Հղիության 21-րդ շաբաթ

Հղիության հինգերորդ ամիսն ավարտվեց, ծննդաբերությանը մնաց չորս ամիս։ Քսանմեկերորդ շաբաթում շատերի քաշն արդեն ավելացած է լինում մոտ 4 կգ-ով և շարունակում է ավելանալ ավելի արագ։

Պտղի զարգացումը

Պտուղը կշռում է 400 գ-ից փոքր-ինչ ավել, երկարությունն արդեն 26-28սմ է: Շարունակվում է պտղի զարգացման առավել բուռն շրջանը: Պտուղը փուլերով քնում և շարժվում է, սակայն գերադասում է ավելի շատ քնել: Գլխի մաշկը պատվում է ժամանակավոր մազերով (լանուգո): Մարմինը պատվում է պանրանման քսուքով:

Աղջիկների արգանդն ու ձվարանները ձևավորված են. վերջինները սեռական բջիջներ են պարունակում: Սաղմնավորված կաթնատամներում սկսում են կրային աղեր կուտակվել, վերջնականապես ձևավորվում է դենտինը (ատամի հիմնական նյութը): Էմալն ավելի ուշ է առաջանում: Ընկերքն ամբողջովին ձևավորված է, մեծանում է դրա տրամագիծը:

Ի՞նչ է կատարվում

Հղիության այդ շրջանն աչքի չի ընկնում անհանգստություն պատճառող գործոններով, սակայն որոշ անհարմարություններ կինն այնուամենայնիվ ունենում է իր գերզգայունության պատճառով։

Կարդացեք՝ Մեջքի ցավը հղիության ընթացքում

Հնարավոր է, որ մեջքի ցավ ի հայտ գա, բայց եթե դադարեք երկար ժամանակ նույն դիրքով նստել, այն կնահանջի։ Սովորեք թուլանալ և լսել ձեր օրգանիզմին։ Նույնը վերաբերում է քնին։ Ամենաճիշտ և հարմար դիրքը ձախ կողքի պառկած դիրքն է։

Սնունդը

Ախորժակը լավանում է, այն վերահսկելը՝ դժվարանում։ Խուսափեք ավելորդ քաղցրեղենից և գազավորված ըմպելիքներից, դրանք կնպաստեն գիրանալուն։ Եթե որոշակի սխեմայի հետևեք, հեշտությամբ կկարողանաք պահպանել այն մինչև ծննդաբերություն։ Սնվեք 4-5 անգամ, կուշտ նախաճաշեք և օրն ավարտեք թեթև ընթիքով։

Կարդացեք՝ Սնունդը հղիության ընթացքում

Հետազոտություններ

Քսանմեկերորդ շաբաթում հատուկ հետազոտություններ և ՈւՁՀ չի նշանակվում, եթե կինը մինչ այդ չի անցել այդ հետազոտությունները։ Գանգատների դեպքում բժիշկն անհատական սկզբունքով համապատասխան հետազոտություն կնշանակի։