Կրծքագեղձի հիվանդություններ․ ե՞րբ դիմել մամոլոգի խորհրդատվության
Կաթնագեղձերի հիվանդությւոնների հարցն այսօր լուրջ է։ Պրակտիկորեն ամեն երրորդ կին ունենում է կաթնագեղձի այնպիսի հիվանդություններ, ինչպիսիք են ֆիբրոադենոման, մաստիտը, լակտոստազը, կիստան, քաղցկեղը։
Վտանգավոր հիվանդությունները զարգացման վաղ փուլում հայտնաբերելու և ճիշտ ժամանակին բուժում ստանալու համար հարկավոր է տարին նվազագույնը մեկ անգամ դիմել օնկոլոգ-մամոլոգի և կաթնագեղձերի ՈւՁՀ կատարել։
Կաթնագեղձերի հիվանդությունների տեսակներն են՝
- մաստոպատիա,
- ֆիբրոզ-կիստոզ մաստոպատիա,
- մաստիտ,
- ֆիբրոադենոմա,
- կրծքագեղձի քաղցկեղ և այլն։
Կաթնագեղձի հիվանդությունների առաջացման պատճառներն են՝
- ժառանգական գործոններ,
- հորմոնային փոփոխություններ,
- առաջին ծննդաբերություն 35 տարեկանից հետո,
- ավելորդ քաշ,
- ծխախոտի և ալկոհոլի չարաշահում,
- կրծքագեղձի վնասվածք,
- դիաբետ,
- ռադիոակտիվ ճառագայթահարում և այլն։
Ախտորոշումը
Բանն այն է, որ նշված հիվանդությունների մեծամասնությունն իրեն զգալ չի տալիս վաղ փուլերում և գրեթե անհնար է ինքնուրույն հայտնաբերել դրանք շոշափելով կամ մենստրուացիայի սկզբում ինքնազննման միջոցով։
Բժշկի դիմելիս ախտորոշումն իրականացվում է հետևյալ միջոցներով՝
- ուլտրաձայնային հետազոտություն,
- հորմոնների հետազոտություն,
- օնկոմարկերների անալիզ,
- իմունահյուսվածքաբանական հետազոտություններ,
- մաշկի և կաթնագեղձերի պունկտատների հետազոտություն,
- նորագոյացության ասեղնածակում (պունկցիա)։
Նկատի ունեցեք, որ մինչև 35 տարեկան հասակը պետք է տարին առնվազն մեկ անգամ դիմել մամոլոգի խորհրդատվության և տարին երկու անգամ կաթնագեղձերի ՈւՁՀ կատարել, իսկ մամոգրաֆիան՝ ըստ բժշկի ցուցման։ 35-ից 55 տարեկանում պետք է մամոլոգի դիմել կրկին տարին մեկ անգամ, երկու անգամ՝ ՈւՁՀ կատարել, իսկ 40-ից սկսած տարին մեկ անգամ նաև մամոգրաֆիա անել։ 55-ից հետո պետք է տարին մեկ անգամ պարտադիր դիմել մամոլոգի, ՈւՁՀ և մամոգրաֆիա կատարել։