Վիժումից հետո
28636
Վիժումը կնոջ համար մեծ վիշտ է: Հնարավոր է երկար ժամանակ պահանջվի այն հաղթահարելու համար:
Այս շրջանում կինը հոգեբանական աջակցության կարիք ունի: Մի մեղադրեք ինքներդ ձեզ, պետք չէ մեկուսանալ, փորձեք հաղթահարել վիշտը, և մտածեք ապագա երեխաների մասին:
Վիժումից հետո հաճախ արյունահոսություն է դիտվում՝ որպես պտղաձվի անջատման հետևանք: Արյունահոսությունը բնական երևույթ է նաև արգանդի քերումից հետո, քանի որ ցանկացած միջամտության դեպքում վնասվում են արյունատար անոթներ:
Սովորաբար, վիժումից 26-35 օր անց տեղի է ունենում մենստրուացիան: Առաջին երկու ամիսներին հնարավոր է այն տարբերվի նախկին ցիկլերից՝ լինի առատ, կամ առաջանա արտադրություն:
Շատ զույգեր վիժումից հետո շտապում են երեխա բեղմնավորել, ոմանք էլ, հակառակը, վախենալով նոր անհաջողությունից՝ հետաձգում են այն: Սովորաբար մասնագետները խորհուրդ են տալիս վիժումից հետո սպասել առնվազն 6 ամիս՝ նախքան հղիություն պլանավորելը:
Նախ օրգանիզմին որոշ ժամանակ է անհրաժեշտ վերականգնվելու համար: Բացի այդ, այդ ընթացքում կինը պետք է բացահայտի վիժման պատճառները և դրանք վերացնելու համար ստանա համապատասխան բուժում:
