Գրգռված աղու համախտանիշը և հղիությունը
Գրրգռված աղու համախտանիշի (ԳԱՀ) ախտանշանները՝ որովայնի ցավային սպազմերը, մետեորիզմը, փորլուծությունը կամ փորկապությունը, սովորաբար մեղմանում են հղիության ընթացքում: Դրա պատճառը պրոգեստերոն հորմոնի բարձր մակարդակն է, որն առկա է օրգանիզմում հղիության ամբողջ ընթացքում: Այս հորմոնը հաճախ թուլացնող ազդեցություն է ունենում աղիների և ստամոքսաղիքային տրակտի վրա, որով էլ բացատրվում է ԳԱՀ ախտանշանների մեղմացումը:
Այս հորմոնալ փոփոխությունները կարող են նաև առաջացնել ամբողջ ստամոքսաղիքային տրակտի տոնուսի նվազում, որը կարող է հանգեցնել փորկապության: Դրանից խուսափելու համար անհրաժեշտ է որոշակի փոփոխություններ մտցնել սննդակարգում՝ հատկապես, եթե ԳԱՀ-ի պատճառով ավելի հակված եք փորկապության: Փորձեք ավելի շատ ջուր խմել և սննդակարգում ավելացնել բջջանյութի քանակը: Եթե ԳԱՀ-ի համար դեղորայք եք ընդունում, անհրաժեշտ է խորհրդակցել բժշկի հետ նախքան կփորձեք հղիանալ, որպեսզի բուժման հնարավոր փոփոխությունները կատարվեն բեղմնավորումից առաջ:
ԳԱՀ-ի պարագայում ընդունվող որոշ դեղամիջոցներ, ինչպես լոպերոմիդը, հակացուցված են հղիության ընթացքում: Սակայն կան որոշակի դեղամիջոցներ, որոնք կարելի է ընդունել փոքր չափաբաժիններով և ընդհատել ընդունումը ծննդաբերությունից գրեթե մեկ ամիս առաջ, որպեսզի նվազեցվի երեխայի օրգանիզմում աբստինենտային համախտանիշի առաջացման հավանականությունը:
Անանուխի յուղը (պարկուճներով), որ հաճախ օգնում է ԳԱՀ-ի դեպքում, անվտանգ է հղիության ընթացքում ընդունելու համար: Ախտանշանների մեղմացման համար այլ դեղամիջոցներ ընդունելուց առաջ անհրաժեշտ է խորհրդակցել բժշկի հետ:
Հնարավոր է, որ բախվեք ԳԱՀ-ի որոշ ախտանշանների, օրինակ՝ մարսողական խանգարման վատթարացմանը: Այնուամենայնիվ գոյություն ունեն դեղամիջոցներ, օրինակ՝ գեվիկսոնը, որը կարող եք անվտանգ կերպով ընդունել հղիության ընթացքում ախտանիշների մեղմացման համար: Մնացած բոլոր դեպքերում ԳԱՀ-ն ինքնին ոչ մի էական ազդեցություն չի ունենում բեղմնավորման կամ հղիության վրա: