Հղիության 37-րդ շաբաթ

Եթե ձեր առաջին հղիությունն է, ապա ամենայն հավանականությամբ կհասնեք քառասուներորդ շաբաթին և կծննդաբերեք ըստ պլանավորածի։ Եթե արդեն երեխաներ ունեք, ապա հնարավոր է, որ ծննդաբերեք երեսունյոթ շաբաթականում։ Այդ ծննդաբերությունը վաղաժամ չի համարվում, հղիությունը բժշկական չափորոշիչներով համարվում է զարգացած։

Կարդացեք՝ Վաղաժամ ծննդաբերություն

Պտղի զարգացման փուլ

Պտղի միջին երկարությունը 48-50 սմ է, մարմնի զանգվածը`2800-3000գ: Պանրանման զանգվածը դեռևս բավականին շատ է: Աղվամազերի քանակը փոքր-ինչ նվազեւմ է: Քթի և ականջի աճառներն ամրանում են: Ենթամաշկային ճարպաշերտի զանգվածն ավելանում է` հասնելով մարմնի ամբողջ զանգվածի 15%-ին: Դա անհրաժեշտ է պտղի մշտական կայուն ջերմաստիճանն ապահովելու համար:

Մաշկը դառնում է բաց վարդագույն արյունատար անոթների մակերեսային դասավորության շնորհիվ: Ստամոքսաղիքային համակարգը դեռևս մնում է անկատար: Աղիքում կուտակվում է մեկոնիումի որոշ քանակություն, որը սովորաբար արտազատվում է ծնվելուց որոշ ժամանակ անց:

Պտղի ներարգանդային կյանքի վերջին մի քանի շաբաթում արագ քնի փուլերը (երբ արագանում է անոթազարկը, բարձրանում է արյան ճնշումը, զգալիորեն իջնում է մկանային լարվածությունը) զբաղեցնում են քնի ամբողջ տևողության 30-60%-ը, մնացած ժամանակը դանդաղ քնինն է (որին հատկանշական է մկանների թուլությունը, հանգստությունը): Մեծահասակների արագ քունը գիշերային քնի 20%-ն է կազմում, դանդաղը`80%: Երկու փուլերն էլ կենսականորեն անհրաժեշտ են:

Արտադրություն

Երեսունյոթերորդ շաբաթում հնարավոր է, որ կինը դեղնավուն, անգամ շագանակագույն, լորձանման արտադրություն նկատի։ Այդ շրջանին բնորոշ է համարվում վարդագույն-դեղնավուն երանգի արտադրությունը և պղտոր լորձը, դրանք լորձային խցանի արտանկման նշաններն են։

Փորը քարանում է

Եթե հաճախ եք նկատում, որ փորը քարանում է կամ ցավում է, տեղեկացրեք բժշկին։ Այդ շրջանում արգանդը կարող է հիպերտոնուսային վիճակում լինել, ինչը հաճախ նպաստում է ծննդաբերությանը։ Մոտալուտ ծննդաբերության մասին է վկայում նաև փորի իջեցումը։