Շոգեբաղնիքը և հղիությունը

Շոգեբաղնիքը նպաստում է ոչ միայն մարմնի հիգիենայի պահպանմանը, այլև արյունաշրջանառության բարելավմանը, օրգանիզմի բոլոր պրոցեսների ակտիվացմանը, իմունիտետի ամրապնդմանը, հանգստին և ընդհանուր ինքնազգացողության լավացմանը։ Շոգեբաղնիքի սիրահար կանանց հաճախ հետաքրքրում է արդյոք կարելի է նաև հղիության ընթացքում օգտվել այդ հաճույքից։

Շոգեբաղնիքն օգտակար է նաև հղի կանանց։ Առաջին հերթին այն լավացնում է արյունատար համակարգի աշխատանքը՝ բարելավում է օրգանների, այդ թվում՝ ընկերքի արյունամատակարարումը։ Ամրացնում է անոթների պատերը, ինչը կանխում է երակների վարիկոզ լայնացումը, բացի այդ նպաստում է քնի բարելավմանը, գլխացավի վերացմանը, ամրացնում է մկանները, թուլացնում լարվածությունը և մեծացնում հոդամկանների էլաստիկությունը, ինչը հրաշալի նախապատրաստում է ծննդաբերությանը։ Բարենպաստ ազդեցություն է թողնում նաև մաշկի վրա՝ կանխելով հղիազոլերի առաջացումը։

Ի՞նչ վնաս կարող է հասցնել

Բարձր ջերմաստիճանը կարող է խորացնել վաղ տոքսիկոզը՝ ուղեկցվելով թթվածնի պակասով և ավարտվելով գիտակցության կորստով, այդ պատճառով շոգեբաղնիքը հակացուցված է ուժեղ տոքսիկոզի դեպքում։ Հակացուցված է նաև վիժման վտանգի առկայության դեպքում, քանի որ տաքացումը կարող է հանգեցնել պտղապարկի պատռման և վիժման։

Արգելվում է շոգեբաղնիք այցելել նաև վարակիչ հիվանդությունների, սրտի հիվանդությունների և բարձր ճնշման դեպքում։ Նաև խորհուրդ չի տրվում հղիության ընթացքում օգտվել շոգեբաղնիքից, եթե նախկինում այդպիսի սովորություն չեք ունեցել։ Այդ դեպքում պետք է սկսել 15-րդ շաբաթից ոչ վաղ, ընդ որում՝ աստիճանաբար, դանդաղորեն մեծացնելով ջերմաստիճանը և շոգեբաղնիքում անցկացնելիք ժամանակը։ Հակացուցումների բացակայության դեպքում շոգեբաղնիքն օգտակար է հղի կանանց համար, եթե պահպանվեն ստորև նշված կանոնները։

Պահպանեք հիգիենայի կանոնները։ Շոգեբաղնիք մտնելիս վերցրեք սրբիչ, ռեզինե հողաթափեր և հատուկ գլխարկ։ Այդպիսով կկանխեք վարակիչ հիվանդություններով կամ սնկով վարակվելը, ինչպես նաև սայթաքելու վտանգը։

Շոգեբաղնիքի ջերմաստիճանը չպետք է 70 աստիճանից բարձր լինի, նրանում անցկացրած ժամանակը՝ 7-10 ր-ից ոչ ավել։

Շոգեբաղնիքից դուրս գալուց հետո խոտաբույսերով թեյ խմեք, որպեսզի փոխհատուցեք օրգանիզմի կորցրած հեղուկի քանակը։

Չի կարելի է շոգեբաղնիքից հետո սառը լոգանք ընդունել։

Շոգեբաղնիքը չպետք է անհարմարություն պատճառի, այն ուղղված է հաճույքին ու հանգստի ապահովմանը, օրգանիզմի մաքրմանը։ Ուշադիր եղեք ինքնազգացողության հանդեպ, վատ զգալուն պես դադարեցրեք պրոցեդուրան։

Վերահսկեք զարկերակային ճնշումը, վերին սանդղակը չպետք է գերազանցի 120 զարկ/րոպեն։

Վերոնշյալ պայմանների ապահովման դեպքում շոգեբաղնիքը բարենպաստ ազդեցություն կունենա նաև երեխայի վրա․ ընկերքային արյունաշրջանառության լավացումը կկանխի հիպոքսիայի առաջացումը՝ ապահովելով պտղի աճն ու ներդաշնակ զարգացումը։