զուգընկերն ունի թեկուզ և չնչին անհանգստություն, ահրաժեշտ է նրան օգնել, որպեսզի բժշկի դիմելու որոշում կայացնի: Կախված տղամարդու գանգատներից և առկա ախտանշաններից՝ մասնագետը կնշանակի համապատասխան օրգանների հետազոտություն:

Սովորաբար շագանակագեղձի և միզապարկի ՈՒՁ հետազոտություն նշանակվում է նորագոյացությունների առկայություն կասկածելու դեպքում, ինչպես նաև սերմնահեղուկի հետազոտության (սպերմոգրամայի) արդյունքների էական շեղումների դեպքում: Այս հետազոտությունը ցուցված է նաև միզուղիների և սերմնաժայթքման ֆունկցիաների ցանկացած խանգարման դեպքում: Շագանակագեղձի հիվանդությունների սիմպտոմատիկան (ախտանշանաբանություն) ներառում է ցավեր և տհաճ զգացողություն միզարձակման ժամանակ, ինչպես նաև որովայնի ստորին հատվածի ցավեր: Այս նշանների առկայության դեպքում անհրաժեշտ է պարտադիր այցելել ուլտրաձայնային հետազոտության:

Կատարվում է նաև փոշտի օրգաների ուլտրաձայնային հետազոտություն, որը ներառում է ամորձու և սերմնալարի հետազոտություն: Ցավի առկայության դեպքում այս հետազոտությունը թույլ կտա բացահայտել բորբոքային պրոցեսները, ուռուցքների կամ կիստայի առկայությունը: Այս օրգաններում արյան հոսքի գնահատումը թույլ կտա բացահայտել մի շատ տարածված հիվանդություն՝ վարիկոցելեն: Ցանկացած դեպքում պետք է հիշել, որ առողջական խնդրի արդյունավետ բուժումը կախված է նրա վաղ բացահայտումից: