Սննդակարգը և կնոջ վերարտարդողական ֆունկցիան

Կնոջ կյանքում կա մի փուլ, երբ ճիշտ սննդակարգից կախված է ոչ միայն իր սեփական առողջությունը, այլև իր ապագա փոքրիկինը: Կինը մտորում է, թե ինչպես պետք է սնվի հղիության պլանավորման փուլում, որպեսզի առողջ երեխա ծնվելու շանսերը մեծանան: Ինչպե՞ս է սննդակարգն ազդում կնոջ վերարտադրողական առողջության վրա:

Քաշի պակասը կամ ավելցուկը բացասաբար են ազդում վերարտադրողական ֆունկցիայի վրա, իսկ ճիշտ սննդակարգն օգնում է պահպանել մարմնի զանգվածը նորմայում: Բացի այդ, ընդունվող սննդանյութերը հանդիսանում են կառուցողական նյութ հորմոնների համար, հետևաբար դրանցով կարող է պայմանավորված լինել ձվազատման ուշացումը կամ բացակայությունը:

Սնունդը պարունակում է նաև հակաօքսիդանտներ, որոնք պաշտպանիչ դեր են կատարում ձվաբջիջների և սերմնաբջիջների համար:

Սննդանյութերի ազդեցությունը բեղմնավորման վրա

Ցինկը նպաստում է սեռական ցանկության ուժգնացմանը, իսկ դրա անբավարարությունն առաջացնում է դաշտանային ցիկլի խանգարումներ, ցավոտ դաշտան, հանգեցնում է հոգնածության և դեպրեսիվ վիճակների: Ցինկ հիմնականում պարունակվում է դդմի սերմերում, կաթնամթերքում, մսի, ձվի մեջ և հացահատիկներում:

Երկաթը բարձրացնում է հիվանդությունների հանդեպ դիմադրողականությունը, խթանում է ձվաբջջի և սաղմի հասունացումը: Երկաթի անբավարարությունը հանգեցնում է սակավարյունության: Երկաթ պարունակվում է կարմիր մսի, ձկան, ճակնդեղի մեջ, ընկուզեղենում և այլն:

Ֆոլաթթուն ազդում է հղիության ողջ ընթացքի վրա, այն խթանում է սաղմի նյարդային համակարգի զարգացումը և արյունաստեղծման համակարգի գործունեությունը:

Կարդացեք՝ Ո՞ր մթերքներն են ֆոլատներ պարունակում:

Ճիշտ սննդակարգը ենթադրում է ոչ միայն առողջարար մթերքների ընդունում, այլև անառողջ և վնասակար մթերքներից հրաժարում: Խորհուրդ է տրվում խուսափել տրանս-ճարպերից, պարզ ածխաջրատներից, կոֆեինից և ալկոհոլից:

Այսպիսով, առողջ սննդակարգն ազդում է վերարտադրողական առողջության և բեղմնավորման վրա, մեծացնում է առողջ երեխա լույս աշխարհ բերելու շանսերը:

Աղբյուրը