Բրոմ․ պահանջը և ազդեցությունն օրգանիզմի վրա

26.03.20182066

Բրոմի մասին տարածված մի միֆ կա, որի համաձայն զորամասերում այն ավելացնում են զինծառայողների սննդում՝ նրանց պոտենցիան նվազեցնելու նպատակով։ Բրոմը կարևոր դեր է խաղում մարդու օրգանիզմում և բնավ էլ չի նվազեցնում պոտենցիան։

Մարդն այն ստանում է սննդի միջոցով, և օրգանիզմում կենտրոնացած է հիմնականում հիպոֆիզում, արյան մեջ, մկանային հյուսվածքում, վահանաձև գեղձում։ Օրգանիզմից հեռանում է մեզի և քրտինքի միջոցով։

Ի՞նչ դեր է խաղում օրգանիզմում

Բրոմը, լինելով յոդի ինհիբիտոր, մասնակցում է վահանաձև գեղձի աշխատանքի կարգավորմանը։

Կարևոր դեր է խաղում ածխաջրային և ճարպային փոխանակության գործում, քանի որ նպաստում է լիպազի և ամիլազի սինթեզին (ճարպերի և ածխաջրերի ճեղքման համար պատասխանատու ֆերմենտներ)։

Մասնակցում է կենտրոնական նյարդային համակարգի աշխատանքին։

Բրոմ պարունակող սննդամթերքներ

Ամենից շատ պարունակվում է հետևյալ մթերքներում՝

  • ծովային կաղամբ և ծովաձուկ, 
  • ընկուզեղեն՝ պնդուկ, նուշ, գետնանուշ, հունական ընկույզ, 
  • լոբազգիներ՝ լոբի, ոլոռ, 
  • հացահատիկային բույսեր՝ հացահատիկ և վարսակաձավար, 
  • կաթնամթերք և կաթ։ 

Բրոմի պակաս

Ճիշտ սնվելու դեպքում բրոմի պակաս չի առաջանում։ Անբավարարության հիմնական ախտանշաններն են՝ անքնություն, թուլություն, դյուրագրգռություն, նյարդային համակարգի և օրգանիզմում այլ խանգարումներ։ Պակասը լրացվում է բրոմով հարուստ մթերքներ ուտելով և բրոմ պարունակող վիտամինային կոմպլեքս օգտագործելով։